'പൊറോട്ടയും ബീഫും വാങ്ങിക്കൊടുത്താണ് ബിന്ദു അമ്മിണിയെയും കനക ദുര്‍ഗയെയും ശബരിമലയിലെത്തിച്ചത്; സൈബര്‍ ആക്രമണങ്ങളെ ഗൗനിക്കുന്നില്ല'; പറഞ്ഞതില്‍ ഉറച്ചു നില്‍ക്കുന്നുവെന്ന് എന്‍കെ പ്രേമചന്ദ്രന്‍; ബീഫ് ഇഷ്ടമാണ് പക്ഷേ, കൂടെ പൊറോട്ട വേണ്ട എന്ന് ബിന്ദു അമ്മിണി; പ്രേമചന്ദ്രനെ ആക്രമിക്കേണ്ട കാര്യമില്ലെന്ന് കെ സുരേന്ദ്രന്‍
കൊല്ലം: ശബരിമല യുവതീപ്രവേശനവുമായി ബന്ധപ്പെട്ടു താന്‍ നടത്തിയ പ്രസ്താവനയില്‍ ഉറച്ചുനില്‍ക്കുന്നുവെന്ന് എന്‍.കെ.പ്രേമചന്ദ്രന്‍ എംപി. പൊറോട്ടയും ബീഫും വാങ്ങിക്കൊടുത്താണ് ബിന്ദു അമ്മിണിയെയും കനക ദുര്‍ഗയെയും ശബരിമലയിലെത്തിച്ചതെന്ന് ആവര്‍ത്തിച്ച എന്‍കെ പ്രേമചന്ദ്രന്‍ നേരത്തെ ഇതേ കാര്യം പറഞ്ഞതിനുശേഷം സിപിഎമ്മിന്റെ സൈബര്‍ ആക്രമണം നേരിടുകയാണെന്നും ഇപ്പോഴും ഇക്കാര്യത്തില്‍ ഉറച്ചു നില്‍ക്കുകയാണെന്നും പറഞ്ഞു. തനിക്കെതിരെയുള്ള സൈബര്‍ ആക്രമണങ്ങളെ ഗൗനിക്കുന്നില്ലെന്നും അദ്ദേഹം പറഞ്ഞു. പൊറോട്ടയും ബീഫും നല്‍കി രഹ്ന ഫാത്തിമയെയും ബിന്ദു അമ്മിണിയെയും ശബരിമലയിലെത്തിച്ചത് പൊലീസ് ആണെന്നും ഈ സര്‍ക്കാരാണ് അയ്യപ്പസംഗമം നടത്തിയത് എന്നുമായിരുന്നു വിവാദ പ്രസംഗം.
താന്‍ പറഞ്ഞ കാര്യം നേരത്തെ വി.ഡി.സതീശനും ഷിബു ബേബി ജോണും പറഞ്ഞിട്ടുണ്ടെന്നും അവര്‍ക്കൊന്നും നേരിടേണ്ടി വന്നിട്ടില്ലാത്ത സൈബര്‍ ആക്രമണമാണ് തനിക്ക് നേരെയുള്ളതെന്നും പ്രേമചന്ദ്രന്‍ പറഞ്ഞു. ''പ്രസ്താവനയില്‍ ഞാന്‍ അടിയുറച്ചു നില്‍ക്കുന്നു. കോട്ടയത്ത് പൊലീസ് ക്ലബ്ബില്‍ രഹ്ന ഫാത്തിമയ്ക്കും ബിന്ദു അമ്മിണിയ്ക്കും പൊറോട്ടയും ബീഫും വാങ്ങി നല്‍കിയെന്ന് ആദ്യം പറഞ്ഞത് ആര്‍എസ്പി സംസ്ഥാന സെക്രട്ടറി ഷിബു ബേബി ജോണ്‍ ആണ്. പിന്നീട് വി.ഡി.സതീശനും പറഞ്ഞു. ഇവര്‍ രണ്ടുപേരും പറഞ്ഞപ്പോഴുമുണ്ടാകാത്ത കനത്ത ആക്രമണമാണ് സിപിഎം സൈബര്‍ സംഘത്തിന്റെ നേതൃത്വത്തില്‍ നടക്കുന്നത്'' എംപി പറഞ്ഞു.
