ബസ് നിറച്ച് പട്ടാളക്കാര് വരുന്നത് കണ്ട് അവളുടെ കണ്ണുകള് നിറഞ്ഞു; 'പിങ്ക്' ലെഹങ്കയില് അണിഞ്ഞൊരുങ്ങി നിന്ന നവവധുവിനെ യൂണിഫോമില് തന്നെ മണ്ഡപത്തിലേക്ക് ആനയിച്ച് സൈനികര്; വീരമൃത്യു വരിച്ച തങ്ങളുടെ കൂട്ടുകാരന് ഒരുക്കിയ സ്നേഹസമ്മാനം; അച്ഛന്റെ ഓര്മകളില് വീണ്ടും ആ മകള്; ഒരു അപൂര്വ്വ വിവാഹകഥ..
നോയിഡ: രാജ്യത്തിന് വേണ്ടി ജീവൻ ബലിയർപ്പിച്ച ഒരു സൈനികന്റെ മകളുടെ വിവാഹച്ചടങ്ങ്, സഹപ്രവർത്തകനോടുള്ള ആത്മബന്ധത്തിന്റെയും സ്നേഹത്തിന്റെയും അസാധാരണമായ ആവിഷ്കാരത്തിന് വേദിയായി. പിങ്ക് ലെഹങ്കയിൽ അണിഞ്ഞൊരുങ്ങിയ നവവധുവായ മുസ്കാനെ വിവാഹ മണ്ഡപത്തിലേക്ക് ആനയിക്കാൻ യൂണിഫോമിൽ അച്ഛന്റെ സ്ഥാനത്ത് അമ്പതോളം സൈനികർ ഒരുമിച്ചെത്തി. കഴിഞ്ഞ ദിവസം ഗ്രേറ്റർ നോയിഡയിലെ കാസ്നയിൽ നടന്ന ഈ വിവാഹ ചടങ്ങ് അവിടെ തടിച്ചുകൂടിയ നാട്ടുകാർക്കും അതിഥികൾക്കും അവിസ്മരണീയമായ അനുഭവമാണ് സമ്മാനിച്ചത്.
മുസ്കാൻ ഭട്ടിയുടെ (22) പിതാവ് സുരേഷ് സിങ് ഭട്ടി 2006-ലാണ് വീരമൃത്യു വരിച്ചത്. ജമ്മു കശ്മീരിലെ ബാരാമുള്ളയിൽ വെച്ചുണ്ടായ ഒരു തീവ്രവാദി ആക്രമണത്തിലാണ് ലാൻസ് കോർപറൽ പദവി വഹിച്ചിരുന്ന സുരേഷ് സിങ് ഭട്ടി രാജ്യത്തിനായി ജീവൻ വെടിഞ്ഞത്. പഞ്ചാബിലെ ഗ്രനേഡിയർ വിഭാഗത്തിന്റെ അഭിമാനകരമായ ഭാഗമായിരുന്നു അദ്ദേഹം. വീരമൃത്യു വരിക്കുമ്പോൾ 28 വയസ്സായിരുന്നു സുരേഷ് സിങ്ങിന്റെ പ്രായം. രാജ്യസുരക്ഷയ്ക്കായി ജീവിതാവസാനം വരെ പോരാടിയ ഒരു ധീര സൈനികന്റെ മകൾ എന്ന നിലയിൽ മുസ്കാന്റെ വിവാഹത്തിന് പ്രത്യേക ശ്രദ്ധയുണ്ടായിരുന്നു.
വിവാഹനിശ്ചയം കഴിഞ്ഞതിന് പിന്നാലെ മുസ്കാന്റെ പിതൃസഹോദരനും ഇവരെ സംരക്ഷിച്ചുപോരുന്ന വ്യക്തിയുമായ പവൻ സിങ് ഭട്ടി പഞ്ചാബിലെ ഗ്രനേഡിയർ വിഭാഗത്തിന്റെ ഓഫീസിലേക്ക് ഒരു ക്ഷണക്കത്ത് അയച്ചു. ഒരു ഔപചാരികത എന്ന നിലയിൽ അയച്ച ക്ഷണക്കത്ത് ഇത്ര സ്നേഹത്തോടെ സ്വീകരിക്കപ്പെടുമെന്ന് തങ്ങൾ ഒട്ടും പ്രതീക്ഷിച്ചില്ലെന്ന് പവൻ സിങ് മാധ്യമങ്ങളോട് പ്രതികരിച്ചു. വിവാഹത്തിന് ഒരാഴ്ച മാത്രം ബാക്കി നിൽക്കെ അയച്ച ആ ക്ഷണക്കത്തിനെ ഒരു സഹപ്രവർത്തകന്റെ കുടുംബത്തോടുള്ള സ്നേഹത്തിന്റെ പ്രതീകമായി സൈനികർ ഏറ്റെടുക്കുകയായിരുന്നു.
