ക്രിക്കറ്റിലെ ട്വന്റി 20 യെ മാത്രമേ അറിയാവൂ എന്ന പരാമര്‍ശത്തിലൂടെ ആദ്യം പ്രകോപിപ്പിച്ചു; 6 വര്‍ഷം പിന്നിട്ടപ്പോള്‍ ട്വന്റി20 ഭരിക്കുന്ന നാല് പഞ്ചായത്തുകളില്‍ കോടികള്‍ പാഴാക്കിയെന്ന ആരോപണവുമായി വീണ്ടും രംഗത്ത്; 10 വര്‍ഷം കൊണ്ട് 50 കോടി നീക്കിയിരുപ്പ് ഉണ്ടാക്കിയപ്പോള്‍ വിചിത്ര കണക്കുമായി ബെന്നി ബഹനാന്‍; പച്ചവെള്ളം കോരി മുഖത്തൊഴിക്കുന്നത് നന്നായിരിക്കുമെന്ന് ട്വന്റി 20
വിചിത്ര കണക്കുമായി ബെന്നി ബഹനാന്‍
കൊച്ചി: ട്വന്റി 20 പാര്‍ട്ടിയും ബെന്നി ബെഹനാന്‍ എംപിയും തമ്മിലുള്ള പോര് ഇന്നും ഇന്നലെയും തുടങ്ങിയതല്ല. കിഴക്കമ്പലത്തുകാരെ ഒന്നടങ്കം ആക്ഷേപിക്കുകയും അപമാനിക്കുകയും ചെയ്തുവെന്ന് ആരോപിച്ച് 2019 ല്‍ ചാലക്കുടിയില്‍ സ്ഥാനാര്‍ഥിയായിരുന്ന ബെന്നിക്കെതിരെ ട്വന്റി 20 വന്‍ പ്രതിഷേധമാണ് അഴിച്ചുവിട്ടത്. ക്രിക്കറ്റിലെ ട്വന്റി 20 മാത്രമേ അറിയാവൂ എന്ന ബെന്നിയുടെ പരാമര്‍ശമാണ് കിഴക്കമ്പലത്തുകാരെ ചൊടിപ്പിച്ചത്. തിരഞ്ഞെടുപ്പ് വേദികളില്‍ അടക്കം തങ്ങളെ ആക്ഷേപിക്കുന്നുവെന്ന് ആരോപിച്ച് ട്വന്റി 20 ബെന്നിക്കെതിരെ വോട്ടുചെയ്യാനും ആഹ്വാനം ചെയ്തിരുന്നു. ട്വന്റി 20 യെ വെറുതെ വിടാന്‍ ബെന്നി തയ്യാറല്ല എന്നതിന്റെ വ്യക്തമായ തെളിവാണ് ശനിയാഴ്ച അദ്ദേഹം ട്വന്റി 20 ക്ക് എതിരെ ഉന്നയിച്ച ആരോപണങ്ങള്‍.
പതിവ് രാഷ്ട്രീയ ശൈലികള്‍ വിട്ട് ജനസേവനം മുഖ്യ അജണ്ടയാക്കി പ്രവര്‍ത്തിക്കുന്ന, അഴിമതി മുക്തമെന്ന് ഏവരും കരുതുന്ന ട്വന്റി 20 ക്കെതിരെ അഴിമതി ആരോപണം ഉന്നയിച്ച് രാഷ്ട്രീയ വെടി പൊട്ടിച്ചിരിക്കുകയാണ് അദ്ദേഹം തിരഞ്ഞെടുപ്പ് കാലത്ത്. കേരളത്തില്‍ 'വികസനത്തിന്റെ സിംഗപ്പൂര്‍ മോഡല്‍' എന്ന് പറഞ്ഞ് മേനി നടിക്കുന്ന ട്വന്റി20 ഭരണസമിതികള്‍ കോടിക്കണക്കിന് രൂപയുടെ വികസന ഫണ്ടുകള്‍ വിനിയോഗിക്കാതെ ലാപ്സാക്കി (Lapsed) കളഞ്ഞെന്ന ആരോപണമാണ് യുഡിഎഫ് കണ്‍വീനറും എം.പി.യുമായ ബെന്നി ബഹനാന്‍ ഉന്നയിക്കുന്നത്.