ശബരിമല സ്വര്‍ണക്കൊള്ളയില്‍ പ്രതിഷേധിച്ച് യുഡിഎഫ് സംഘടിപ്പിച്ച വിശ്വാസ സംരക്ഷണ യാത്രയുടെ സമാപന സമ്മേളനത്തിലായിരുന്നു എംപിയുടെ വിവാദ പ്രസംഗമുണ്ടായത്. പൊറോട്ടയും ബീഫും നല്‍കി രഹ്ന ഫാത്തിമയെയും ബിന്ദു അമ്മിണിയെയും ശബരിമലയില്‍ എത്തിച്ച സര്‍ക്കാര്‍ വിശ്വാസത്തെ വികലമാക്കി. അതേ പിണറായി വിജയന്റെ നേതൃത്വത്തിലുള്ള ആഭ്യന്തരവകുപ്പും സര്‍ക്കാരുമാണ് പമ്പയില്‍ കഴിഞ്ഞദിവസം ആഗോള അയ്യപ്പസംഗമത്തിന് നേതൃത്വം കൊടുത്തതെന്നും എന്‍.കെ. പ്രേമചന്ദ്രന്‍ വിമര്‍ശിച്ചിരുന്നു.
2018ലാണ് ശബരിമല സ്ത്രീ പ്രവേശന വിധി വരുന്നത്. മുഖ്യമന്ത്രി സ്ത്രീ പ്രവേശനത്തിന് വേണ്ട ക്രമീകരണം ഒരുക്കാന്‍ ഉന്നത പൊലീസ് ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിരുന്നു. പൊലീസ് അകമ്പടിയോടുകൂടിയാണ് രഹന ഫാത്തിമ എത്തിയത്. ബിന്ദു അമ്മിണിയും കനക ദുര്‍ഗയും പൊലീസിന്റെ സമ്പൂര്‍ണ സംരക്ഷണയിലാണ് എത്തിയത്. കോട്ടയത്ത് പൊലീസ് ക്ലബ്ബില്‍ വെച്ച് പൊറോട്ടയും ബീഫും ഇവര്‍ക്ക് വാങ്ങി നല്‍കിയെന്ന് ആദ്യം പറഞ്ഞത് ആര്‍ എസ് പി സംസ്ഥാന സെക്രട്ടറി ഷിബു ബേബി ജോണ്‍ ആണ്. തുടര്‍ന്ന് കോണ്‍ഗ്രസ് നേതാക്കളും ഇതേവിഷയം ആവര്‍ത്തിച്ചു. പക്ഷേ താന്‍ പറഞ്ഞപ്പോള്‍ മാത്രം വലിയ സൈബര്‍ ആക്രമണം നേരിടേണ്ടിവരുന്നുവെന്നും എന്‍കെ പ്രേമചന്ദ്രന്‍ പറഞ്ഞു.
സിപിഎമ്മിന്റെ നേതൃത്വത്തിലാണ് ഈ ആക്രമണം. ശബരിമല സ്ത്രീ പ്രവേശനവിഷയം വീണ്ടും ചര്‍ച്ചയായതില്‍ സന്തോഷമുണ്ട്. ഭക്തര്‍ക്ക് ഉണ്ടായ വേദനയുടെ ഓര്‍മ്മപ്പെടുത്തലാണിത്. തനിക്കെതിരെ നടക്കുന്നത് സിപിഎം സൈബര്‍ സംഘത്തിന്റെ വര്‍ഗീയ ആക്രമണമാണ്. താന്‍ പറഞ്ഞതില്‍ അടിയുറച്ചു നില്‍ക്കുകയാണ്. വിശ്വാസത്തെ വിശ്വാസികളെ ഏറ്റവും അധികം വ്രണപ്പെടുത്തിയതാണ് സ്ത്രീ പ്രവേശനം. പൊറോട്ടയും ബീഫും വാങ്ങിക്കൊടുത്ത് കനക ദുര്‍ഗ്ഗയെയും അമ്മിണിയെയും ശബരിമലയില്‍ എത്തിച്ചുവെന്നത് ആവര്‍ത്തിക്കുകയാണ്. സ്ത്രീകളെ ശബരിമലയില്‍ കയറ്റിയവരാണ് ആഗോള അയ്യപ്പ സംഗമം നടത്തുന്നത് എന്നത് വിരോധാഭാസമാണ്. സൈബര്‍ ആക്രമണത്തെ താന്‍ മുഖവിലയ്ക്ക് എടുക്കുന്നില്ല. എന്തിനെയും ഏതിനെയും വര്‍ഗീയവത്കരിക്കുകയെന്നതാണ് സിപിഎം നയം.
