കാല്‍വഴുതിയപ്പോള്‍ പിടിച്ചതു വൈദ്യുതിത്തൂണില്‍; ഷോക്കേറ്റ് തൂങ്ങിക്കിടന്നു വിദ്യാര്‍ത്ഥികള്‍; കൂട്ടുകാരെ ഓടി എത്തി രക്ഷിച്ച് മുഹമ്മദ് സിദാന്‍
ഷോക്കേറ്റ് തൂങ്ങിക്കിടന്നു വിദ്യാര്‍ത്ഥികള്‍; ഓടി എത്തി രക്ഷിച്ച് മുഹമ്മദ് സിദാന്‍
അലനല്ലൂര്‍: അഞ്ചാം ക്ലാസുകാരന്‍ മുഹമ്മദ് സിദാന്റെ അവസരോചിത ഇടപെടലില്‍ ജീവന്‍ തിരികെ കിട്ടിയത് രണ്ട് കൂട്ടുകാര്‍ക്ക്. ഷോക്കേറ്റ് തൂങ്ങിക്കിടന്ന സഹപാഠികളാണ് സിദാന്റെ ഇടപെടലില്‍ അത്ഭുതകരമായി രക്ഷപ്പെട്ടത്. കോട്ടോപ്പാടം കല്ലടി അബ്ദു ഹാജി ഹയര്‍ സെക്കന്‍ഡറി സ്‌കൂളിലെ അഞ്ചാം ക്ലാസ് വിദ്യാര്‍ഥിയാണ് മുഹമ്മദ് സിദാന്‍. സിദാനാണു ഷോക്കേറ്റ് തൂങ്ങിക്കിടന്ന സഹപാഠിയെ ഉള്‍പ്പെടെ രക്ഷപ്പെടുത്തിയത്. വിവരം അറിഞ്ഞ വിദ്യാഭ്യാസ മന്ത്രിഉള്‍പ്പെടെയുള്ളവരുടെ അനുമോദനത്തിനു നടുവിലാണ് ഇപ്പോള്‍ സിദാന്‍.
ബുധനാഴ്ച രാവിലെ പരീക്ഷയ്ക്കായി സ്‌കൂളിലേക്കു പോകാന്‍ വീടിനടുത്തുള്ള ബസ് കാത്തിരിപ്പു കേന്ദ്രത്തില്‍ സ്‌കൂള്‍ ബസ് കാത്തുനില്‍ക്കുമ്പോഴാണു സംഭവം. സിദാന്റെ കൂട്ടുകാരന്‍ മുഹമ്മദ് റാജിഹ് പ്ലാസ്റ്റിക് ബോട്ടില്‍ തട്ടിക്കളിക്കുമ്പോള്‍ ബോട്ടില്‍ തൊട്ടടുത്ത പറമ്പിലേക്കു വീണു. ഇത് എടുക്കാനായി മതിലില്‍ കയറി പറമ്പിലേക്ക് ഇറങ്ങുന്നതിനിടെ കാല്‍വഴുതിയപ്പോള്‍ തൊട്ടടുത്തുള്ള വൈദ്യുതിത്തൂണില്‍ കയറി പിടിച്ചു. വെപ്രാളത്തിനിടെ ഫ്യൂസ് കാരിയറിന്റെ ഇടയില്‍ കൈകുടുങ്ങി. കുടുങ്ങിയ കൈ വലിക്കാന്‍ ശ്രമിക്കുന്നതിനിടെ ഷോക്കേറ്റു. താഴേക്കു തൂങ്ങിക്കിടന്നു പിടയുന്നതു കണ്ട് കാലില്‍ പിടിച്ചു വലിക്കാന്‍ ശ്രമിച്ചതോടെ മറ്റൊരു കൂട്ടുകാരന്‍ ഷഹജാസിനും ചെറിയതോതില്‍ ഷോക്കേറ്റു. ഇതോടെയാണ് റാജിഹിനു ഷോക്കേറ്റതാണെന്ന് മനസ്സിലായത്.
ഉടന്‍ തന്നെ മുഹമ്മദ് സിദാന്‍ തൊട്ടടുത്തു കണ്ട ഉണങ്ങിയ കമ്പുകൊണ്ട് റാജിഹിനെ അടിച്ച് താഴെ ഇടുക ആയിരുന്നു. കൈകളിലും മുഖത്തും മറ്റും പൊള്ളലേറ്റ റാജിഹിനെ ഉടന്‍ തൊട്ടടുത്ത ആരോഗ്യ കേന്ദ്രത്തിലും പിന്നീട് മണ്ണാര്‍ക്കാട്ടെ സ്വകാര്യ ആശുപത്രിയിലും എത്തിച്ചു ചികിത്സനല്‍കി. സിദാന്‍ അവസരോചിതമായി ഇടപെട്ടില്ലായിരുന്നുവെങ്കില്‍ മറ്റു രണ്ടു കുട്ടികളും അപകടത്തില്‍പ്പെടുമായിരുന്നു.
കോട്ടോപ്പാടം കൊടുവാളിപ്പുറം കല്ലായത്ത് വീട്ടില്‍ ഉമ്മര്‍ ഫാറൂഖിന്റെയും ഫാത്തിമത്ത് സുഹ്‌റയുടെയും മകനാണു മുഹമ്മദ് സിദാന്‍ (10). വീട്ടില്‍ മുന്‍പ് ഉണ്ടായ അപകടത്തില്‍ നിന്നാണ് ഷോക്കേറ്റാല്‍ ഉണങ്ങിയ വടികൊണ്ട് തട്ടിമാറ്റുന്ന അറിവു ലഭിച്ചതെന്നു സിദാന്‍ പറയുന്നു. കൂട്ടുകാരുടെ ജീവന്‍ രക്ഷിക്കാന്‍ മനഃസാന്നിധ്യത്തോടെ ഇടപെട്ട മുഹമ്മദ് സിദാനെ ഫോണില്‍ വിളിച്ചാണു മന്ത്രി അഭിനന്ദിച്ചത്.
സ്‌കൂളില്‍ നടന്ന ചടങ്ങില്‍ പിടിഎയും സ്റ്റാഫ് കൗണ്‍സിലും അനുമോദിച്ചു. പ്രിന്‍സിപ്പല്‍ എം.പി.സാദിഖ്, പ്രധാനാധ്യാപകന്‍ ശ്രീധരന്‍ പേരേഴി, മാനേജര്‍ കല്ലടി റഷീദ്, പിടിഎ പ്രസിഡന്റ് കെ.ടി.അബ്ദുല്ല, സ്റ്റാഫ് സെക്രട്ടറി പി.ഗിരീഷ്, സീനിയര്‍ അസിസ്റ്റന്റ് കെ.എസ്.മനോജ്, സീനിയര്‍ അധ്യാപകന്‍ പി.മനോജ്, കെ.മൊയ്തുട്ടി തുടങ്ങിയവര്‍ പ്രസംഗിച്ചു. ുഹമ്മദ് സിദാന്‍, ഷോക്കേറ്റു, സുഹൃത്തുക്കള്‍, രക്ഷിച്ചു, muhammod sidan
