ആകാശത്ത് വിമാനം അതിന്റെ ഏറ്റവും വേഗതയിൽ സഞ്ചരിക്കുന്നതിനിടെ ക്യാബിൻ ക്രൂവിന്റെ അനൗൺസ്മെന്റ്; സാധാരണനില തെറ്റി ബുദ്ധിമുട്ടിലായ സ്ത്രീയെ കണ്ട് പരിഭ്രാന്തിയിലായി യാത്രക്കാർ; ഒന്ന് ശ്വാസമെടുക്കാൻ കൂടി കഴിയാത്ത അവസ്ഥ; എല്ലാവരും പകച്ചു നിൽക്കവേ..നമ്മുടെ സ്വന്തം മലപ്പുറക്കാരന്റെ വരവിൽ ആശ്വാസം; കൂടെ ആ നാട്ടിലെ അത്യപൂർവ ബഹുമതിയും
മലപ്പുറം: തിരൂർ പുറത്തൂർ സ്വദേശിയായ ഒരു യുവ മെഡിക്കൽ വിദ്യാർത്ഥി വിമാനയാത്രക്കിടെ സമയോചിതമായ ഇടപെടലിലൂടെ ഉസ്ബെക്കിസ്ഥാന് വനിതയുടെ ജീവൻ രക്ഷിച്ചു. ഈ ധീരമായ പ്രവർത്തിയെ മാനിച്ച് അദ്ദേഹത്തിന് 'ഹീറോ ഓഫ് ഉസ്ബെക്കിസ്ഥാൻ' എന്ന അത്യപൂർവ ബഹുമതി നൽകി രാജ്യം ആദരിച്ചു. താഷ്കന്റ് മെഡിക്കൽ യൂണിവേഴ്സിറ്റിയിലെ അവസാന വർഷ വിദ്യാർത്ഥിയായ അനീസ് മുഹമ്മദാണ് രാജ്യത്തിന് തന്നെ അഭിമാനമായ ഈ നേട്ടം കൈവരിച്ചത്.
കഴിഞ്ഞ നാല് മാസങ്ങൾക്ക് മുമ്പാണ് ലോകശ്രദ്ധ നേടിയ ഈ സംഭവം നടന്നത്. ഉസ്ബെക്കിസ്ഥാന് തലസ്ഥാനമായ താഷ്കന്റിൽ നിന്നും ഡൽഹിയിലേക്കുള്ള വിമാനയാത്രക്കിടെയായിരുന്നു നാടകീയ രംഗങ്ങൾ. ഹൃദയസംബന്ധമായ അസുഖങ്ങളുള്ള ഒരു ഉസ്ബെക്കിസ്ഥാൻ വനിതയ്ക്ക് യാത്രാമധ്യേ വിമാനത്തിനുള്ളിൽ വെച്ച് കടുത്ത ദേഹാസ്വാസ്ഥ്യം അനുഭവപ്പെടുകയായിരുന്നു.
സാധാരണനില തെറ്റി രോഗി കടുത്ത ബുദ്ധിമുട്ടിലായതോടെ, എയർലൈൻ ജീവനക്കാർ യാത്രക്കാരിൽ ആരെങ്കിലും ഡോക്ടർമാരോ ആരോഗ്യ വിദഗ്ദ്ധരോ ഉണ്ടോ എന്ന് അന്വേഷിച്ച് അടിയന്തര സഹായം തേടി അനൗൺസ്മെന്റ് നടത്തി. ഈ സമയം വിമാനത്തിലുണ്ടായിരുന്ന അനീസ് മുഹമ്മദ് ഒരു നിമിഷം പോലും വൈകാതെ മുന്നോട്ട് വരികയായിരുന്നു.
