സര്ക്കാരിന് കണ്ണ് വരുമാനത്തില് മാത്രം; ലഹരിയെ ഇല്ലാതാക്കാന് വേണ്ടത് ആര്ജ്ജവമുള്ള സര്ക്കാര്; സംസ്ഥാനത്ത് മദ്യശാലകളുടെ പ്രളയം; സര്ക്കാരിനെതിരെ പള്ളികളില് പ്രതിഷേധ സര്ക്കുലര് വായിച്ച് കെസിബിസി; പിണറായി ഭരണത്തില് ബാറുകള് 29-ല് നിന്ന് ആയിരത്തിലേക്കെന്ന് വിമര്ശനം
കൊച്ചി: രണ്ടാം പിണറായി സര്ക്കാരിന്റെ മദ്യനയത്തിനെതിരെ അതിരൂക്ഷമായ വിമര്ശനവുമായി കേരള കത്തോലിക്കാ മെത്രാന് സമിതി (കെസിബിസി). സംസ്ഥാനത്ത് മദ്യശാലകളുടെ പ്രളയമാണെന്ന് കുറ്റപ്പെടുത്തിക്കൊണ്ടുള്ള കെസിബിസിയുടെ സര്ക്കുലര് ഞായറാഴ്ച പള്ളികളില് വായിച്ചു. ലഹരി വിരുദ്ധ പ്രവര്ത്തനങ്ങളില് സര്ക്കാരിന് ആര്ജ്ജവമില്ലെന്നും മദ്യം വീടുകളിലേക്ക് വരെ എത്തുന്ന ഭീതിജനകമായ സാഹചര്യമാണ് നിലവിലുള്ളതെന്നും സഭ കുറ്റപ്പെടുത്തി.
2016-ല് എല്ഡിഎഫ് സര്ക്കാര് അധികാരമേല്ക്കുമ്പോള് കേരളത്തില് വെറും 29 ബാറുകള് മാത്രമാണുണ്ടായിരുന്നതെന്ന് കെസിബിസി ചