രാത്രി വൈകി ഗൃഹപ്രവേശനത്തില്‍ പങ്കെടുത്ത് വീട്ടിലേക്ക് മടങ്ങിയവര്‍; അമിത വേഗതയില്‍ വന്ന റോയല്‍ എന്‍ഫീല്‍ഡ് ഹിമാലയ ബുള്ളറ്റ് ബൈക്ക് വിജയനേയും രതീഷിനേയും ഇടിച്ചിട്ടു; മാതമംഗലത്തെ നടുക്കി വാഹനാപകടം; മരിച്ച രണ്ടു പേരും കാല്‍നടയാത്രക്കാര്‍
കണ്ണൂര്‍: ഇരട്ട മരണത്തില്‍ നടുങ്ങി മാതമംഗലം ഗ്രാമം. റോഡരികിലൂടെ നടന്നുപോകവെ ബൈക്കിടിച്ച് മാതമംഗലത്ത് രണ്ടുപേര്‍ കൊല്ലപ്പെട്ടത് നാട്ടുകാരെ ഞെട്ടിച്ചിരിക്കുകയാണ്. റോയല്‍ എന്‍ഫീല്‍ഡ് ഹിമാലയ ബുള്ളറ്റ് ബൈക്ക് ഓടിച്ച യുവാവിനും ഗുരുതരപരുക്കേറ്റിട്ടുണ്ട്. ഇയാള്‍ പരിയാരത്തെ കണ്ണൂര്‍ മെഡിക്കല്‍ കോളേജാശുപത്രിയില്‍ അതിതീവ്ര പരിചരണ വിഭാഗത്തില്‍ ചികിത്സയിലാണ്.
എരമം-കടേക്കര മേച്ചറപാടി അംഗന്‍വാടിക്ക് സമീപം ഇന്നലെ രാത്രി 11.45 നാണ് അപകടം. എരമം ഉള്ളൂരിലെ പരേതരായ പുഞ്ഞുംപിടുക്ക ചന്തുക്കുട്ടി-മാവില മൂര്‍ക്കന്‍ വീട്ടില്‍ നാരായണി എന്നിവരുടെ മകന്‍ എം.എം.വിജയന്‍(50), പുഞ്ഞുംപിടുക്ക രാഘവന്‍-പി.കെ.പത്മാക്ഷി ദമ്പതികളുടെ മകന്‍ രതീഷ്(40) എന്നിവരാണ് മരിച്ചത്. ബുള്ളറ്റ് ബൈക്കോടിച്ച ശ്രീദുലിനെ(27) പരിക്കുകളോടെ പരിയാരത്തെ കണ്ണൂര്‍ ഗവ.മെഡിക്കല്‍ പ്രവേശിപ്പിച്ചു.
ഇന്നലെ രാത്രി ഏറെ വൈകി ഗൃഹപ്രവേശന ചടങ്ങില്‍ പങ്കെടുത്ത് തിരികെ വീട്ടിലേക്ക് നടന്നുപോകുകയായിരുന്നു ഇരുവരും. അമിത വേഗതയില്‍ വന്ന ബൈക്ക് റോഡരികിലുടെ നടന്നു പോവുകയായിരുന്ന ഇരുവരെയും ഇടിച്ചു തെറിപ്പിച്ചെന്നാണ് പൊലിസ് നല്‍കുന്ന പ്രാഥമിക വിവരം. റോഡില്‍ വീണു കിടന്ന മൂന്ന് പേരെയും നാട്ടുകാരാണ് പരിയാരത്തെ കണ്ണൂര്‍ മെഡിക്കല്‍ കോളേജോശുപത്രിയില്‍ എത്തിച്ചത്. വഴി യാത്രക്കാരായ രണ്ടു പേര്‍ അതിതീവ്ര പരിചരണ വിഭാഗത്തില്‍ ചികിത്സയിലിരിക്കെ ഇന്ന് പുലര്‍ച്ചെ മരിച്ചു.
നിഷയാണ് വിജയന്റെ ഭാര്യ. ഷമ്മിക്, സോംനാഥ് എന്നിവരാണ് 'മക്കള്‍. ഏകസഹോദരന്‍: എം.എം.രാജന്‍(വിമുക്തഭടന്‍).രതീഷ് അവിവാഹിതനാണ്. സഹോദരങ്ങല്‍ ബിന്ദു, സിന്ധു. രണ്ടുപേരും നാടന്‍ പണിക്കാരാണ് മൃതദേഹങ്ങള്‍ പരിയാരത്തെ കണ്ണൂര്‍ മെഡിക്കല്‍ കോളേജാശുപത്രി മോര്‍ച്ചറിയിലേക്ക് മാറ്റി. സംഭവത്തില്‍ പരിയാരം പൊലിസ് അസ്വാഭാവികമരണത്തിന് കേസെടുത്ത് അന്വേഷണമാരംഭിച്ചിട്ടുണ്ട്.
തിരുവോണം പ്രമാണിച്ച് നാളെ (5.09.2025) ഓഫീസിന് അവധി ആയതിനാല്‍ മറുനാടന്‍ മലയാളിയില്‍ വാര്‍ത്തകള്‍ അപ്‌ഡേറ്റ് ചെയ്യുന്നതല്ല. പ്രിയ വായനക്കാര്‍ക്ക് ഹൃദയം നിറഞ്ഞ ഓണാശംസകള്‍- എഡിറ്റര്‍.
