പഠനത്തിനൊപ്പം അഭിനയ മോഹവും കൊണ്ടുനടന്ന പെണ്‍കുട്ടി; ചേട്ടന്റെ ചോദ്യം വഴിത്തിരിവായപ്പോള്‍ തുറന്നത് മിനി സ്‌ക്രീനിന്റെയും പിന്നാലെ സിനിമയുടെയും വാതിലുകള്‍; ബിഗ്‌ബോസിലേക്ക് എത്തിയത് സ്റ്റാര്‍ മാജിക്കിലെ താരത്തിളക്കവുമായി; ബിഗ് ബോസ് ഹൗസിലെ ഡ്രാമാ ക്യൂനും ക്യൂട്ടിയും; വിമര്‍ശനങ്ങളെ ഇന്ധനമാക്കി കപ്പുയര്‍ത്തിയ അനുമോളിന്റെ കഥ
ബിഗ് ബോസ് ഹൗസിലെ ഡ്രാമാ ക്യൂനും ക്യൂട്ടിയും; വിമര്‍ശനങ്ങളെ ഇന്ധനമാക്കി കപ്പുയര്‍ത്തിയ അനുമോളിന്റെ കഥ
തിരുവനന്തപുരം: വാദപ്രതിവാദങ്ങളും പി ആര് പോരാട്ടങ്ങളും കണ്ട ബിഗ്‌ബോസ് സീസണ്‍ 7 ല്‍ കിരീടം ചൂടി അനുമോള്‍. സാധാരണ ഒട്ടുമിക്ക പ്രേക്ഷകരുടെയും പിന്തുണയേറ്റുവാങ്ങിയാണ് ബിഗ്‌ബോസ് കിരീടത്തിലേക്ക് എത്തുന്നതെങ്കിലും അനുവിന്റെ കാര്യത്തില്‍ പിന്തുണയേക്കാള്‍ വിമര്‍ശനമായിരുന്നു സീസണിലുടനീളം നേരിടേണ്ടി വന്നത്. എങ്കിലും ബിഗ്‌ബോസ് സീസണ്‍ 7 കിരീടത്തില്‍ മുത്തമിടുമ്പോള്‍ അത് വിമര്‍ശകര്‍ക്കുള്ള മറുപടി കൂടിയാകുന്നു.
ടെലിവിഷന്‍ പരമ്പരകളിലുടെ സുപരിചിത.. പ്രേക്ഷകരുടെ സ്വന്തം അനുക്കുട്ടി
മിനി സ്‌ക്രീന്‍ പ്രേക്ഷകരുടെ ഇഷ്ട താരങ്ങളിലൊരാളായാണ് അനുമോള്‍ ബിഗ്‌ബോസ് സീസണ്‍ 7 ലേക്കെത്തുന്നത്. ടെലിവിഷന്‍ പരമ്പരകളിലൂടെയാണ് അനുമോള്‍ ശ്രദ്ധിക്കപ്പെടുന്നത്. പിന്നീട് താരം സ്റ്റാര്‍ മാജിക് എന്ന ടെലിവിഷന്‍ ഷോയിലൂടെയും പ്രശസ്തയായി. ആരാധകര്‍ അനുക്കുട്ടി എന്ന് സ്‌നേഹത്തോടെ വിളിക്കുന്ന അനുമോള്‍ അഭിനയത്തോടൊപ്പം തന്നെ മോഡലിങ്ങിലും സോഷ്യല്‍ മീഡിയയിലും സജീവമാണ്
പഠനകാലത്ത് തന്നെ അഭിനയത്തോടും മോഡലിംഗിനോടും വലിയ താല്‍പര്യം ഉണ്ടായിരുന്ന അനുമോള്‍ നിരവധി ബ്രാന്‍ഡുകള്‍ക്ക് മോഡല്‍ ആയിട്ടുണ്ട്. തിങ്കള്‍ മുതല്‍ വെള്ളി വരെ, കല്യാണം, മഹേഷും മാരുതിയും തുടങ്ങിയ സിനിമകളിലും പാടാത്ത പൈങ്കിളിയടക്കമുള്ള സീരിയലുകളിലും താരം ഇതിനകം വേഷമിട്ടു. സോഷ്യല്‍ മീഡിയയില്‍ വലിയ ഫാന്‍ ഫോളോവിംഗ് ഉള്ള താരം കൂടിയാണ് അനുമോള്‍. നടിയുടെ ചിത്രങ്ങളും വീഡിയോകളും വളരെ പെട്ടന്ന് വൈറലാകാറുമുണ്ട്. മികച്ച നടിക്ക് ഉള്ള കേരള സംസ്ഥാന ടെലിവിഷന്‍ അവാര്‍ഡും അനുമോള്‍ക്ക് ലഭിച്ചിരുന്നു. സുരഭിയും സുഹാസിനിയും എന്ന സീരിയലിലെ പ്രകടനമാണ് അനുമോളെ അവാര്‍ഡിന് അര്‍ഹയാക്കിയത്.
