സ്‌നേഹത്തിന്റെ കടയിലേക്ക് ആളെ എത്തിക്കാനുള്ള ഓപ്പറേഷന്‍ കൈപ്പത്തിയുമായി സന്ദീപ് വാര്യര്‍; പാലക്കാട്ട് നഗരസഭയില്‍ അട്ടിമറിയ്ക്ക് സാധ്യത തേടി നീക്കങ്ങള്‍; വയനാട്ടില്‍ മധുവിനേയും കോണ്‍ഗ്രസിലെത്തിക്കാന്‍ അശ്രാന്തപരിശ്രമം; താമരയെ വാടിക്കാന്‍ ചടുലനീക്കവുമായി സന്ദീപ്; നാഥനില്ലാ കളരിയായി ബിജെപി; എല്ലാം വീക്ഷിച്ച് ആര്‍ എസ് എസ് മൗനത്തിലും
കല്‍പ്പറ്റ: ബിജെപിയിലെ അസംതൃപ്തരെ സ്‌നേഹഹത്തിന്റെ കടയിലേക്ക് സ്വാഗതം ചെയ്ത് സന്ദീപ് വാര്യര്‍ എത്തുമ്പോൾ പ്രതിസന്ധിയിലാവുന്നത് ബിജെപി നേതൃത്വം. ഒരാളും രാഷ്ട്രീയമായി അനാഥമാവില്ല എന്ന ഉറപ്പാണ് സന്ദീപ് നൽകുന്നത്. ഇതോടെ സന്ദീപിന് പിന്നാലെ നിരവധി ബിജെപി അംഗങ്ങൾ കോൺഗ്രസിലേക്ക് എത്തുമെന്ന കാര്യത്തിൽ കൂടുതൽ വ്യക്തത വരികയാണ്. പാലക്കാട് നഗരസഭയിൽ ബിജെപി അംഗങ്ങൾക്ക് നേതൃത്വത്തോടുള്ള എതിർപ്പുകൾ കഴിഞ്ഞ ദിവസങ്ങളിൽ പുറത്ത് വന്നിരുന്നു. ഈ അംഗങ്ങളെ കോൺഗ്രസ്സിലേക്കെത്തിക്കാൻ സന്ദീപ് ചരട് വലി നടത്തുന്നതായാണ് മനസ്സിലാക്കേണ്ടത്.
ഓപ്പറേഷൻ കൈപ്പത്തിയിലൂടെ ബിജെപി അംഗങ്ങളെ കോൺഗ്രസ് പാളയത്തിലേക്കെത്തിക്കാൻ സന്ദീപ് വാര്യരുടെ ചടുല നീക്കം. പാലക്കാട് ബിജെപിയിൽ ഭിന്നത രൂക്ഷമാകുമ്പോൾ ഇടപെടാൻ സാധിക്കാതെ കെ സുരേന്ദ്രനും നോക്കുകുത്തിയാകുന്നതോടെ കാര്യങ്ങൾ കൈവിട്ട് പോകുന്ന മട്ടാണ്. ഇതിനിടെ ആർഎസ്എസ്സ് വിഷയത്തിൽ മൗനം പാലിക്കുന്നതും പ്രതിസന്ധി രൂക്ഷമാക്കുന്നു. സന്ദീപ് വഴി കൂടുതൽ അംഗങ്ങൾ കോൺഗ്രസിലേക്ക് എത്തുമെന്ന പേടി ബിജെപി നേതൃത്തത്തിനും ഉണ്ടെന്നാണ് മനസ്സിലാക്കേണ്ടത്. പാലക്കാട് സ്ഥാനാർഥി നിർണയം ശരിയായില്ലായെന്ന് നഗരസഭാ അധ്യക്ഷ പരസ്യമായി പറഞ്ഞത് കടുത്ത അച്ചടക്ക ലംഘനമെന്ന് വിലയിരുത്തുമ്പോഴും നടപടിയെടുക്കാൻ ബിജെപി മടിക്കുന്നത് സന്ദീപിന്റെ ഇടപെടൽ ഭയന്നാണെന്നാണ് കണക്ക് കൂട്ടൽ. ഏതെങ്കിലും തരത്തിൽ നടപടികൾ എടുത്താൽ സന്ദീപിന്റെ ചരട് വലിയിൽ കൂടുതൽ അംഗങ്ങൾ പാർട്ടി വിടുമെന്ന് ബിജെപി ഭയക്കുന്നുണ്ട്.
പാലക്കാട് നഗരസഭാ കൗസിലർമാരെ സന്ദീപ് ബിജെപിയിലേക്ക് എത്തിക്കുമെന്ന അഭിവ്യൂഹങ്ങളൂം നിലനിൽക്കുന്നുണ്ട്. ഇതിന് കൂടുതൽ വ്യക്തത വരുത്തുന്നതായിരുന്നു സന്ദീപിന്റെ ഫേസ്ബുക്ക് കുറിപ്പ്. ആരുടേയും പേരെടുത്ത് പറയാതെയായിരുന്നു സന്ദീപിന്റെ കുറിപ്പ്. വെറുപ്പിന്റെ രാഷ്ട്രീയം വിട്ട് വരുന്നവരൊന്നും പേടിക്കേണ്ടതില്ല. കോൺഗ്രസിന്റെ തണലിലേക്ക് സ്വാഗതം. കോൺഗ്രസിലേക്ക് എത്തുന്ന ഒരാളും രാഷ്ട്രീയമായി അനാഥമാവില്ല എന്നുമായിരുന്നു സന്ദീപിന്റെ കുറിപ്പ്.
