ചെന്നൈ: 'ഡിറ്റ് വാ' ചുഴലിക്കാറ്റ് ഇന്ത്യൻ തീരത്തേക്ക് അതിവേഗം അടുത്തുകൊണ്ടിരിക്കുകയാണ്. നിലവിൽ നാഗപ്പട്ടണം വേദാരണ്യത്തിൽ നിന്ന് ഏകദേശം 80 കിലോമീറ്റർ അകലെയാണ് ചുഴലിക്കാറ്റിന്റെ സ്ഥാനം. ഇന്ന് പുലർച്ചെയോടെ ഇത് വടക്കൻ തമിഴ്നാട് തീരത്തേക്ക് എത്തുമെന്നാണ് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകുന്നത്. മണിക്കൂറിൽ 80 കിലോമീറ്റർ വരെ വേഗതയിലുള്ള കാറ്റിനാണ് സാധ്യത. ചുഴലിക്കാറ്റിന്റെ സ്വാധീനഫലമായി തമിഴ്നാട് തീരത്തും പുതുച്ചേരിയിലും ശക്തമായ മഴയും കാറ്റും തുടരുകയാണ്.

ചുഴലിക്കാറ്റ് ശക്തമാകുന്ന സാഹചര്യത്തിൽ സുരക്ഷാ മുൻകരുതലുകളുടെ ഭാഗമായി പുതുച്ചേരിയിലും തമിഴ്നാട്ടിലെ അഞ്ച് ജില്ലകളിലും റെഡ് അലർട്ട് പ്രഖ്യാപിച്ചിട്ടുണ്ട്. കൂടാതെ ചെന്നൈ അടക്കം 13 ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ടും നൽകിയിട്ടുണ്ട്. തിങ്കളാഴ്ച വരെ തമിഴ്നാട്, ആന്ധ്രാ തീരങ്ങളിൽ ശക്തമായ മഴ തുടരും.

ദുരന്തത്തെ നേരിടാനായി തമിഴ്നാട് സർക്കാർ വിപുലമായ തയ്യാറെടുപ്പുകളാണ് നടത്തിയിട്ടുള്ളത്. സംസ്ഥാനത്തുടനീളം 6,000 ദുരിതാശ്വാസ ക്യാമ്പുകൾ തുറന്നതായി റവന്യൂ മന്ത്രി അറിയിച്ചു. വിവിധ ജില്ലകളിലായി ദേശീയ ദുരന്ത നിവാരണ സേനയുടെയും (NDRF) സംസ്ഥാന ദുരന്ത പ്രതികരണ സേനയുടെയും (SDRF) സംഘങ്ങളെ വിന്യസിച്ചിട്ടുണ്ട്. തമിഴ്നാട്ടിലെ 14 ജില്ലകളിൽ ഈ സംഘങ്ങൾ എത്തിക്കഴിഞ്ഞു.

കാറ്റിനെ തുടർന്ന് ഡെൽറ്റ ജില്ലകളിലും ശക്തമായ മഴ ലഭിച്ചു തുടങ്ങി. വേദാരണ്യത്ത് മാത്രം 9,000 ഏക്കറിലധികം ഉപ്പുപ്പാടങ്ങൾ വെള്ളത്തിനടിയിലായി. കടലൂർ ജില്ലയിൽ, പ്രളയസാധ്യത കണക്കിലെടുത്ത് 929 ഗർഭിണികളെ സുരക്ഷിത കേന്ദ്രങ്ങളിലേക്ക് മാറ്റിയതായും റിപ്പോർട്ടുകൾ വ്യക്തമാക്കുന്നു. ജനങ്ങൾ ജാഗ്രത പാലിക്കണമെന്ന് സർക്കാർ കർശന നിർദേശം നൽകി.

യാത്രാ തടസ്സങ്ങളും രൂക്ഷമാണ്. ചെന്നൈയിൽ നിന്ന് മാത്രം ഇൻഡിഗോ എയർലൈൻസ് 36 വിമാന സർവീസുകൾ ഉൾപ്പെടെ 54 എടിആർ സർവീസുകൾ റദ്ദാക്കി. രാമേശ്വരത്ത് നിന്നുള്ള ഒരു ട്രെയിൻ പൂർണമായും മറ്റു 11 ട്രെയിനുകൾ ഭാഗികമായും റദ്ദാക്കിയിട്ടുണ്ട്.

ശ്രീലങ്കയിൽ അതീവ ഗുരുതരം

'ഡിറ്റ് വാ' ചുഴലിക്കാറ്റ് ഏറ്റവും കൂടുതൽ കനത്ത നാശനഷ്ടമുണ്ടാക്കിയത് അയൽരാജ്യമായ ശ്രീലങ്കയിലാണ്. സ്ഥിതിഗതികൾ അതീവ ഗുരുതരമായതോടെ ശ്രീലങ്കൻ ഭരണകൂടം രാജ്യത്ത് അടിയന്തരാവസ്ഥ പ്രഖ്യാപിച്ചിരിക്കുകയാണ്. ചുഴലിക്കാറ്റ് ദുരന്തത്തിൽ മരണസംഖ്യ നൂറ് കടന്നതായാണ് റിപ്പോർട്ടുകൾ സൂചിപ്പിക്കുന്നത്.

കൊളംബോ നഗരം നിലവിൽ പ്രളയഭീഷണിയിലാണ്. കെലനി നദിയിലെ ജലനിരപ്പ് ഉയർന്നതാണ് നഗരവാസികൾക്ക് ആശങ്കയുണ്ടാക്കുന്നത്. ചുഴലിക്കാറ്റ് 700-ൽ അധികം വീടുകൾ തകർത്തു. ദുരന്തത്തിന്റെ പശ്ചാത്തലത്തിൽ ശ്രീലങ്കയിൽ ഡിസംബർ 16 വരെ സ്കൂളുകൾ അടച്ചിടാൻ ഉത്തരവിട്ടു. കൊളംബോ തുറമുഖം താത്കാലികമായി അടച്ചിരിക്കുകയാണ്.

ദുരിതാശ്വാസ പ്രവർത്തനങ്ങളിൽ ലങ്കൻ ക്രിക്കറ്റ് ടീം നായകൻ അസലങ്കയും സഹതാരങ്ങളും പങ്കുചേർന്നത് വലിയ ശ്രദ്ധ നേടി. ദുരന്തസമയത്ത് രക്ഷാപ്രവർത്തനത്തിന് സഹായം നൽകിയ ഇന്ത്യക്ക് ശ്രീലങ്കൻ സർക്കാരും പ്രതിപക്ഷ പാർട്ടികളും നന്ദി രേഖപ്പെടുത്തി.

'ഡിറ്റ് വാ' ചുഴലിക്കാറ്റ്അതീവ ജാഗ്രതതമിഴ്നാട് തീരം

മറുനാടൻ മലയാളി ബ്യൂറോ