തിരുവന്തപുരം സ്വദേശിയാണ് മുപ്പതുകാരിയായ അനുമോള്‍. ആര്യനാട് ഗവണ്‍മെന്റ് വെക്കേഷണല്‍ ഹയര്‍ സെക്കന്‍ഡറി സ്‌കൂളിലെ പഠന ശേഷം കേരള സര്‍വകലാശാലയില്‍ നിന്ന് സംസ്‌കൃത്തില്‍ ബിരുദവും നേടിയിട്ടുണ്ട്. കോമഡിയും അനായാസേന കൈകാര്യം ചെയ്യുന്ന താരമാണ് അനുമോള്‍. കുറിക്കുകൊള്ളുന്ന കൗണ്ടറുകളും അനുമോളിന്റെ പ്രത്യേകതയാണ്.
തൊട്ടവാടിയായ പെണ്‍കുട്ടി.. ജീവിതത്തില്‍ ബ്രേക്ക് നല്‍കിയത് ചേട്ടന്‍
ബിഗ്‌ബോസിലെക്ക് ഒക്കെ വരുന്നതിന് മുന്‍പ് ഗൃഹലക്ഷ്മിക്ക് നല്‍കിയ ഒരഭിമുഖത്തില്‍ കലാരംഗത്തേക്കുള്ള തന്റെ കടന്നുവരവിനെക്കുറിച്ചും നേരിട്ട പ്രതിസന്ധികളെക്കുറിച്ചുമൊക്കെ അനു വിശദീകരിച്ചിരുന്നു. അത് ഇങ്ങനെയാണ്..
അഭിനയിക്കാനുള്ള കൊതിയുമായി നടന്ന സാധാരണ പെണ്‍കുട്ടിയായിരുന്നു ഞാന്‍. മധ്യവര്‍ഗ കുടുംബമാണ് എന്റേത്. തിരുവനന്തപുരം ആര്യനാടാണ് സ്വദേശം. അച്ഛനും അമ്മയ്ക്കും ഞാന്‍ നന്നായി പഠിക്കണമെന്നേ ഉണ്ടായിരുന്നുള്ളൂ. അന്നേ താനൊരു തൊട്ടാവാടിയാണെന്നാണ് അനുമോള്‍ പറയുന്നത്. അനുമോളുടെ ചേച്ചിയുടെ ഭര്‍ത്താവിന്റെ സുഹൃത്താണ് ഡബ്ബിങ് ആര്‍ട്ടിസ്റ്റ് ശങ്കര്‍ലാല്‍. സീരിയലില്‍ അഭിനയിക്കാന്‍ താല്‍പര്യമുള്ള പെണ്‍കുട്ടികള്‍ ആരെങ്കിലും ഉണ്ടോ എന്ന അദ്ദേഹം ചേട്ടനോട് ചോദിച്ചു. അങ്ങനെയാണ് അനുമോളിലേക്ക് സീരിയല്‍ വേഷം എത്തുന്നത്.
