തിരുവനന്തപുരം: തിരുവനന്തപുരം കോര്‍പ്പറേഷനില്‍ അധികാരം പിടിക്കാന്‍ വേണ്ടി വമ്പന്‍ വികസന വാഗ്ദാനങ്ങളുമായി ബിജെപിയുടെ പ്രകടന പത്രിക. 2036ലെ ഒളിംപിക്‌സ് തിരുവനന്തപുരത്ത് നടത്തുമെന്നാണ് പ്രധാന വാദ്ഗാനം. ഒളിംപികിസിന്റെ വേദികളിലൊന്ന് തിരുവനന്തപുരമായിരിക്കുമെന്നും കേന്ദ്ര സര്‍ക്കാരില്‍ ഇതിനായി സമ്മര്‍ദം ചെലുത്തുമെന്നുമാണ് പ്രകടനപത്രികയില്‍ പറയുന്നത്. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറാണ് പ്രകടന പത്രിക പുറത്തിറക്കിയത്.

അധികാരത്തിലേറി 45 ദിവസത്തിനകം തിരുവനന്തപുരം നഗരത്തിന്റെ സമഗ്രവികസനത്തിനായി തയാറാക്കുന്ന രൂപരേഖ പ്രസിദ്ധീകരിക്കുമെന്നാണ് മറ്റൊരു വാഗ്ദാനം. ഇതിനായി പ്രധാനമന്ത്രി നരേന്ദ്ര മോദി നേരിട്ട് എത്തുമെന്ന് ബിജെപി നേരത്തെ അറിയിച്ചിരുന്നു. നടപ്പാക്കുന്ന പദ്ധതികളുടെ പ്രോഗ്രസ് കാര്‍ഡ് എല്ലാ വര്‍ഷവും പുറത്തിറക്കും, എല്ലാ വാര്‍ഡിലും കുടുംബാരോഗ്യ കേന്ദ്രങ്ങള്‍ ഉള്‍പ്പെടെ നിരവധി പ്രഖ്യാപനങ്ങളാണ് പ്രകടന പത്രികയിലുള്ളത്. 2030 ഓടെ ഇന്ത്യയിലെ ഏറ്റവും മികച്ച മൂന്നു നഗരങ്ങളിലൊന്നായി തിരുവനന്തപുരത്തെ മാറ്റുമെന്നും പ്രകടന പത്രികയില്‍ പറയുന്നു.

തിരുവനന്തപുരം കോര്‍പറേഷനില്‍ ബിജെപി അധികാരത്തില്‍ വന്നാല്‍ വികസനം ലക്ഷ്യമാക്കി പ്രവര്‍ത്തിക്കുന്ന ഭരണ സംവിധാനം നിലവില്‍ വരുമെന്നും വിഴിഞ്ഞം തുറമുഖത്തെ ഗേറ്റ് വേ തുറമുഖമാക്കി മാറ്റുമെന്നും രാജീവ് ചന്ദ്രശേഖര്‍ പറഞ്ഞു. തിരുവനന്തപുരം നഗരത്തെ സാധ്യതകളുടെ ഹബ്ബ് ആക്കി മാറ്റുമെന്നും അദ്ദേഹം പറഞ്ഞു.

എല്ലാവര്‍ക്കും വീട്, തിരുവനന്തപുരത്തെ ഇന്ത്യയിലെ മികച്ച മൂന്ന് നഗരങ്ങളിലൊന്നായി മാറ്റും തുടങ്ങിയ വാഗ്ദാനങ്ങളും പത്രികയിലുണ്ട്. അതേസമയ ഒളിമ്പിക്‌സ് ഇന്ത്യയില്‍ നടക്കുമോ എന്ന കാര്യത്തില്‍ പോലും തീരുമാനമായിട്ടില്ലെന്നിരിക്കെയാണ് ബിജെപിയുടെ വാഗ്ദാന എന്നതാണ് ശ്രദ്ധേയം. ഇന്ത്യ കൂടാതെ ഇന്തോനീഷ്യ, ഖത്തര്‍, സൗദി, തുര്‍ക്കി അങ്ങനെ ഒട്ടേറെ രാജ്യങ്ങള്‍ ആ 2036 ലെ ഒളിമ്പിക്‌സ് ആതിഥേയത്വം വഹിക്കാന്‍ അപേക്ഷ കൊടുത്തിട്ടുണ്ട്. ഇന്ത്യയില്‍ തന്നെ അഹമ്മദാബാദാണ് ഒളിമ്പിക്‌സിനായി ശ്രമം നടത്തുന്ന നഗരം.

