കാര്യം കാണാന് എന്ത്..പൊട്ടത്തരവും പറയും; എന്നെ വിശ്വസിക്കാന് കൊള്ളത്തില്ല എന്നൊക്കെ പറഞ്ഞിട്ടുണ്ട്; പക്ഷെ എനിക്ക് ഒരു ഫീലീംഗും ഇല്ല; ഗണേശന്റെ വിശ്വാസം അതാണെങ്കില് അത് ചോദ്യം ചെയ്യാനുള്ള അവകാശം എനിക്കില്ല; അത് ആര് പറഞ്ഞാലും ശരി; ഒടുവിൽ ഉരുളയ്ക്ക് ഉപ്പേരി പോലെ മറുപടിയുമായി ജഗദീഷ്
തിരുവനന്തപുരം: നടൻ ഗണേഷ് കുമാർ തന്നെ 'വിശ്വസിക്കാൻ കൊള്ളാത്തവൻ' എന്ന് വിളിച്ചതിൽ തനിക്ക് യാതൊരു വിഷമവുമില്ലെന്ന് നടൻ ജഗദീഷ് വ്യക്തമാക്കി. ഗണേഷ് കുമാറിന്റെ ഈ വിശ്വാസത്തെ ചോദ്യം ചെയ്യാനോ തിരുത്താനോ താനില്ലെന്നും ജഗദീഷ് കൂട്ടിച്ചേർത്തു. സുരേഷ് ഗോപിയുമായും ഗണേഷ് കുമാറുമായും തനിക്കുണ്ടായിരുന്ന സൗഹൃദത്തെയും അവർ തനിക്കെതിരെ നടത്തിയ വിമർശനങ്ങളെയും കുറിച്ചുള്ള ചോദ്യങ്ങളോട് നൽകിയ അഭിമുഖത്തിലാണ് ജഗദീഷ് പ്രതികരിച്ചത്. തന്റെ പുതിയ ചിത്രമായ 'സുഖമാണോ സുഖമാണ്' എന്ന സിനിമയുടെ പ്രചാരണ പരിപാടികളുമായി ബന്ധപ്പെട്ട് സംസാരിക്കുകയായിരുന്നു അദ്ദേഹം.
ഗണേഷ് കുമാറും സുരേഷ് ഗോപിയും തമ്മിൽ അടുത്ത കാലത്തുണ്ടായ വാക്പോരുകൾ തന്നെ വിഷമിപ്പിക്കാറില്ലെന്നും ജഗദീഷ് പറഞ്ഞു. തന്നെക്കുറിച്ച് ഗണേഷ് കുമാർ മുമ്പ് നടത്തിയ ചില പരാമർശങ്ങൾ അദ്ദേഹം ഓർത്തെടുത്തു. "ജഗദീഷ് കള്ളനാണ്, തരംപോലെ അഭിപ്രായങ്ങൾ മാറ്റിപ്പറയുന്ന ആളാണ്, കാര്യം കാണാൻ എന്ത് വിഡ്ഢിത്തവും പറയും, എന്ത് കൊള്ളരുതായ്മയും ചെയ്യും, ജഗദീഷിനെ വിശ്വസിക്കാൻ കൊള്ളത്തില്ല" എന്നെല്ലാമാണ് ഗണേഷ് കുമാർ തനിക്കെതിരെ പറഞ്ഞിട്ടുള്ളതെന്നും എന്നാൽ അതിൽ തനിക്ക് യാതൊരു വിഷമവുമില്ലെന്നും ജഗദീഷ് കൂട്ടിച്ചേർത്തു.
ഗണേഷ് കുമാർ തനിക്കൊപ്പമുണ്ടായിരുന്ന സമയത്തും ഇത് പറഞ്ഞിരുന്നതായും, എന്നിട്ടും 'എന്നെക്കുറിച്ച് ഗണേഷ് അങ്ങനെ പറഞ്ഞല്ലോ' എന്ന് തനിക്ക് തോന്നിയിട്ടില്ലെന്നും അദ്ദേഹം വ്യക്തമാക്കി.
സുരേഷ് ഗോപിയും തന്നെക്കുറിച്ച് നല്ലതും ഇഷ്ടപ്പെടാത്തതുമായ കാര്യങ്ങൾ പറഞ്ഞിട്ടുണ്ടെന്ന് ജഗദീഷ് സൂചിപ്പിച്ചു. "അണ്ണാ, നിങ്ങൾ ചെയ്യുന്നത് ശരിയല്ല, ആ നിലപാട് എനിക്ക് യോജിപ്പില്ല. 'അമ്മ'യുടെ പല നിലപാടുകളും എനിക്ക് എതിരായിരുന്നു, അതിൽ നിങ്ങൾക്കും ഉത്തരവാദിത്തമുണ്ട്" എന്ന് സുരേഷ് ഗോപി തന്നോട് പറഞ്ഞിട്ടുണ്ടെന്നും, എന്നാൽ അതിൽ തനിക്ക് വിഷമം തോന്നിയിട്ടില്ലെന്നും ജഗദീഷ് പറഞ്ഞു.
രാഷ്ട്രീയപരമായ സമ്മർദ്ദങ്ങളിൽ സഹപ്രവർത്തകർ അങ്ങോട്ടുമിങ്ങോട്ടും പറയുന്ന കാര്യങ്ങളെ അമിത ഗൗരവത്തോടെ കാണേണ്ടതില്ലെന്ന നിലപാടാണ് ജഗദീഷ് പങ്കുവെച്ചത്.