സീനിയര്‍ പൊലീസ് ഉദ്യോഗസ്ഥനില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ ആണ് ഷിബു ബേബി ജോണ്‍ ആദ്യം ഇക്കാര്യം പറയുന്നത്. അത് കൃത്യമായ വിവരങ്ങളുടെ അടിസ്ഥാനത്തില്‍ ആണ് പറഞ്ഞത്. യുഡിഎഫ് ചരിത്രത്തില്‍ ഒരിക്കലും ഇല്ലാത്ത തരത്തിലുള്ള കെട്ടുറപ്പിലാണ് ഇപ്പോഴുള്ളത്. ഘടകകക്ഷികള്‍ തമ്മില്‍ യാതൊരു അഭിപ്രായവ്യത്യാസവുമില്ല. ഭരണം പിടിക്കാനായി ഒറ്റമനസ്സോടു കൂടെയാണ് മുന്നോട്ടുപോകുന്നത്. മുന്‍പ് മോണ്‍ഗ്രസില്‍ ഉണ്ടായിരുന്ന അനൈക്യം ഇപ്പോഴില്ല എന്നാണ് മനസിലാക്കുന്നത്. താന്‍ നിയമസഭാ തെരഞ്ഞെടുപ്പില്‍ മത്സരിക്കുമെന്നത് സിപിഎം നടത്തുന്ന പ്രചാരണമാണെന്നും എന്‍കെ പ്രേമചന്ദ്രന്‍ പറഞ്ഞു.
പൊറോട്ട വേണ്ട , കപ്പ മതിയെന്ന് ബിന്ദു അമ്മിണി
ശബരിമല യുവതി പ്രവേശന വിഷയത്തില്‍ വിവാദ പരാമര്‍ശം നടത്തിയ എന്‍.കെ പ്രേമചന്ദ്രന്‍ എംപിക്ക് മറുപടിയുമായി ബിന്ദു അമ്മിണി. പൊറോട്ടയും ബീഫും നല്‍കി രഹന ഫാത്തിമയേയും ബിന്ദു അമ്മിണിയേയും ശബരിമലയിലെത്തിച്ച സര്‍ക്കാരാണ് അയ്യപ്പസംഗമം നടത്തിയതെന്നായിരുന്നു എന്‍.കെ പ്രേമചന്ദ്രന്‍ വിവാദ പരാമര്‍ശം.
ഇതിനെതിരേ ഫേസ്ബുക്കിലെഴുതിയ ലഘു കുറിപ്പിലാണ് ബിന്ദു അമ്മിണി മറുപടി നല്‍കിയിരിക്കുന്നത്. 'ബീഫ് എനിക്ക് ഇഷ്ടമാണ് പക്ഷേ പൊറോട്ട കൂടെ വേണ്ട, കപ്പ ആകാം. കപ്പയും ബീഫും സൂപ്പര്‍ ആണ്', എന്ന് അവര്‍ കുറിച്ചു.
പ്രേമചന്ദ്രനെ ആക്രമിക്കേണ്ട
ശബരിമലയിലേക്ക് സ്ത്രീകളെ പ്രവേശിപ്പിച്ചത് പൊറോട്ടയും ബീഫും നല്‍കിയാണെന്ന് പറഞ്ഞ എന്‍ കെ പ്രേമചന്ദ്രന്‍ എംപിയെ ആക്രമിക്കേണ്ട കാര്യമില്ലെന്ന് ബിജെപി നേതാവ് കെ സുരേന്ദ്രന്‍ പറഞ്ഞു. ബീഫും പൊറോട്ടയും വാങ്ങിക്കൊടുത്തോ എന്ന് തനിക്ക് അറിയില്ല. 2018 ല്‍ ആക്ടിവിസ്റ്റുകളെ ശബരിമലയില്‍ കയറ്റാന്‍ സിപിഎം തീരുമാനിച്ചപ്പോള്‍ ഒരു കോണ്‍ഗ്രസുകാരനെയും കണ്ടില്ലെന്നും കെ സുരേന്ദ്രന്‍ പറഞ്ഞു.