അങ്ങനെ ഇരിക്കുകയാണ് 2036 ല്‍ ഒളിമ്പിക്‌സ് തിരുവനന്തപുരത്ത് നടക്കും എന്ന കൗതുക കരമായ വാഗ്ദാനമായി ബിജെപി രംഗത്തുവന്നത്. 2036-ലെ ഒളിമ്പിക്‌സിന് ആതിഥേയത്വം വഹിക്കുക എന്നത് ഇന്ത്യയുടെ സ്വപ്നമാണെന്ന് പ്രധാനമന്ത്രി നരേന്ദ്ര മോദി 78-ാമത് സ്വാതന്ത്ര്യ ദിനത്തില്‍ പറഞ്ഞിരുന്നു. ജി 20 ഉച്ചകോടി പോലുള്ള വലിയ പരിപാടിക്ക് ആതിഥേയത്വം വഹിക്കാനുള്ള അടിസ്ഥാന സൗകര്യങ്ങള്‍ ഇന്ത്യയിലുണ്ടെന്ന് ഇതിനകം തെളിയിച്ചിട്ടുണ്ടെന്ന് പറഞ്ഞ അദ്ദേഹം 2036-ലെ ഒളിമ്പിക്‌സിന് ആതിഥേയത്വം വഹിക്കുക എന്നതാണ് രാജ്യത്തിന്റെ അടുത്ത സ്വപ്നമെന്നും തങ്ങള്‍ അതിനുള്ള ഒരുക്കങ്ങള്‍ നടത്തിക്കൊണ്ടിരിക്കുകയാണെന്നും അദ്ദേഹം കൂട്ടിച്ചേര്‍ത്തു.

2036-ലെ ഒളിമ്പിക്‌സിന് ആതിഥേയത്വം വഹിക്കാന്‍ ഇന്ത്യ തയ്യാറാണെന്ന് മോദി ഈ വര്‍ഷം മുംബൈയില്‍ നടന്ന അന്താരാഷ്ട്ര ഒളിമ്പിക് കമ്മിറ്റി സെഷന്റെ ഉദ്ഘാടന ചടങ്ങിലും വ്യക്തമാക്കിയിരുന്നു. ഇന്ത്യ സന്നദ്ധത അറിയിച്ചതിനു പിന്നാലെ തീരുമാനം മൂന്ന് വര്‍ഷത്തിനുള്ളില്‍ അറിയിക്കുമെന്ന് അന്താരാഷ്ട്ര ഒളിമ്പിക് കമ്മിറ്റിയും വ്യക്തമാക്കിയിരുന്നു. ഇന്ത്യയടക്കം നിരവധി രാജ്യങ്ങള്‍ ഒളിമ്പിക്‌സ് വേദിയാകാനുള്ള സന്നദ്ധത ഇതിനകം അറിയിച്ചിട്ടുണ്ട്. 2032 ഒളിമ്പിക്‌സ് വരെയുള്ള വേദികളാണ് ഇതുവരെ പ്രഖ്യാപിച്ചത്. 2028 ഒളിമ്പിക്‌സിന് ലോസ് ആഞ്ജലിസും 2032 ഒളിമ്പിക്‌സിന് ഓസ്‌ട്രേലിയയിലെ ബ്രിസ്‌ബെയിനുമാണ് വേദിയാകുക.

അതേസമയം ഒളിമ്പിക്‌സിന് ആതിഥേയത്വം വഹിക്കാനുള്ള നീക്കത്തിന്റെ ഭാഗമായി 'ഗുജറാത്ത് ഒളിമ്പിക് പ്ലാനിങ് ആന്‍ഡ് ഇന്‍ഫ്രാസ്ട്രക്ചര്‍ കോര്‍പ്പറേഷന്‍ ലിമിറ്റഡ്' എന്ന കമ്പനി രൂപവത്കരിച്ചതായും റിപ്പോര്‍ട്ടുകളുണ്ടായിരുന്നു. ഇതിനായി ഗുജറാത്ത് സംസ്ഥാനസര്‍ക്കാര്‍ ആറായിരം കോടി രൂപ വകയിരുത്തിയെന്നും റിപ്പോര്‍ട്ടിലുണ്ട്. അഹമ്മദാബാദ് കേന്ദ്രമാക്കി ഗെയിംസ് സംഘടിപ്പിക്കാനാണ് പദ്ധതി. ലോകത്തെ ഏറ്റവും വലിയ ക്രിക്കറ്റ് സ്റ്റേഡിയമായ നരേന്ദ്രമോദി സ്റ്റേഡിയം ഉള്‍പ്പെടുന്ന 350 ഏക്കറോളം സ്ഥലത്ത് അടിസ്ഥാനസൗകര്യം വികസിപ്പിക്കുകയാണ് ആദ്യദൗത്യം. ഇവിടെ ആറു സ്‌പോര്‍ട്‌സ് കോംപ്ലക്‌സുകള്‍ നിര്‍മിക്കും.

ഇന്ത്യയില്‍ ഒളിമ്പിക്‌സ് ലഭിച്ചാല്‍ അത് അഹമ്മദാബാദായിരിക്കും എന്ന് ഉറപ്പാണ്. ഇതിനിടെയാണ് ബിജെപിയുടെ തിരുവനന്തപുരത്തെ വാഗ്ദാനവും. ബിജെപി ഇത്തവണ തിരുവനന്തപുരം കോര്‍പ്പറേഷന്‍ ഭരണം പിടിക്കാന്‍ തീവ്രശ്രമമാണ് നടത്തുന്നത്. ഭരണം പിടിക്കാന്‍ വേണ്ടി എന്തെങ്കിലും വായില്‍ വരുന്നത് കോതയ്ക്ക് പാട്ട് എന്ന് പറയുന്നതാണ് പ്രകടന പത്രിക എന്ന ആക്ഷേപമാണ് എല്‍ഡിഎഫും യുഡിഎഫും ആക്ഷേപിക്കുന്നത്.

ബിജെപിപ്രകടന പത്രികതിരുവനന്തപുരം കോര്‍പ്പറേഷന്‍ഭരണം

മറുനാടൻ മലയാളി ബ്യൂറോ