എന്നാല്‍ കുടുംബത്തിന് ആദ്യം എതിര്‍പ്പായിരുന്നുവെന്നും അനുമോള്‍ വ്യക്തമാക്കുന്നു.കൈയില്‍ കാശ് വന്നാല്‍ പെണ്‍കുട്ടികള്‍ അപ്പനേയും അമ്മയേയും തള്ളിപ്പറയും എന്നായിരുന്നു പലരും പറഞ്ഞിരുന്നത്. പക്ഷെ അമ്മയ്ക്കും അച്ഛനും അനുമോള്‍ അഭിനയിക്കുന്നത് ഇഷ്ടമായിരുന്നു.അനുവിന്റെ അച്ഛന്‍ നാടകത്തിലൊക്കെ അഭിനയിച്ചിട്ടുണ്ട്. അങ്ങനെ അനിയത്തി എന്ന സിരിയലിലൂടെ അനുമോള്‍ സീരിയില്‍ ജീവിതം ആരംഭിക്കുകയായിരുന്നു.
പിന്നീട് സൂര്യ ടിവിയിലെ സംഗമം എന്ന സീരിയലിലെത്തി. ബോബന്‍ ആലുമ്മൂടന്റെ സഹോദരിയുടെ വേഷമായിരുന്നു അനുവിന് ലഭിച്ചത്. ചില സീനൊക്കെ ശരിയാകാന്‍ 26 ടേക്ക് വരെ പോയെന്നും .അനുമോള്‍ ഓര്‍ക്കുന്നു. ഒടുവില്‍ അവര്‍ അനുവിന്റെ കഥാപാത്രത്തെ കൊന്നുകളഞ്ഞു. ഇതോടെ അനുവിന് നിരാശയായി. അന്ന് കരച്ചിലായിരുന്നു താനെന്നാണ് അനു പറയുന്നത്. പിന്നീട് മൂന്നുമണി, അമ്മുവിന്റെ അമ്മ, പാടാത്ത പൈങ്കിളി തുടങ്ങിയ സീരിയലുകളിലൊക്കെ അഭിനയിച്ച് എല്ലാം പഠിച്ചെടുക്കുകയായിരുന്നു അനു.
പ്ലസ് ടു കഴിഞ്ഞയുടനെയാണ് അനു അഭിനയ മേഖലയിലേക്ക് വരുന്നത്. ആദ്യം കിട്ടിയത് ആയിരം രൂപയാണ്. അത് എല്ലാവര്‍ക്കും വീതിച്ചു കൊടുത്തു. രണ്ടാമത്തെ വര്‍ക്കില്‍ 1500 രൂപ കിട്ടി. പിന്നെ മൂവായിരം. നാലായിരം. അങ്ങനെ കൂടി വന്നു. പണം അമ്മയ്ക്ക് കൊടുക്കാന്‍ തുടങ്ങി. അമ്മ അത് ബാങ്ക് അക്കൗണ്ടിലിടും.അമ്മയാണ് എന്റെ കരുത്തെന്നും അനു പറയുന്നു. തുടക്കകാലത്തെ തന്റെ കഷ്ടപ്പാടുകളെക്കുറിച്ചും അനു സംസാരിക്കുന്നുണ്ട്.
സീരിയലില്‍ കളര്‍ഫുള്‍ ഡ്രസ് വേണമെന്നൊക്കെ പലരും പറഞ്ഞു. പക്ഷെ അതൊന്നും വാങ്ങാനുള്ള കാശൊന്നും എന്റെ കൈയിലില്ല. യൂട്യൂബ് നോക്കി സ്റ്റിച്ചിങ് പഠിച്ചു. തുണി വാങ്ങി വീട്ടിലിരുന്ന് തുന്നി. അത് സീരിയലിലും സ്റ്റാര്‍ മാജിക്കിലും അണിഞ്ഞു. പിന്നെ മേക്കപ്പും സ്വന്തമായി ചെയ്തു പഠിച്ചു. കരിയറില്‍ നില്‍ക്കുന്ന സമയത്ത് തന്നെ പണം സമ്പാദിക്കണം. അതായിരുന്നു ലക്ഷ്യം. ഇപ്പോള്‍ വീടുണ്ട്. സ്ഥലവും കാറും വാങ്ങി. കുടുംബത്തിന് വേണ്ടിയാണ് ഞാന്‍ ജീവിക്കുന്നത്'' എന്നാണ് അനുമോള്‍ പറയുന്നത്.
