'അമ്മയ്ക്ക് സുഖമില്ല ശ്രീക്കുട്ടാ എന്ന് ലാലു ഇന്നലെയും പറഞ്ഞു; കാണാന് ചെല്ലാനിരിക്കെ വിയോഗം': വിങ്ങിപ്പൊട്ടി എം.ജി ശ്രീകുമാര്; ലാലിന് അമ്മ വെറുമൊരു വാക്കല്ല, സര്വ്വസ്വവും ആയിരുന്നു എന്നും പ്രിയ സുഹൃത്ത്
വിങ്ങിപ്പൊട്ടി എം.ജി ശ്രീകുമാര്
കൊച്ചി: മോഹന്ലാലിന്റെ അമ്മയുടെ വിയോഗത്തില് വിങ്ങലടക്കാനാവാതെ അടുത്ത സുഹൃത്തും ഗായകനുമായ എം.ജി ശ്രീകുമാര്. മോഹന്ലാലിന് അമ്മ വെറുമൊരു വാക്കല്ലെന്നും അദ്ദേഹത്തിന്റെ ലോകം തന്നെയായിരുന്നു അമ്മയെന്നും ശ്രീകുമാര് അനുസ്മരിച്ചു. ഇന്നലെ വിളിച്ചപ്പോഴും 'അമ്മയ്ക്ക് തീരെ സുഖമില്ല ശ്രീക്കുട്ടാ' എന്ന് മോഹന്ലാല് സങ്കടത്തോടെ പറഞ്ഞിരുന്നതായും ഇന്ന് കാണാന് ചെല്ലാനിരിക്കെയാണ് മരണവാര്ത്ത തേടിയെത്തിയതെന്നും അദ്ദേഹം പറഞ്ഞു.
കുട്ടിക്കാലത്തെ മധുരപലഹാരങ്ങളും ആ കൈപ്പുണ്യവും
തന്റെ ഔദ്യോഗിക ജീവിതത്തിനപ്പുറം മോഹന്ലാലുമായുള്ള ദശകങ്ങള് നീണ്ട കുടുംബബന്ധത്തെക്കുറിച്ച് എം.ജി ശ്രീകുമാര് വികാരാധീനനായി. 'എനിക്ക് കുട്ടിക്കാലം മുതലേ അറിയുന്നതാണ് അമ്മയെ. ഞങ്ങളൊക്കെ ഒരുമിച്ചാണ് കളിച്ച് വളര്ന്നത്. ആ കൈകൊണ്ട് തന്ന ആഹാരം എത്രയോ തവണ കഴിച്ചിട്ടുണ്ട്. സ്കൂളില് നിന്ന് കളി കഴിഞ്ഞ് വരുമ്പോള് മധുരപലഹാരങ്ങളുമായി അമ്മ കാത്തുനില്ക്കാറുണ്ടായിരുന്നു. ലാലിനെപ്പോലെ തന്നെയാണ് അമ്മ ഞങ്ങളെയും കണ്ടത്. എന്റെ സ്വന്തം അമ്മയെപ്പോലെയായിരുന്നു എനിക്കും ശാന്തമ്മ,' ശ്രീകുമാര് ഓര്മ്മകള് പങ്കുവെച്ചു.
ലാലുവിന്റെ ലോകം
അമ്മയുടെ അസുഖം കൂടിയതിനാലാണ് മോഹന്ലാല് കഴിഞ്ഞ കുറച്ചു ദിവസങ്ങളായി കൊച്ചിയില് തന്നെ തുടര്ന്നത്. തിരക്കുകള്ക്കിടയിലും അമ്മയുടെ തണലിലേക്ക് ഓടിയെത്തുന്ന മകനായിരുന്നു ലാലു എന്ന് ശ്രീകുമാര് സാക്ഷ്യപ്പെടുത്തുന്നു. ഏറ്റവും ഒടുവില് രണ്ട് മാസം മുമ്പാണ് അമ്മയെ കണ്ടതെന്നും ആ വേര്പാട് തനിക്ക് വ്യക്തിപരമായി വലിയ നഷ്ടമാണെന്നും അദ്ദേഹം കൂട്ടിച്ചേര്ത്തു.
അന്ത്യം കൊച്ചിയിലെ വസതിയില്
കൊച്ചി എളമക്കരയിലെ വസതിയില് വെച്ചായിരുന്നു ശാന്തകുമാരി (86) അന്തരിച്ചത്. ദീര്ഘകാലമായി പക്ഷാഘാതത്തെ തുടര്ന്ന് ചികിത്സയിലായിരുന്നു. പരേതനായ വിശ്വനാഥന് നായരാണ് ഭര്ത്താവ്. പരേതനായ പ്യാരേ ലാല് മറ്റൊരു മകനാണ്. അമ്മയുടെ വേര്പാടില് സിനിമാ-സാംസ്കാരിക രംഗത്തെ നിരവധി പ്രമുഖര് അനുശോചനം രേഖപ്പെടുത്തി. സംസ്കാരം നാളെ നടക്കും.