നേതൃത്വത്തിനോടുള്ള അമർഷത്തിൽ ബിജെപി മുൻ വയനാട് ജില്ലാ പ്രസിഡന്‍റ് കെപി മധു ഇന്നലെ രാജി വെച്ചിരുന്നു. വിവിധ മുന്നണികളുമായി ചർച്ച നടക്കുന്നുണ്ടെങ്കിലും മധുവിനെ കോൺഗ്രസ്സിലേക്കെത്തിക്കാനായി സന്ദീപ് ശ്രമിക്കുന്നതായാണ് മനസ്സിലാക്കേണ്ടത്.
ഇതുമായി ബന്ധപ്പെട്ട് സന്ദീപ് വാര്യര്‍ കെ പി മധുവുമായി ബന്ധപ്പെട്ടു. കോണ്‍ഗ്രസിലേക്ക് ക്ഷണിച്ചുകൊണ്ടാണ് സന്ദീപ് വാര്യര്‍ കെപി മധുവുമായി നിര്‍ണായക ചര്‍ച്ച നടത്തിയത്. സന്ദീപ് വാര്യര്‍ ബന്ധപ്പെട്ടിരുന്നുവെന്നും ആലോചിച്ച് അറിയിക്കാമെന്ന് മറുപടി നൽകിയതായും കെപി മധു പറഞ്ഞു. ബിജെപിയിൽ നിന്ന് രാജിവെച്ചതിന് പിന്നാലെയാണ് കെപി മധുവിനെ സന്ദീപ് വാര്യര്‍ ബന്ധപ്പെട്ടത്.
കെപി മധുവിനായി എൽഡിഎഫ്, യുഡിഎഫ് നേതാക്കള്‍ രംഗത്തുണ്ട്. യുഡിഎഫുമായി മാത്രമല്ല, എൽഡിഎഫ് നേതാക്കളുമായും ചര്‍ച്ച നടക്കുന്നുണ്ടെന്നും ആവശ്യങ്ങള്‍ അംഗീകരിച്ചാൽ യുഡ‍ിഎഫുമായോ എൽഡിഎഫുമായോ സഹകരിക്കുമെന്നും കെപി മധു പറഞ്ഞു. പൊതുപ്രവര്‍ത്തനത്ത് തന്നെ തുടരാനാണ് തീരുമാനം. അതിന് യോജിച്ച തീരുമാനമായിരിക്കും എടുക്കുകയെന്നും കെപി മധു പറഞ്ഞു.
ബിജെപിയിലെ ഗ്രൂപ്പ് തല്ല് കേന്ദ്ര നേതൃത്വം ഇടപെട്ട് തൽക്കാലം അവസാനിപ്പിച്ചാലും വീണ്ടും അടി തുടങ്ങുമെന്നും മധു പറഞ്ഞു. രാജിവെച്ചശേഷം ബിജെപിയിൽ നിന്ന് ആരും ബന്ധപ്പെട്ടിട്ടില്ലെന്നും ചില പ്രാദേശിക പ്രവര്‍ത്തകര്‍ അവരുടെ വിഷമം പറഞ്ഞിരുന്നുവെന്നും കെപി മധു പറഞ്ഞു.
നേതൃത്വവുമായി ഉള്ള ഭിന്നതയെ തുടർന്നാണ് ഇന്നലെയാണ് കെപി മധു രാജി പ്രഖ്യാപിച്ചത്. ബിജെപിയിൽ തമ്മിലടിയും ഗ്രൂപ്പിസവുമാണെന്നാണ് മധു ആരോപിച്ചത്. തൃശ്ശൂരിൽ ബിജെപി ജയിച്ചത് സെലിബ്രിറ്റി സ്ഥാനാർത്ഥിയായത് കൊണ്ടാണെന്നും എല്ലാ പഞ്ചായത്തിലും സെലിബ്രിറ്റികൾക്ക് മത്സരിക്കാൻ ആവില്ലെന്നും മധു പറഞ്ഞു.
കഴിഞ്ഞ അര നൂറ്റാണ്ടായി കേരളത്തിൽ പ്രവർത്തിക്കുന്ന ബിജെപിക്ക് ഒരു മാറ്റവുമുണ്ടാക്കാനായില്ലെന്നും അദ്ദേഹം വിമർശിച്ചു. വയനാട്ടിൽ വന്യജീവി ആക്രമണ സമരത്തിനിടെ ക്രിസ്ത്യൻ പുരോഹിതർക്കെതിരെ നടത്തിയ പരാമർശത്തെ തുടർന്നാണ് മധുവിനെ ജില്ലാ പ്രസിഡൻറ് സ്ഥാനത്തു നിന്ന് ബിജെപി മാറ്റിയത്