വിവരാവകാശ രേഖകള്‍ ഉദ്ധരിച്ചുകൊണ്ടാണ് ബെന്നി ബഹനാന്റെ ആക്രമണം. കിഴക്കമ്പലം ഉള്‍പ്പെടെ ട്വന്റി20 ഭരിക്കുന്ന നാല് പഞ്ചായത്തുകളിലായി വികസനത്തിനായി സര്‍ക്കാര്‍ അനുവദിച്ച 45 കോടിയോളം രൂപ വിനിയോഗിക്കാതെ ലാപ്സാക്കി (Lapsed) കളഞ്ഞെന്നു എം.പി. ആരോപിക്കുന്നു.
പഞ്ചായത്ത് ഭരണകാലയളവ് ലാപ്സാക്കിയ തുക
കിഴക്കമ്പലം കഴിഞ്ഞ 10 വര്‍ഷം 19 കോടി 14 ലക്ഷം [05:48]
മഴുവന്നൂര്‍ കഴിഞ്ഞ 4 വര്‍ഷം 12 കോടി 99 ലക്ഷം
കുന്നത്തുനാട് കഴിഞ്ഞ 5 വര്‍ഷം 8 കോടി 1 ലക്ഷം
ഐക്കരനാട് കഴിഞ്ഞ 4 വര്‍ഷം 4 കോടി 52 ലക്ഷം
'സിംഗപ്പൂര്‍ മോഡല്‍' വികസനത്തിന്റെ നെടുംതൂണെന്ന് ട്വന്റി20 അവകാശപ്പെടുന്ന കിഴക്കമ്പലം പഞ്ചായത്ത് വികസനത്തിന്റെ കാര്യത്തില്‍ പൂര്‍ണ്ണ പരാജയമാണെന്ന് കണക്കുകള്‍ തെളിയിക്കുന്നതായി ബെന്നി ബെഹനാന്‍ പറഞ്ഞു. പദ്ധതി വിഹിതം ചെലവഴിച്ചതിന്റെ കണക്കനുസരിച്ച്, 2023-24 സാമ്പത്തിക വര്‍ഷത്തില്‍ കിഴക്കമ്പലം പഞ്ചായത്ത് എറണാകുളം ജില്ലയിലെ 80 പഞ്ചായത്തുകളില്‍ 70-ാം സ്ഥാനത്താണ്.
2010-15 കാലഘട്ടത്തില്‍ യു.ഡി.എഫ്. ഭരണം ഒഴിഞ്ഞപ്പോള്‍ 98 ശതമാനം പദ്ധതി വിഹിതം ചെലവഴിച്ച് ജില്ലയില്‍ ഏഴാം സ്ഥാനത്ത് ഉണ്ടായിരുന്ന പഞ്ചായത്താണ് ഇപ്പോള്‍ 70-ാം സ്ഥാനത്തേക്ക് തള്ളപ്പെട്ടത്. പഞ്ചായത്തുകള്‍ 'മിച്ച'മാണ്, കോടിക്കണക്കിന് രൂപ 'നീക്കിയിരിപ്പുണ്ട്' എന്ന് ട്വന്റി20 അവകാശപ്പെടുന്നത് ജനങ്ങളെ തെറ്റിദ്ധരിപ്പിക്കാനാണെന്ന് ബെന്നി ബഹനാന്‍ ആരോപിച്ചു.