ഉര്‍വശി ശാപം ഉപകാരമായി ! പി ആര് വിവാദത്തോടെ കത്തിക്കയറിയ അനു
ചില വിവാദങ്ങള്‍ വ്യക്തികള്‍ക്ക് ഗുണമായും വരാറുണ്ട്.അത്തരത്തില്‍ നോക്കുമ്പോള്‍ ബിഗ് ബോസ് സീസണ്‍ 7 ലെ അനുവിനെതിരായ പി ആര് വിവാദം അ മത്സരാര്‍ത്ഥിക്ക് ഗുണമായി എന്ന് വേണം കരുതാന്‍.അതുവരെ ഹൗസില്‍ മുന്നിട്ടു നിന്ന പലരെയും പിന്നോട്ട് തള്ളി അനു കുതിച്ചത് ഈ വിവാദത്തോടെയാണ്.പിന്നീട് അനുവിന്റ തിരിഞ്ഞ് നോക്കേണ്ടി വന്നിട്ടില്ല.ഒടുവില്‍ കിരീടത്തിലേക്കും.
കഴിഞ്ഞ സീസണുകള്‍ മുതല്‍ക്കെ പി ആര് വിവാദം ഉണ്ടായിരുന്നെങ്കിലും ഇത്രയേറെ ചര്‍ച്ചയാകുന്നത് ഇ സീസണ്‍ മുതലാണ്.മികച്ച പ്രകടനം കാഴ്ചവെച്ചവരുടെ അപ്രതീക്ഷിത പുറത്തുപോകലാണ് വലിയ രീതിയില്‍ സമൂഹമാധ്യമങ്ങളില്‍ പി ആര് വിഷയം ചര്‍ച്ചയാക്കിയത്.
റിയാലിറ്റി ഷോകളുടെ സ്വാഭാവികമായ സൗന്ദര്യത്തെ ഇല്ലാതാക്കിക്കൊണ്ട് പി.ആര്. തന്ത്രങ്ങള്‍ ബിഗ് ബോസ് വീട്ടില്‍ പിടിമുറുക്കുകയാണെന്നാണ് വ്യാപകമായി വിമര്‍ശനം ഉയര്‍ന്നത്.
പിന്നാലെ ബിഗ് ബോസ് വീടിനകത്തും പിആര്‍ കളികള്‍ ചര്‍ച്ച ചെയ്യപ്പെട്ടു.ബിഗ് ബോസ് മത്സരാര്‍ത്ഥികള്‍ക്ക് നല്‍കിയ മോണിംഗ് ടാസ്‌കും പി ആര് സംബന്ധമായിട്ടുള്ളതായിരുന്നു. 'പിആര്‍ കൊണ്ട് മാത്രം മുന്നോട്ട് പോകുന്ന ഒരു വ്യക്തിയും പിആര്‍ ഇല്ലാതെ മുന്നോട്ട് പോകുന്ന വ്യക്തിയും ആര്?' എന്നായിരുന്നു മത്സരാര്‍ത്ഥികളോട് ബിഗ് ബോസിന്റെ ചോദ്യം.
മത്സരാര്‍ത്ഥികളില്‍ കൂടുതല്‍ പേരും പിആര്‍ കൊണ്ട് മുന്നോട്ട് പോവുന്ന വ്യക്തിയായി എടുത്തു പറഞ്ഞത് അനുമോളുടെ പേരാണ്.'അനുമോള്‍ പിആര്‍ കൊടുത്തിട്ടുണ്ട് എന്നും അഡ്വാന്‍സ് വന്നപ്പോള്‍ കൊടുത്തു, ബാക്കി ഇവിടുന്ന് പോയിട്ട് കൊടുക്കും എന്ന് പറഞ്ഞിട്ടുണ്ട്. 16 ലക്ഷമോ മറ്റോ ആണ് തുക,' എന്നുമായിരുന്നു ബിന്നിയുടെ വാക്കുകള്‍.
