നീ ഈ 'തടി'യും വച്ച് എന്റെ വീട്ടുകാരെ കാണാൻ വന്നാൽ ഒന്നും നടക്കില്ല; കാമുകിയുടെ പറച്ചിൽ കേട്ട് യുവാവ് കാണിച്ചത് വൻ മണ്ടത്തരം; ഒറ്റയടിക്ക് വണ്ണം കുറയ്ക്കാൻ ഇയാൾ ചെയ്തത്; വേദനയോടെ കുടുംബം

ബീജിംഗ്: കാമുകിയുടെ മാതാപിതാക്കളെ ആകർഷിക്കാൻ ലക്ഷ്യമിട്ട് ഭാരക്കുറവ് ശസ്ത്രക്രിയക്ക് വിധേയനായ 36-കാരൻ ദാരുണമായി മരിച്ചു. 'സൗത്ത് ചൈന മോണിംഗ് പോസ്റ്റ്' ആണ് ഈ ഞെട്ടിക്കുന്ന വാർത്ത പുറത്തുവിട്ടത്. ലി ജിയാങ് (യഥാർത്ഥ പേരല്ല) എന്ന യുവാവാണ് ശസ്ത്രക്രിയക്ക് ശേഷം ആരോഗ്യനില വഷളായി മരണപ്പെട്ടത്.

174 സെന്റീമീറ്റർ ഉയരമുണ്ടായിരുന്ന ലി ജിയാങ്ങിന് 134 കിലോഗ്രാമിലധികം ശരീരഭാരമുണ്ടായിരുന്നു. അമിതവണ്ണവും അനാരോഗ്യകരമായ ഭക്ഷണശീലങ്ങളും കാരണം കടുത്ത ബുദ്ധിമുട്ടുകൾ അനുഭവിച്ചിരുന്ന ഇദ്ദേഹം, വിവാഹത്തിന് മുന്നോടിയായി തന്റെ കാമുകിയുടെ കുടുംബത്തെ കാണുന്നതിന് മുമ്പ് ശരീരഭാരം കുറയ്ക്കാൻ തീരുമാനിച്ചു. വേഗത്തിൽ ഭാരം കുറയ്ക്കുന്നതിനായി ഗ്യാസ്ട്രിക് ബൈപാസ് ശസ്ത്രക്രിയയാണ് ലി ജിയാങ് തിരഞ്ഞെടുത്തത്.

സെപ്തംബർ 30-ന് ഷെങ്ഷൗവിലെ നയൻത് പീപ്പിൾസ് ഹോസ്പിറ്റലിൽ ഇദ്ദേഹത്തെ പ്രവേശിപ്പിച്ചു. ഒക്ടോബർ 2-ന് ശസ്ത്രക്രിയ വിജയകരമായി പൂർത്തിയാക്കുകയും ചെയ്തു. ശസ്ത്രക്രിയക്ക് ശേഷമുള്ള പ്രാഥമിക പരിചരണത്തിനായി ഇദ്ദേഹത്തെ ഐസിയുവിൽ പ്രവേശിപ്പിച്ചു. പിന്നീട് ഒക്ടോബർ 3-ന് ജനറൽ വാർഡിലേക്ക് മാറ്റിയെങ്കിലും, ഒക്ടോബർ 4-ന് പെട്ടെന്ന് ആരോഗ്യനില വഷളാവുകയായിരുന്നു. പിറ്റേദിവസം രാവിലെ ശ്വാസമെടുക്കാൻ ബുദ്ധിമുട്ട് അനുഭവപ്പെട്ടതിനെത്തുടർന്ന് ഐസിയുവിലേക്ക് തിരികെ മാറ്റിയെങ്കിലും, അടിയന്തര ചികിത്സകൾക്കിടയിലും ഒക്ടോബർ 5-ന് ശ്വാസകോശ സംബന്ധമായ തകരാറുകളെ തുടർന്ന് ലി ജിയാങ് മരണപ്പെട്ടു.

വൈദ്യസഹായ രേഖകൾ പ്രകാരം, കഴിഞ്ഞ ഒരു വർഷമായി ലി ജിയാങിന് ശരീരഭാരം കൂടുന്നതായും ഉറക്കത്തിൽ കൂർക്കംവലി അനുഭവപ്പെടുന്നതായും റിപ്പോർട്ട് ചെയ്യപ്പെട്ടിരുന്നു. കൂടാതെ, ഇദ്ദേഹത്തിന് മെറ്റബോളിക് സിൻഡ്രോം, ഉയർന്ന രക്തസമ്മർദ്ദം, ഫാറ്റി ലിവർ എന്നിവയും നേരത്തെ കണ്ടെത്തുകയുണ്ടായി. ശസ്ത്രക്രിയക്ക് മുമ്പുള്ള കൃത്യമായ വിലയിരുത്തലും ശസ്ത്രക്രിയക്ക് ശേഷമുള്ള ശ്രദ്ധയോടെയുള്ള പരിചരണവും നൽകിയിരുന്നോ എന്ന് ലി ജിയാങിന്റെ കുടുംബം ചോദ്യം ചെയ്തിട്ടുണ്ട്. എന്നാൽ, ആശുപത്രി അധികൃതർ ക്ലിനിക്കൽ മാനദണ്ഡങ്ങൾ പാലിച്ചിരുന്നതായും അടിയന്തര പരിചരണം ഉടൻ നൽകിയിരുന്നതായും അറിയിച്ചു.

പെട്ടെന്ന് ആരോഗ്യനില വഷളായതിന്റെ കാരണം കണ്ടെത്താനായി പോസ്റ്റ്‌മോർട്ടം നടത്താൻ ഇരു വിഭാഗവും പ്രാദേശിക ആരോഗ്യ കമ്മീഷനോട് ആവശ്യപ്പെട്ടിട്ടുണ്ട്. മരണകാരണം നിർണ്ണയിക്കുന്നതിനുള്ള ഏറ്റവും ആധികാരികമായ തെളിവ് അന്തിമ പോസ്റ്റ്‌മോർട്ടം റിപ്പോർട്ട് ആയിരിക്കുമെന്ന് ആശുപത്രി അധികൃതർ വ്യക്തമാക്കി. ഈ റിപ്പോർട്ടിന്റെ ഫലങ്ങൾ കൂടുതൽ വ്യക്തത നൽകുമെന്ന് പ്രതീക്ഷിക്കുന്നു.

പുറത്തുവരുന്ന വിവരങ്ങൾ അനുസരിച്ച്, ലി ജിയാങിന്റെ കാമുകിയുടെ കുടുംബത്തെ പ്രീതിപ്പെടുത്താനുള്ള ശ്രമമാണ് ഈ ദുരന്തത്തിലേക്ക് നയിച്ചത്. പ്രിയപ്പെട്ടവരുടെ മുന്നിൽ മെച്ചപ്പെട്ട രൂപം അവതരിപ്പിക്കാനുള്ള ശ്രമം മരണത്തിൽ കലാശിച്ച സംഭവം ഏറെ വേദനാജനകമാണ്.