ട്വന്റി20 പറയുന്ന ഈ 'നീക്കിയിരിപ്പ്' എന്നത്, വികസനത്തിനായി ചെലവഴിക്കേണ്ടിയിരുന്നതും എന്നാല്‍ ചെലവഴിക്കാതെ ലാപ്സാക്കിയതുമായ പദ്ധതി വിഹിതമാണ്.: കിഴക്കമ്പലം പഞ്ചായത്തില്‍ 28 കോടി ബാങ്കില്‍ നിക്ഷേപിച്ചിട്ടുണ്ട് എന്ന വാദം, ചെലവഴിക്കേണ്ട തുകയെ ചെലവഴിക്കാതെ കോര്‍പ്പറേറ്റ് മാനേജ്മെന്റ് ശൈലിയില്‍ പ്രോഫിറ്റ് (ലാഭം) ആയി കാണിക്കുകയാണെന്നും അദ്ദേഹം ആരോപിച്ചു
വരാനിരിക്കുന്ന തിരഞ്ഞെടുപ്പില്‍ യു.ഡി.എഫ്. അധികാരത്തില്‍ വന്നാല്‍, ട്വന്റി20 ഭരണസമിതികള്‍ക്കെതിരെ സമഗ്രമായ അന്വേഷണം നടത്തുമെന്നും ബെന്നി ബഹനാന്‍ പ്രഖ്യാപിച്ചു. കഴിഞ്ഞ 10 വര്‍ഷമായി നടന്ന കോണ്‍ട്രാക്റ്റുകള്‍, പാവപ്പെട്ട എസ്സി കമ്മ്യൂണിറ്റിക്ക് നല്‍കേണ്ട ആനുകൂല്യങ്ങളിലെ അഴിമതി (പശുവിനെയും എരുമയെയും വാങ്ങിയതിലെ തട്ടിപ്പ്, ലൈറ്റുകള്‍ വാങ്ങിയതിലെ ക്രമക്കേടുകള്‍ എന്നിവയെക്കുറിച്ച് സമഗ്രമായി അന്വേഷണം നടത്തുമെന്നും അദ്ദേഹം വ്യക്തമാക്കി.
അതേസമയം, ട്വന്റി 2015 ല്‍ കിഴക്കമ്പലത്ത് അധികാരത്തിലേറുമ്പോള്‍, 39 ലക്ഷമായിരുന്നു കടം. അഞ്ചുവര്‍ഷം ഭരിച്ചപ്പോള്‍, 2020 ല്‍ 13.57 കോടി നീക്കിയിരുപ്പാണ് ഉണ്ടായത്. ട്വന്റി 20 യുടെ ഭരണം നാലുപഞ്ചായത്തുകളിലായി വിപുലമായപ്പോള്‍, 2025 ല്‍ 50 കോടിയുടെ നീക്കിയിരുപ്പ് ഉണ്ടായിട്ടുണ്ട്. ബെന്നി ബഹന്നാന്റെ അഴിമതി ആരോപണവുമായി ബന്ധപ്പെട്ട പോസ്റ്റിന് താഴെ വരുന്ന കമന്റുകളില്‍ ഭൂരിഭാഗവും ഒരുനല്ല കാര്യം ചെയ്താല്‍ ഇടംകോലിടുന്നവര്‍ എന്ന് ബെന്നിക്ക് ശക്തമായ മറുപടി നല്‍കുന്നുണ്ട്.
ഇന്ത്യയെ മൊത്തത്തില്‍ കൊള്ളയടിച്ചവരുടെ രോദനം....
ഇവനൊക്കെ ഭക്ഷണം കഴിക്കാനും കള്ളത്തരം പറയാനും മാത്രമാണ് വാ തുറക്കുന്നത്
Mr. ബെന്നി ഇടയ്‌ക്കൊക്കെ കുറച്ച് പച്ചവെള്ളം കോരി മുഖത്തൊഴിക്കുന്നത് നന്നായിരിക്കും. എപ്പോഴെങ്കിലും ഒക്കെ സുബോധം വരട്ടെ-ഇതാണ് ട്വന്റി 20 ഓണ്‍ലൈന്‍ പേജിന്റെ മറുപടി.