മെഡിക്കൽ വിദ്യാർത്ഥിയായ അനീസ്, തന്റെ അറിവും പരിശീലനവും ഉപയോഗിച്ച് ഉടൻ തന്നെ രോഗിയെ പരിശോധിച്ചു. യാത്രക്കാരിയുടെ നില ഗുരുതരമാണെന്ന് മനസ്സിലാക്കിയ അദ്ദേഹം, വിമാനത്തിലെ പരിമിതമായ സൗകര്യങ്ങൾ ഉപയോഗിച്ച് പ്രാഥമിക ചികിത്സകൾ നൽകി. കൃത്യമായ മരുന്നുകൾ നൽകാനും ശരിയായ പൊസിഷനിൽ കിടത്താനും ഓക്സിജൻ നൽകാനും അദ്ദേഹം നിർദ്ദേശം നൽകി. അദ്ദേഹത്തിന്റെ ഇടപെടലുകൾ ഫലിച്ചു, ഏതാനും സമയത്തിനുള്ളിൽ തന്നെ വനിതയുടെ ആരോഗ്യനില മെച്ചപ്പെട്ടു. സമയം പാഴാക്കാതെയുള്ള അനീസിന്റെ ഇടപെടലാണ് ആ വനിതയുടെ ജീവൻ രക്ഷിക്കാൻ നിർണായകമായത് എന്ന് എയർലൈൻ അധികൃതരും മറ്റ് യാത്രക്കാരും സാക്ഷ്യപ്പെടുത്തി.
വിമാനം ഡൽഹിയിൽ ഇറങ്ങിയ ശേഷം വിദഗ്ദ്ധ ചികിത്സയ്ക്കായി ഇവരെ വിമാനത്താവളത്തിൽ നിന്ന് തന്നെ ആശുപത്രിയിലേക്ക് മാറ്റി.
ഈ സംഭവത്തെക്കുറിച്ച് അറിഞ്ഞ ഉസ്ബെക്കിസ്ഥാന് സർക്കാർ അനീസ് മുഹമ്മദിന്റെ ധീരമായ മനുഷ്യസ്നേഹപരമായ പ്രവർത്തിയെ ആദരിക്കാൻ തീരുമാനിക്കുകയായിരുന്നു. ഉസ്ബെക്കിസ്ഥാനിലെ ഒരു അർദ്ധ സർക്കാർ സ്ഥാപനമായ യുക്കാലിഷ് മൂവ്മെന്റ് ആണ് അനീസിന് ഔദ്യോഗികമായി ബഹുമതി നൽകി ആദരിച്ചത്. 'ഹീറോ ഓഫ് ഉസ്ബെക്കിസ്ഥാൻ' എന്ന ബഹുമതി ലഭിച്ചത് അനീസിനും കുടുംബത്തിനും താഷ്കന്റ് മെഡിക്കൽ യൂണിവേഴ്സിറ്റിയിലെ സഹപാഠികൾക്കും സഹപ്രവർത്തകർക്കും വലിയ സന്തോഷമായി.
അനീസ് മുഹമ്മദ് നിലവിൽ യു.എ.ഇയിൽ പ്രവാസിയായ പാടശ്ശേരി ഹുസൈൻ, റഹ്മത്ത് ദമ്പതികളുടെ മകനാണ്. ഒരു മെഡിക്കൽ വിദ്യാർത്ഥി എന്ന നിലയിൽ അറിവ് പ്രയോഗിച്ച്, അന്യനാട്ടുകാരിയായ ഒരു സ്ത്രീയുടെ ജീവൻ രക്ഷിച്ച അനീസിന്റെ ഈ പ്രവർത്തി, മനുഷ്യബന്ധങ്ങളുടെയും സഹായമനസ്കതയുടെയും മഹത്തായ ഉദാഹരണമായി മാറുകയാണ്.
കേരളത്തിൽ നിന്നും ഉസ്ബെക്കിസ്ഥാനിലെത്തി വിദ്യാഭ്യാസം നേടുന്ന ഒരു യുവ മലയാളി വിദ്യാർത്ഥിക്ക് ലഭിച്ച ഈ ആഗോള അംഗീകാരം മലപ്പുറം ജില്ലയ്ക്കും കേരളത്തിനും അഭിമാനമായി മാറി. ഉസ്ബെക്കിസ്ഥാന് പൗരന്മാരും മാധ്യമങ്ങളും അനീസിനെ അഭിനന്ദനങ്ങൾ കൊണ്ട് മൂടി.