വധുവിനെ വിവാഹ വേദിയിലേക്ക് ആനയിക്കാനുള്ള ഒരുക്കങ്ങൾ നടക്കുന്നതിനിടെയാണ് വേദിയുടെ പുറത്ത് ഒരു ബസ് നിറയെ സൈനികർ വന്നിറങ്ങിയത്. സർവ്വീസിലുള്ളവരും വിരമിച്ചവരുമായി അമ്പതിലധികം പട്ടാളക്കാരാണ് സംഘത്തിൽ ഉണ്ടായിരുന്നത്. പട്ടാളക്കാരെത്തിയതോടെ ഗ്രാമീണർ മുഴുവൻ ആ വേദിക്ക് ചുറ്റും തടിച്ചുകൂടി.
സൈനികർ ആദ്യം ചെയ്തത്, വേദിക്കരികിൽ സ്ഥാപിച്ചിരുന്ന സുരേഷ് സിങ് ഭട്ടിയുടെ ചിത്രത്തിൽ പുഷ്പചക്രം അർപ്പിച്ച് അദ്ദേഹത്തിന് ആദരാഞ്ജലികൾ അർപ്പിക്കുകയായിരുന്നു. പിന്നീട്, സുരേഷ് ഭട്ടിയുടെ സഹപ്രവർത്തകരായിരുന്ന മൂന്ന് ഉദ്യോഗസ്ഥർ മുന്നോട്ട് വന്ന് മുസ്കാന്റെ ദുപ്പട്ട കൈകളിൽ പിടിച്ചുകൊണ്ട് അവളെ വിവാഹ മണ്ഡപത്തിലേക്ക് ആനയിച്ചു. പിതാവ് നഷ്ടപ്പെട്ട മകൾക്ക് കൂട്ടായി, അച്ഛന്റെ സ്ഥാനത്ത് അദ്ദേഹത്തിന്റെ സഹപ്രവർത്തകർ ചുവടുവെച്ച ആ നിമിഷം എല്ലാവരുടെയും കണ്ണുകൾ നിറച്ചു. മുസ്കാന്റെ കവിളുകളിലൂടെ ഒഴുകിയിറങ്ങിയ സന്തോഷക്കണ്ണീർ ആഴത്തിലുള്ള ആത്മബന്ധത്തിന്റെ സാക്ഷ്യപത്രമായി.
സുരേഷ് സിങ് ഭട്ടിയുടെ വീരമൃത്യുവിനുശേഷം അദ്ദേഹത്തിന്റെ ഭാര്യയും മൂന്ന് മക്കളും (രണ്ട് ആൺമക്കളും മുസ്കാനും) വളർന്നത് സഹോദരനായ പവൻ സിങ് ഭട്ടിയുടെ സംരക്ഷണയിലാണ്. കഴിഞ്ഞ വർഷം സുരേഷിന്റെ മൂത്ത മകനായ ഹർഷും പിതാവിന്റെ പാത പിന്തുടർന്ന് സൈന്യത്തിന്റെ ഭാഗമായി. നിലവിൽ ജമ്മുവിൽ സേവനമനുഷ്ഠിക്കുന്ന ഹർഷ്, പിതാവിന്റെ സ്നേഹിതർ ചടങ്ങിനെത്തിയത് കണ്ട് താൻ അക്ഷരാർഥത്തിൽ അമ്പരന്നുപോയെന്ന് മാധ്യമങ്ങളോട് പറഞ്ഞു.
വീരമൃത്യു വരിച്ച സൈനികരുടെ കുടുംബത്തിന് സർക്കാർ ജോലിയടക്കമുള്ള സഹായങ്ങൾ നൽകാറുണ്ടെന്നിരിക്കെ സുരേഷിന്റെ കുടുംബത്തിന് യാതൊരു പരിഗണനയും ലഭിച്ചില്ലെന്ന് പവൻ സിങ് ഭട്ടി ആരോപിച്ചു. സർക്കാർ തങ്ങളെ അവഗണിച്ചപ്പോഴും, സഹപ്രവർത്തകർ നൽകിയ ഈ ആദരവും സ്നേഹവും ഹൃദയം നിറയ്ക്കുന്നതാണെന്നും ഇത് തന്നെയാണ് യഥാർത്ഥ പിന്തുണയെന്നും അദ്ദേഹം കൂട്ടിച്ചേർത്തു. ഇന്ത്യൻ സൈനികർ തമ്മിലുള്ള സാഹോദര്യത്തിന്റെ ഏറ്റവും മികച്ച ഉദാഹരണമായി ഈ വിവാഹച്ചടങ്ങ് ചരിത്രത്തിൽ ഇടംനേടുകയാണ്.
