ഇനി അവൾ കേരളത്തിന്റെ മരുമകൾ!! പ്രണയം വീട്ടിലറിഞ്ഞതോടെ അച്ഛനെ പേടിച്ച് വീടുവിട്ടിറങ്ങിയ കുംഭമേള സുന്ദരി വിവാഹിതയായി; മൊണാലിസയുടെ കഴുത്തിൽ താലികെട്ടി മുഹമ്മദ് ഫർമാൻ; കല്യാണ ചടങ്ങുകൾ നടന്നത് പൂവാർ അരുമാനൂർ ക്ഷേത്രത്തിൽ വെച്ച്; ഇനി എന്നും സ്നേഹത്തണലായി കൂടെ അവൻ; ആ അപൂർവ നിമിഷത്തിന് സാക്ഷികളായി പാർട്ടി നേതാക്കളും

തിരുവനന്തപുരം: സോഷ്യൽ മീഡിയയിൽ കുംഭമേളയിലെ ചിത്രത്തിലൂടെ ലോകശ്രദ്ധയാകർഷിച്ച മൊണാലിസ ഭോസ്ലെയും കാമുകൻ മുഹമ്മദ് ഫർമാനും വിവാഹിതരായി. തങ്ങളുടെ പ്രണയത്തിന് ജന്മനാട്ടിൽ നിന്നും വീട്ടുകാരിൽ നിന്നും കടുത്ത എതിർപ്പുകൾ നേരിട്ടപ്പോൾ, സുരക്ഷിതമായ ഇടമെന്ന നിലയിൽ ഇവർ തിരഞ്ഞെടുത്തത് കേരളത്തെയാണ്. തിരുവനന്തപുരം അരുമാനൂർ നയിനാർ ശ്രീനാരായണ ഗുരു ക്ഷേത്രത്തിൽ വെച്ച് നടന്ന ചടങ്ങിൽ പ്രമുഖ രാഷ്ട്രീയ നേതാക്കളുടെ സാന്നിധ്യത്തിലാണ് ഇരുവരും മാല ചാർത്തിയത്.

മധ്യപ്രദേശിലെ ഇൻഡോർ സ്വദേശിനിയായ മൊണാലിസയും മഹാരാഷ്ട്ര സ്വദേശിയായ ഫർമാൻ ഖാനും ഒന്നര വർഷത്തോളമായി പ്രണയത്തിലായിരുന്നു. ഫേസ്ബുക്ക് വഴിയുള്ള സൗഹൃദമാണ് പിന്നീട് വലിയ പ്രണയമായി മാറിയത്. എന്നാൽ വ്യത്യസ്ത മതവിഭാഗങ്ങളിൽപ്പെട്ട ഇവരുടെ ബന്ധത്തെ വീട്ടുകാർ ശക്തമായി എതിർത്തു. മൊണാലിസയുടെ വിവാഹം മറ്റൊരാളുമായി വീട്ടുകാർ ഉറപ്പിക്കുകയും ചെയ്തു.

മറ്റ് സംസ്ഥാനങ്ങളിൽ തങ്ങളുടെ പ്രണയത്തിന് സംരക്ഷണം ലഭിക്കില്ലെന്ന് ഭയന്നാണ് ഇവർ കേരളത്തിലേക്ക് വരാൻ തീരുമാനിച്ചത്. പൂവാറിൽ ഒരു സിനിമയുടെ ചിത്രീകരണത്തിന് എത്തിയ സമയത്താണ് മൊണാലിസ തന്റെ കാമുകനൊപ്പം തിരുവനന്തപുരം തമ്പാനൂർ പോലീസ് സ്റ്റേഷനിൽ അഭയം തേടിയത്. സ്വന്തം ഇഷ്ടപ്രകാരം ഫർമാനോടൊപ്പം ജീവിക്കാൻ ആഗ്രഹിക്കുന്നുവെന്ന് അവർ പോലീസിനെ അറിയിച്ചു.

ശ്രീനാരായണ ഗുരുവിന്റെ ദർശനങ്ങളിൽ നിന്ന് പ്രചോദനം ഉൾക്കൊണ്ടാണ് വിവാഹത്തിനായി അരുമാനൂർ നയിനാർ ക്ഷേത്രം തിരഞ്ഞെടുത്തത്. "മതമേതായാലും മനുഷ്യൻ നന്നായാൽ മതി" എന്ന ഗുരുവിന്റെ സന്ദേശം മുറുകെ പിടിച്ചാണ് തങ്ങൾ പുതിയ ജീവിതം തുടങ്ങുന്നതെന്ന് ദമ്പതികൾ പറഞ്ഞു.

വിവാഹച്ചടങ്ങിൽ രാഷ്ട്രീയ സാമൂഹിക രംഗത്തെ പ്രമുഖർ പങ്കെടുത്തത് വാർത്തയ്ക്ക് വലിയ പ്രാധാന്യം നൽകി. വിദ്യാഭ്യാസ മന്ത്രി വി. ശിവൻകുട്ടി സിപിഎം സംസ്ഥാന സെക്രട്ടറി എം.വി. ഗോവിന്ദൻ എ.എ. റഹീം എംപി തുടങ്ങിയവർ വിവാഹത്തിൽ പങ്കെടുത്തു. വിവിധ മതങ്ങളുടെ സത്ത മനുഷ്യത്വമാണെന്നും ആ മനുഷ്യത്വത്തിന് വലിയ വില നൽകുന്ന കേരളത്തിന്റെ നിലപാടാണ് ഈ വിവാഹത്തിലൂടെ വ്യക്തമാകുന്നതെന്നും എം.വി. ഗോവിന്ദൻ ചടങ്ങിൽ സംസാരിക്കവെ പറഞ്ഞു.

തങ്ങളുടെ പ്രണയത്തിന് ഏറ്റവും സുരക്ഷിതമായ ഇടം കേരളമാണെന്ന ദമ്പതികളുടെ സാക്ഷ്യം ദേശീയ തലത്തിൽ ശ്രദ്ധിക്കപ്പെടുന്ന ഒന്നാണ്. മതപരമായ വേർതിരിവുകൾക്ക് അപ്പുറം വ്യക്തിസ്വാതന്ത്ര്യത്തിന് കേരളം നൽകുന്ന പ്രാധാന്യമാണ് ഇവരെ ഇങ്ങോട്ടേക്ക് ആകർഷിച്ചത്.

കുംഭമേളയിലെ വശ്യമായ ചിരിയിലൂടെ ലക്ഷക്കണക്കിന് ആളുകളുടെ മനം കവർന്ന മൊണാലിസ, ഇപ്പോൾ തന്റെ ജീവിതത്തിലെ ഏറ്റവും വലിയ പോരാട്ടം ജയിച്ച് ഫർമാനൊപ്പം പുതിയൊരു ജീവിതം ആരംഭിക്കുകയാണ്. വിവാഹത്തിന് ശേഷം കേരളം നൽകിയ സ്നേഹത്തിനും സുരക്ഷയ്ക്കും ഇരുവരും നന്ദി അറിയിച്ചു.