ലിഫ്റ്റ് ഓഫ് കമാൻഡിൽ കുതിച്ചുപൊങ്ങിയ ആ ദക്ഷിണ കൊറിയന് റോക്കറ്റ്; ഹോട്ട് ഗ്യാസ് പുറംന്തള്ളി പോക്ക്; പാതി ദൂരമെത്തി ഒരു മിനിറ്റ് കഴിഞ്ഞതും ഉഗ്ര ശബ്ദം; പെട്ടെന്ന് തീഗോളമായി നേരെ താഴോട്ട്
സാവോ പോളോ: ദക്ഷിണ കൊറിയയിലെ പ്രമുഖ സ്പേസ് സ്റ്റാർട്ടപ്പായ 'ഇന്നോസ്പേസ്' വലിയ പ്രതീക്ഷയോടെ വിക്ഷേപിച്ച 'ഹൻബിറ്റ്-നാനോ' റോക്കറ്റ് ഭ്രമണപഥത്തിൽ എത്തുന്നതിന് മുൻപേ തകർന്നു വീണു. ബ്രസീലിലെ അൽകാൻതാര സ്പേസ് സെന്ററിൽ നിന്ന് പ്രാദേശിക സമയം തിങ്കളാഴ്ച രാത്രി 8:13-ഓടെയായിരുന്നു വിക്ഷേപണം. എന്നാൽ കുതിച്ചുയർന്ന് ഏകദേശം ഒരു മിനിറ്റിനുള്ളിൽ റോക്കറ്റിൽ സാങ്കേതിക തകരാർ സംഭവിക്കുകയും അത് കടലിൽ പതിക്കുകയുമായിരുന്നു.
എന്താണ് ഹൻബിറ്റ്-നാനോ?
ചെറിയ ഉപഗ്രഹങ്ങളെ കുറഞ്ഞ ചിലവിൽ ബഹിരാകാശത്ത് എത്തിക്കാൻ ലക്ഷ്യമിട്ട് ഇന്നോസ്പേസ് നിർമ്മിച്ച രണ്ട് ഘട്ടങ്ങളുള്ള (two-stage) റോക്കറ്റാണ് ഹൻബിറ്റ്-നാനോ. 57 അടി ഉയരമുള്ള ഈ റോക്കറ്റിന്റെ ഒന്നാം ഘട്ടത്തിൽ ഹൈബ്രിഡ് എൻജിനും രണ്ടാം ഘട്ടത്തിൽ ലിക്വിഡ് മീഥെയ്ൻ എൻജിനുമാണ് ഉപയോഗിച്ചിരുന്നത്. ദക്ഷിണ കൊറിയയിൽ നിന്നുള്ള ഒരു സ്വകാര്യ കമ്പനി സ്വന്തമായി നിർമ്മിച്ച ഉപഗ്രഹം ഭ്രമണപഥത്തിൽ എത്തിക്കുന്ന ചരിത്ര നിമിഷമായിരുന്നു വിക്ഷേപണത്തിലൂടെ ലക്ഷ്യമിട്ടിരുന്നത്.
വിക്ഷേപണ തറയിൽ നിന്ന് വിജയകരമായി കുതിച്ചുയർന്ന റോക്കറ്റ് ഏകദേശം ഒരു മിനിറ്റ് പിന്നിട്ടപ്പോൾ തന്നെ പ്രതിസന്ധിയിലായി. ട്രാക്കിംഗ് സംവിധാനങ്ങൾ നൽകുന്ന വിവരമനുസരിച്ച് റോക്കറ്റിന്റെ ഗതിയിൽ മാറ്റമുണ്ടാവുകയും അത് നിയന്ത്രണം നഷ്ടപ്പെട്ട് താഴേക്ക് പതിക്കുകയുമായിരുന്നു. കടലിൽ വീണ റോക്കറ്റ് വലിയ അഗ്നിഗോളമായി മാറിയതായാണ് റിപ്പോർട്ടുകൾ. അപകടം നടന്നയുടൻ തന്നെ ഇന്നോസ്പേസ് തങ്ങളുടെ ലൈവ് ടെലികാസ്റ്റ് അവസാനിപ്പിച്ചു. തകരാർ സംഭവിച്ചതായി കമ്പനി ഔദ്യോഗികമായി സ്ഥിരീകരിച്ചെങ്കിലും അതിന്റെ കൃത്യമായ കാരണം ഇതുവരെ വെളിപ്പെടുത്തിയിട്ടില്ല.
നഷ്ടമായത് എട്ട് പേലോഡുകൾ ഹൻബിറ്റ്-നാനോയുടെ ഈ കന്നി യാത്രയിൽ ഇന്ത്യയിൽ നിന്നും ബ്രസീലിൽ നിന്നുമുള്ള ഉപഭോക്താക്കളുടെ അഞ്ച് ചെറിയ ഉപഗ്രഹങ്ങളും മൂന്ന് സാങ്കേതിക പരീക്ഷണ ഉപകരണങ്ങളും ഉൾപ്പെടെ എട്ട് പേലോഡുകളാണ് ഉണ്ടായിരുന്നത്. ഇവയെല്ലാം അപകടത്തിൽ നശിച്ചു. ബഹിരാകാശ വിപണിയിൽ കുറഞ്ഞ ചിലവിലുള്ള വിക്ഷേപണ സേവനങ്ങൾ നൽകാനുള്ള ദക്ഷിണ കൊറിയയുടെ ശ്രമങ്ങൾക്ക് ഈ പരാജയം വലിയ തിരിച്ചടിയാണ്.
പലതവണ മാറ്റിവെച്ച വിക്ഷേപണം ഡിസംബർ 17-ന് നടക്കേണ്ടിയിരുന്ന വിക്ഷേപണം സാങ്കേതിക തകരാറുകൾ മൂലവും മോശം കാലാവസ്ഥ കാരണവും മൂന്ന് തവണയാണ് മാറ്റിവെച്ചത്. ഇന്ധന ടാങ്കിലെ ചോർച്ചയും ഇലക്ട്രോണിക് സംവിധാനങ്ങളിലെ പിഴവുകളും പരിഹരിച്ച ശേഷമാണ് തിങ്കളാഴ്ച വിക്ഷേപണം നടത്തിയത്. എന്നാൽ എല്ലാ തയ്യാറെടുപ്പുകളെയും വിഫലമാക്കി വിക്ഷേപണം പരാജയപ്പെടുകയായിരുന്നു.
