ട്രാക്കിലൂടെ സാധാരണ വേഗതയിലെത്തിയ ട്രെയിൻ; മുൻപിലെ ഒരാളുടെ കൈവീശലിൽ ഒന്ന് ചവിട്ടി; കണ്ണിന് തീരെ കാഴ്ചയില്ല; ദേഹത്ത് മുറിവുകൾ പറ്റി ആകെ ദയനീയാവസ്ഥ; ഒടുവിൽ ചുരുളിക്കൊമ്പനെ ഉൾക്കാട്ടിലേക്ക് തുരുത്തിയത് ഇങ്ങനെ
പാലക്കാട്: കാഴ്ചശക്തി കുറഞ്ഞ ഒറ്റയാനയായ ചുരുളിക്കൊമ്പൻ (പി.ടി.-5) കഞ്ചിക്കോട് ജനവാസമേഖലയിലും റെയിൽവേ ട്രാക്കിലുമെത്തിയതിനെ തുടർന്ന് പാലക്കാട്-കോയമ്പത്തൂർ മെമു ട്രെയിൻ സർവീസ് 10 മിനിറ്റ് നിർത്തിവെച്ചു. ആനയെ പടക്കം പൊട്ടിച്ച് വനംവകുപ്പ് ഉദ്യോഗസ്ഥർ ഉൾക്കാട്ടിലേക്ക് തുരത്തി.
കഴിഞ്ഞ ഒരു മാസമായി മലമ്പുഴ കോങ്ങാട്ടുപാടത്ത് നിലയുറപ്പിച്ചിരുന്ന ഒറ്റയാൻ കഴിഞ്ഞ രണ്ട് ദിവസമായി കഞ്ചിക്കോട് ജനവാസ മേഖലയിൽ കറങ്ങുകയായിരുന്നു. ഇന്നലെയാണ് ഇത് പയറ്റുകാടിന് സമീപത്തെ റെയിൽവേ ട്രാക്കിലും ജനവാസമേഖലയിലും എത്തിയത്. ആനയുടെ വരവോടെ പ്രദേശവാസികൾ പരിഭ്രാന്തരായി.
ജനവാസമേഖലയിലേക്ക് കടന്ന ചുരുളിക്കൊമ്പൻ മലമ്പുഴ ബ്ലോക്ക് പഞ്ചായത്തംഗം ജി. പ്രത്യുഷ് കുമാറിന്റെ വീട്ടുപരിസരത്തും എത്തിയിരുന്നു. വനംവകുപ്പിന്റെ നിരന്തരമായ നിരീക്ഷണത്തിലായിരുന്നിട്ടും ആന ജനവാസമേഖലയിലേക്ക് ഇറങ്ങുന്നത് ആശങ്ക വർദ്ധിപ്പിക്കുന്നു. ആനയുടെ ശരീരത്തിൽ മറ്റ് ആനകൾ ആക്രമിച്ചതിന്റെ അടയാളങ്ങളുണ്ടെന്ന് നാട്ടുകാർ പറയുന്നു. രണ്ടാഴ്ച മുൻപ് പി.ടി.-14 എന്ന മറ്റൊരൊറ്റയാൻ പ്രത്യുഷ് കുമാറിന്റെയും ബന്ധുവിന്റെയും വീടുകളിലും പറമ്പുകളിലും കയറി കൃഷി നശിപ്പിച്ചിരുന്നു. കഞ്ചിക്കോട് നിവാസികൾ തുടർച്ചയായി ആനകളുടെ ശല്യം നേരിടുകയാണ്.
കഴിഞ്ഞ ഓഗസ്റ്റ് 8-ന് ചുരുളിക്കൊമ്പന് മയക്കുവെടി വെച്ച് പ്രാഥമിക ചികിത്സ നൽകിയിരുന്നു. എന്നാൽ ഈ ചികിത്സ ഫലം കാണാതായതിനെത്തുടർന്ന് രണ്ടാം ഘട്ട ചികിത്സ നൽകാനുള്ള നടപടികളുമായി വനംവകുപ്പ് മുന്നോട്ട് പോകുകയാണ്. ആനയെ മയക്കുവെടി വെച്ച് പിടികൂടി ധോണിയിലെ ആന ക്യാംപിലേക്ക് കൊണ്ടുപോയി വിശദമായ ചികിത്സ നൽകാനാണ് നീക്കം. ഇതിനായി ആനയെ നിരീക്ഷിച്ചു വരികയാണ്. ഒരു പ്രത്യേക സംഘം റേഡിയോ കോളറിലെ സിഗ്നൽ പരിശോധിച്ച് ആനയുടെ നീക്കങ്ങൾ നിരീക്ഷിച്ചു വരുന്നു. ആനയുടെ നിലവിലെ അവസ്ഥ കൂടുതൽ സങ്കീർണ്ണമാകുന്നതിനു മുൻപ് ചികിത്സ തുടങ്ങാനാണ് വനംവകുപ്പ് ലക്ഷ്യമിടുന്നത്.
വിവിധ വന്യജീവി സംരക്ഷണ സംഘങ്ങളും പരിസ്ഥിതി പ്രവർത്തകരും ചുരുളിക്കൊമ്പന്റെ ഇപ്പോഴത്തെ അവസ്ഥയെക്കുറിച്ച് ആശങ്ക പ്രകടിപ്പിച്ചിട്ടുണ്ട്. കാഴ്ചശക്തി കുറഞ്ഞതിനാൽ ആനയ്ക്ക് സ്വയം സംരക്ഷണം നടത്താൻ ബുദ്ധിമുട്ടുണ്ടെന്നും, ഇത് കൂടുതൽ അപകടങ്ങളിലേക്ക് നയിക്കാമെന്നും അവർ ചൂണ്ടിക്കാണിക്കുന്നു.
പ്രാദേശിക ജനപ്രതിനിധികളും വനംവകുപ്പ് ഉദ്യോഗസ്ഥരുമായി ചേർന്ന് സുരക്ഷാ ക്രമീകരണങ്ങൾ വിലയിരുത്തി വരുന്നു. ചുരുളിക്കൊമ്പനെ സംബന്ധിച്ചുള്ള വിശദമായ റിപ്പോർട്ട് ഉടൻ തന്നെ വനംവകുപ്പ് അധികൃതർക്ക് കൈമാറുമെന്ന് നിരീക്ഷണ സമിതി അറിയിച്ചു. കഴിഞ്ഞ ദിവസം ചുരുളിക്കൊമ്പനെ പി.ടി. 14 എന്ന ആന ആക്രമിച്ചു മുറിവേൽപ്പിച്ചിരുന്നു. ഇതിനെ തുടർന്നാണ് വനംവകുപ്പ് അടിയന്തര നടപടികൾക്ക് ഒരുങ്ങുന്നത്.