അനുമോള്‍ കൊടുത്ത പിആര്‍ ടീം എന്നെ കോണ്‍ടാക്റ്റ് ചെയ്തിരുന്നു. വലിയ തുകയാണ് അവര്‍ പറഞ്ഞത്. അതുപോലെ വീക്കെന്‍ഡ് എവിക്ഷന്‍ വരുമ്പോള്‍ എല്ലാവരും പെട്ടി പാക്ക് ചെയ്തു വെക്കുമ്പോള്‍, അനുമോള്‍ കുറച്ച് ഡ്രസ് മാത്രമേ പാക്ക് ചെയ്യാറുള്ളൂ. ബാക്കി അവിടെ മാറ്റി വക്കാറാണ് പതിവ്. അനുമോള്‍ക്ക് അറിയാം ആള് എവിക്റ്റ് ആവില്ലെന്ന്,' എന്നായിരുന്നു അക്ബറിന്റെ വാക്കുകള്‍.
ഇത്തരത്തില്‍ വീടിനകത്തും പുറത്തും ഒരുപോലെ വിമര്‍ശനങ്ങള്‍ നേരിട്ടായിരുന്നു അനുവിന്റെ യാത്ര. എന്നാല്‍ ടെലിവിഷന്‍ താരങ്ങളും മുന്‍ സീസണിലെ താരങ്ങളും അനുവിന്റെ പിന്തുണക്കെത്തിയതോടെ മത്സരം കനത്തു.35 ലക്ഷത്തോളം കടമുള്ള അനു എങ്ങിനെയാണ് 16 ലക്ഷത്തിന് പി ആര് കൊടുക്കക എന്നാണ് ഒരാളുടെ ചോദ്യം.
അനുവിനെ പിന്തുണയ്ക്കുന്നവരാകെ അവളുടെ പി ആര് ആണെങ്കില്‍ ഞങ്ങള്‍ എല്ലാവരും അവരുടെ പി ആര് ആണെന്നായിരുന്നു ഒരു വിഭാഗത്തിന്റെ പിന്തുണ.
വിവാദങ്ങളുടെ തോഴി
ബിഗ്‌ബോസ് സീസണ്‍ 7 ന്റെ അവസാന ദിവസം വരെയും അനുമോളെ വിവാദം വിട്ടൊഴിഞ്ഞിട്ടില്ല.സമൂഹ മാധ്യമത്തില്‍ പ്രത്യക്ഷപ്പെട്ട കുറിപ്പ് പോലും സൂചിപ്പിക്കുന്നത് അതായിരുന്നു. കുറിപ്പ് പറയുന്നത് ഇങ്ങനെ..
തിരിഞ്ഞ് നോക്കുമ്പോള്‍ ഈ സീസണിനെക്കുറിച്ച് ഓര്‍ത്തിരിക്കാന്‍ പ്രേക്ഷകര്‍ക്കുള്ളത് കുറച്ച് ആരോപണങ്ങള്‍ മാത്രമാണ്. വഴക്കും പ്രശ്‌നങ്ങളും മാത്രമായിരുന്നു ഈ സീസണില്‍ ഭൂരിഭാ?ഗവും. വളരെ മോശം ആരോപണങ്ങളാണ് ഉയര്‍ന്നതും. പ്രത്യേകിച്ചും അനുമോളുടെ കടുത്ത ആരോപണങ്ങള്‍ ചര്‍ച്ചയായി. ജിസേല്‍, ആര്യന്‍, ബിന്‍സി, അപ്പാനി ശരത്ത് തുടങ്ങിയവര്‍ക്കെതിരെ അനുമോള്‍ വലിയ ആരോപണങ്ങളാണ് ഉന്നയിച്ചത്.
ഇതില്‍ ക്ഷമ പറയാന്‍ പോലും അനുമോള്‍ തയ്യാറായില്ല. എന്നാല്‍ അനുമോള്‍ക്കെതിരെ എന്തെങ്കിലും ആരോപണം വരുമ്പോള്‍ കരഞ്ഞ് ബഹളം വെക്കുകയും ഇത് വഴി ജനപിന്തുണയും നേടുന്നെന്ന വിമര്‍ശനം പ്രേക്ഷകര്‍ക്കുണ്ട്. ഷോ അവസാനിക്കാറാകുമ്പോഴും വിമര്‍ശകര്‍ക്ക് പറയാനുള്ളത് അനുമോളുടെ ഭാഗത്ത് നിന്നുണ്ടായ വീഴ്ചകളെക്കുറിച്ചാണ്.
അനുമോള്‍ ബിഗ് ബോസ് ഹൗസില്‍ ചെയ്ത സകല ചെറ്റത്തരങ്ങളും പക്കാ പ്ലാന്‍ഡ് ആന്റ് സ്‌ക്രിപ്റ്റഡ് ആണ്. മോറല്‍ പോലീസിംഗ്, ആണുങ്ങള്‍ക്കെതിരെ ഉള്ള ലൈംഗിക ആരോപണങ്ങള്‍, ചെയ്ത തെറ്റ് അംഗീകരിക്കാതെ ന്യായീകരിക്കുക, പിടിക്കപ്പെടുമ്പോള്‍ കരഞ്ഞ് മെഴുകി സിമ്പതി ഉണ്ടാക്കുക. തുടങ്ങിയ കാര്യങ്ങള്‍ പുറത്ത് വെളുപ്പിക്കാനും, അത് വോട്ട് ആക്കി മാറ്റാനും പോന്ന ഒരു പിആര്‍ ടീമിനെ പുറത്ത് സെറ്റാക്കി നിര്‍ത്തിയിട്ടാണ് അനുമോള്‍ ബി?ഗ് ബോസിലേക്ക് പോകുന്നത്
ആ പിആര്‍ ടീം പഠിപ്പിച്ച് കൊടുത്തത് പോലെ തന്നെയാണ് അനുമോള്‍ ഇതുവരെയും ?ഗെയിം കളിച്ചിട്ടുള്ളത്. നമുക്ക് ഗെയിം കളിക്കാം, അത് പക്ഷെ മറ്റുള്ളവരുടെ ലൈഫ് നശിപ്പിച്ചിട്ട് ആകരുത്. അനുമോളുടെ സദാചാര ഗുണ്ടായിസവും, ലൈംഗിക ആരോപണങ്ങളും നേരിട്ട മറ്റ് മത്സരാര്‍ത്ഥികളും അവരുടെ വീട്ടുകാരും ഭാവിയില്‍ നേരിടാന്‍ പോകുന്നത് ഓര്‍ക്കുമ്പോള്‍ തന്നെ പേടി ആകുന്നു. ഇത്തരം സ്ത്രീകള്‍ നമ്മുടെ സമൂഹത്തില്‍ ഉള്ളിടത്തോളം പേടിയോടെ അല്ലാതെ ആര്‍ക്കും പുറത്തിറങ്ങാന്‍ പോലും കഴിയില്ല. അനുമോള്‍ ജയിച്ചാല്‍ അത് ബി?ഗ് ബോസിന് മാത്രമല്ല, കേരള സമൂഹത്തിന് മൊത്തം അപമാനം ആയിരിക്കും, എന്നാണ് അനുമോളെ വിമര്‍ശിച്ച് കൊണ്ട് വന്ന കുറിപ്പ്.
എന്തായാലും എല്ലാവരുടെയും പുകഴ്ത്തലുകള്‍ മാത്രമല്ല വിമര്‍ശനങ്ങളും ബിഗ്‌ബോസില്‍ കിരീടത്തിലേക്ക് ഉള്ള യാത്രക്ക് ഇന്ധനമാകുമെന്ന് തെളിയിച്ചാണ് സീസണ്‍ 7 ന് തിരശ്ശീല വീഴുന്നത്.
