26 മണിക്കൂറിനിടെ രണ്ട് കുട്ടികളടക്കം മൂന്ന് പേർക്ക് സ്രാവ് ആക്രമണത്തിൽ പരിക്ക്; ഒരാളുടെ നില ഗുരുതരം; ജാഗ്രതാ നിർദ്ദേശത്തെ തുടർന്ന് ബീച്ചുകൾ താൽക്കാലികമായി അടച്ചുപൂട്ടി; സിഡ്നിയിലെ വടക്കൻ തീരത്തെ ബീച്ചുകളിൽ ഭീതി പരത്തി 'ബുൾ ഷാർക്കു'കൾ
സിഡ്നി: വെറും 26 മണിക്കൂറിനിടെ രണ്ട് കുട്ടികളടക്കം മൂന്ന് പേർക്ക് നേരെ സ്രാവ് ആക്രമണം ഉണ്ടായതിനെത്തുടർന്ന് സിഡ്നിയിലെ പ്രമുഖ ബീച്ചുകൾ അടച്ചുപൂട്ടി. കനത്ത തിരമാലകൾ കാരണം സ്രാവുകളുടെ സാന്നിധ്യം അറിയിക്കുന്ന സംവിധാനങ്ങൾ പ്രവർത്തിപ്പിക്കാൻ കഴിയാത്തതും ആശങ്ക വർദ്ധിപ്പിക്കുന്നുണ്ട്. വടക്കൻ സിഡ്നിയിലെ മാൻലിയിലുള്ള നോർത്ത് സ്റ്റെയ്ൻ ബീച്ചിലാണ് ഏറ്റവും ഒടുവിലത്തെ നടുക്കുന്ന സംഭവം നടന്നത്.
തിങ്കളാഴ്ച വൈകിട്ട് നോർത്ത് സ്റ്റെയ്ൻ ബീച്ചിൽ സർഫിംഗ് നടത്തുകയായിരുന്ന ഇരുപതുകാരനെ സ്രാവ് ആക്രമിച്ചു. കാലിന്റെ താഴത്തെ ഭാഗത്ത് ഗുരുതരമായി പരിക്കേറ്റ ഇദ്ദേഹത്തെ തീരത്തുണ്ടായിരുന്നവർ ചേർന്നാണ് കരയ്ക്കെത്തിച്ചത്. പ്രാഥമിക ശുശ്രൂഷ നൽകിയ ശേഷം അതീവ ഗുരുതരാവസ്ഥയിലായ യുവാവിനെ റോയൽ നോർത്ത് ഷോർ ആശുപത്രിയിൽ പ്രവേശിപ്പിച്ചു. ഇദ്ദേഹത്തിന്റെ സർഫ് ബോർഡിലെ 15 സെന്റിമീറ്റർ നീളമുള്ള പല്ലിന്റെ അടയാളം പരിശോധിച്ച വിദഗ്ധർ, ആക്രമണം നടത്തിയത് 'ബുൾ ഷാർക്ക്' ആകാനാണ് സാധ്യതയെന്ന് വിലയിരുത്തുന്നു.
ഡീ വൈ പോയിന്റിൽ 11 വയസ്സുകാരനെ സ്രാവ് സർഫ് ബോർഡിൽ നിന്ന് തള്ളിയിട്ടു. ബോർഡിൽ സ്രാവ് കടിച്ച അടയാളങ്ങൾ ഉണ്ടെങ്കിലും ഭാഗ്യവശാൽ കുട്ടി പരിക്കേൽക്കാതെ രക്ഷപ്പെട്ടു. ഞായറാഴ്ച ഉച്ചയ്ക്ക് വോക്ലൂസിലെ ഷാർക്ക് ബീച്ചിൽ സുഹൃത്തുക്കൾക്കൊപ്പം നീന്തുകയായിരുന്ന 12 വയസ്സുകാരനെ സ്രാവ് കടിച്ചു. സുഹൃത്തുക്കൾ ചേർന്നാണ് കുട്ടിയെ രക്ഷപ്പെടുത്തി കരയ്ക്കെത്തിച്ചത്. ആക്രമണങ്ങളെത്തുടർന്ന് നോർത്ത് ബീച്ചസ് കൗൺസിൽ പരിധിയിലുള്ള എല്ലാ ബീച്ചുകളും അനിശ്ചിതകാലത്തേക്ക് അടച്ചു. ഡ്രോണുകളും ജെറ്റ് സ്കീകളും ഉപയോഗിച്ച് സ്രാവുകൾക്കായി തിരച്ചിൽ നടത്തുന്നുണ്ടെങ്കിലും പുതിയ നീക്കങ്ങളൊന്നും ശ്രദ്ധയിൽപ്പെട്ടിട്ടില്ല.
കഴിഞ്ഞ ദിവസങ്ങളിൽ സിഡ്നിയിൽ പെയ്ത കനത്ത മഴയെത്തുടർന്ന് കടൽ വെള്ളം കലങ്ങിയിരിക്കുന്നത് സ്രാവുകൾക്ക് അനുകൂലമായ സാഹചര്യം ഒരുക്കുന്നുവെന്ന് പോലീസ് മുന്നറിയിപ്പ് നൽകി. കലങ്ങിയ വെള്ളത്തിലും കാഴ്ച പരിധി കുറഞ്ഞ സ്ഥലങ്ങളിലും നീന്തരുതെന്ന് അധികൃതർ ജനങ്ങളോട് ആവശ്യപ്പെട്ടു. ജനുവരി, ഫെബ്രുവരി മാസങ്ങൾ ബുൾ ഷാർക്കുകളുടെ സീസൺ കൂടിയായതിനാൽ അതീവ ജാഗ്രത വേണമെന്ന് സ്രാവ് വിദഗ്ധർ മുന്നറിയിപ്പ് നൽകുന്നു.
