ആർ യു ആൾറൈറ്റ്..മൈ ഫ്രണ്ട്..!!; ദൂരെ നിന്നും ശാന്തനായി നടന്നെത്തിയ ഒരാൾ; തിരക്കില്ലാത്ത സ്ഥലത്ത് എത്തിയതും സ്വഭാവത്തിൽ മാറ്റം; ഇന്ത്യക്കാരനെ തുറിച്ചുനോക്കി വെടിപൊട്ടിച്ചു; നിലവിളി കേട്ട് ആളുകൾ ഓടിയെത്തിയപ്പോൾ കണ്ടത് മൃതദേഹം; മുഖത്ത് ഒരു ഭാവഭേദവുമില്ലാതെ പ്രതി; വേദനിപ്പിച്ച് ദൃശ്യങ്ങൾ
പിറ്റ്സ്ബർഗ്: അമേരിക്കയിലെ പെൻസിൽവാനിയയിൽ ഇന്ത്യൻ വംശജനായ മോട്ടൽ മാനേജർ വെടിയേറ്റ് മരിച്ചു. 50 വയസ്സുള്ള രാകേഷ് പട്ടേൽ (രാകേഷ് എഹാഗബൻ) ആണ് കൊല്ലപ്പെട്ടത്. പിറ്റ്സ്ബർഗിലെ ഒരു മോട്ടലിൽ വെച്ച്, അപ്രതീക്ഷിതമായി തോക്കുമായി എത്തിയ അക്രമി പോയിന്റ് ബ്ലാങ്കിൽ വെടിവെക്കുകയായിരുന്നു. സംഭവത്തിൻ്റെ ദൃശ്യങ്ങൾ മോട്ടലിലെ സിസിടിവി ക്യാമറയിൽ പതിഞ്ഞിട്ടുണ്ട്.
ഗുജറാത്തിലെ സൂറത്ത് സ്വദേശിയായ രാകേഷ് പട്ടേൽ, തൻ്റെ ഉടമസ്ഥതയിലുള്ള റോബിൻസൺ ടൗൺഷിപ്പ് മോട്ടലിൻ്റെ പാർക്കിംഗ് സ്ഥലത്ത് ഒരു തർക്കം കേട്ടതിനെ തുടർന്നാണ് പുറത്തിറങ്ങിയതെന്ന് റിപ്പോർട്ടുകൾ സൂചിപ്പിക്കുന്നു. ഒരു സ്ത്രീ സുഹൃത്തിൻ്റെ നേർക്ക് തോക്കുമായി ഒരാൾ വെടിയുതിർക്കുന്ന ശബ്ദം കേട്ടാണ് രാകേഷ് പുറത്തേക്ക് വന്നത്.
പുറത്തെത്തിയപ്പോൾ, അവിടെയുണ്ടായിരുന്ന അക്രമി രാകേഷിനോട് 'Are you alright, bud?' (സുഖമാണോ സുഹൃത്തേ?) എന്ന് ചോദിക്കുകയും തൊട്ടുപിന്നാലെ അദ്ദേഹത്തിൻ്റെ നെറ്റിയിലേക്ക് വെടിയുതിർക്കുകയുമായിരുന്നു. തൽക്ഷണം രാകേഷ് നിലത്തുവീണു. അക്രമി യാതൊരു ഭാവഭേദവുമില്ലാതെ സംഭവം നടന്നിടത്തുനിന്ന് നടന്നുനീങ്ങുന്നതും സിസിടിവി ദൃശ്യങ്ങളിൽ കാണാം.
സംഭവവുമായി ബന്ധപ്പെട്ട് 37 വയസ്സുള്ള സ്റ്റാൻലി യൂജിൻ വെസ്റ്റ് എന്നയാളെ പോലീസ് അറസ്റ്റ് ചെയ്തിട്ടുണ്ട്. ഇയാൾക്കെതിരെ ക്രിമിനൽ നരഹത്യ, നരഹത്യാശ്രമം, മറ്റൊരാളെ അശ്രദ്ധമായി അപകടപ്പെടുത്തൽ എന്നീ കുറ്റങ്ങൾ ചുമത്തിയിട്ടുണ്ട്. അലെഗെനി കൗണ്ടി സൂപ്രണ്ട് ക്രിസ്റ്റഫർ കിയേൺസ് ആണ് ഇക്കാര്യം സിബിഎസ് ന്യൂസിനോട് സ്ഥിരീകരിച്ചത്.
ഈ ദാരുണ സംഭവം ഒരു ഇന്ത്യൻ പൗരൻ്റെ ജീവനെടുത്തതിലൂടെ യുഎസിലെ സുരക്ഷാ വിഷയങ്ങൾ വീണ്ടും ചർച്ചയാവുകയാണ്. സിസിടിവി ദൃശ്യങ്ങൾ സാമൂഹ്യമാധ്യമങ്ങളിൽ പ്രചരിക്കുകയും, ഇത്തരം അക്രമസംഭവങ്ങളെക്കുറിച്ചുള്ള ആശങ്ക വർദ്ധിപ്പിക്കുകയും ചെയ്യുന്നു.
