ഫ്രാൻസിലെ പള്ളികളിൽ പ്രാർത്ഥിക്കാൻ എത്തിയവരുടെ മൂക്കിൽ തുളച്ചുകയറിയ ദുർഗന്ധം; മുറ്റത്തും പരിസരത്തുമെല്ലാം പരിഭ്രാന്തി പരത്തി രക്തക്കറ; പരിശോധനയിൽ കണ്ടത് വികൃതമായ കുറെ തലകൾ; ദുരൂഹത നിറച്ച് നീല മഷിയിൽ എഴുത്ത്; ഇത് മനഃപൂർവമെന്ന് വിശ്വാസികൾ; പിന്നിൽ മുസ്ലീം വിരുദ്ധതയോ?
പാരീസ്: ഫ്രഞ്ച് തലസ്ഥാനമായ പാരീസിലും സമീപപ്രദേശങ്ങളിലുമായി ഒൻപത് മുസ്ലിം പള്ളികൾക്ക് മുന്നിൽ പന്നിത്തലകൾ കണ്ടെത്തിയ സംഭവത്തിൽ ഫ്രഞ്ച് പൊലീസ് അന്വേഷണം ആരംഭിച്ചു. രാജ്യത്ത് വർദ്ധിച്ചു വരുന്ന മുസ്ലിം വിരുദ്ധ വിദ്വേഷത്തിന്റെ ഭാഗമായാണ് ഈ നിന്ദ്യമായ പ്രവൃത്തി എന്ന നിഗമനത്തിലാണ് പൊലീസ്. കണ്ടെത്തിയ ചില പന്നിത്തലകളിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ കുടുംബപ്പേര് നീല മഷിയിൽ എഴുതിയിരുന്നതായും റിപ്പോർട്ടുകളുണ്ട്.
പാരീസ് നഗരത്തിലെ പൊലീസ് മേധാവി ലോറന്റ് നുനെസ് അറിയിച്ചതനുസരിച്ച്, കണ്ടെത്തിയ ഒൻപത് പന്നിത്തലകളിൽ നാലെണ്ണം പാരീസ് നഗര പരിധിയിലും ബാക്കി അഞ്ചെണ്ണം ഉൾപ്രദേശങ്ങളിലുമുള്ള പള്ളികൾക്ക് മുന്നിലുമാണ് ഉപേക്ഷിക്കപ്പെട്ട നിലയിൽ കണ്ടെത്തിയത്. ഈ സംഭവം വംശീയമോ മതപരമോ ആയ വിവേചനം പ്രചരിപ്പിക്കുന്നതിന്റെ ഭാഗമാണെന്ന് പൊലീസ് സംശയിക്കുന്നു. ഇത്തരം വിദ്വേഷ പ്രവർത്തനങ്ങളെക്കുറിച്ച് പൊലീസ് സമഗ്രമായ അന്വേഷണം ആരംഭിച്ചിട്ടുണ്ട്.
ഇസ്ലാം മതത്തിൽ പന്നിയിറച്ചി നിഷിദ്ധമായി കണക്കാക്കപ്പെടുന്നതിനാൽ, ഈ പ്രവൃത്തികൾ മുസ്ലിം സമൂഹത്തെ ലക്ഷ്യമിട്ടുള്ളതാണെന്ന് വ്യക്തമാണ്. യൂറോപ്പിലെ ഏറ്റവും വലിയ മുസ്ലിം ജനസംഖ്യയുള്ള രാജ്യമാണ് ഫ്രാൻസ്. സമീപകാലത്ത്, പ്രത്യേകിച്ച് 2023 ഒക്ടോബറിൽ ഗാസ യുദ്ധം ആരംഭിച്ചതിന് ശേഷം, യൂറോപ്യൻ യൂണിയൻ രാജ്യങ്ങളിൽ മുസ്ലിം വിരുദ്ധ വിദ്വേഷവും ജൂതവിരുദ്ധതയും വർദ്ധിച്ചിട്ടുണ്ടെന്ന് യൂറോപ്യൻ യൂണിയൻ ഏജൻസി ഫോർ ഫണ്ടമെന്റൽ റൈറ്റ്സ് റിപ്പോർട്ട് ചെയ്തിരുന്നു. ഫ്രാൻസിലെ ആഭ്യന്തര മന്ത്രാലയത്തിന്റെ കണക്കനുസരിച്ച്, 2025 ജനുവരിക്കും മെയ് മാസത്തിനുമിടയിൽ മുസ്ലിം വിരുദ്ധ സംഭവങ്ങളിൽ 75 ശതമാനം വർധനവുണ്ടായിട്ടുണ്ടെന്നും വ്യക്തികൾക്കെതിരെയുള്ള ആക്രമണങ്ങളിൽ മൂന്നിരട്ടി വർധനവ് രേഖപ്പെടുത്തിയതായും അറിയിച്ചിട്ടുണ്ട്.
പാരീസിന് ചുറ്റുമുള്ള ഈ ഞെട്ടിക്കുന്ന സംഭവങ്ങളെ രാഷ്ട്രീയ, സാമൂഹിക നേതാക്കൾ ശക്തമായി അപലപിച്ചു. പ്രസിഡന്റ് ഇമ്മാനുവൽ മാക്രോൺ സംഭവത്തിന് ശേഷം തലസ്ഥാനത്തെ മുസ്ലിം സമുദായ പ്രതിനിധികളുമായി കൂടിക്കാഴ്ച നടത്തി പിന്തുണ അറിയിച്ചു. ഈ വംശീയ പ്രവൃത്തികളെ ശക്തമായി അപലപിക്കുന്നതായും ഇത്തരം സംഭവങ്ങൾക്കെതിരെ കർശന നടപടി സ്വീകരിക്കുമെന്നും പാരീസ് മേയർ ആനി ഹിഡാൽഗോ അറിയിച്ചു.
വംശീയ വിദ്വേഷത്തെ പ്രചോദിപ്പിക്കുന്ന ഇത്തരം പ്രവൃത്തികൾക്കെതിരെ നിയമനടപടികൾ സ്വീകരിക്കുമെന്ന് പാരീസ് പ്രോസിക്യൂട്ടറുടെ ഓഫീസ് വ്യക്തമാക്കി. മുസ്ലിം സമൂഹത്തിൽ ഭീതി വിതയ്ക്കുന്നതും മതസ്പർദ്ധ വളർത്തുന്നതുമായ ഈ സംഭവങ്ങളുടെ പശ്ചാത്തലത്തിൽ, രാജ്യത്തെ വിവിധ മുസ്ലിം സംഘടനകൾ കൂടുതൽ ജാഗ്രത പാലിക്കാൻ ആഹ്വാനം ചെയ്തിട്ടുണ്ട്.
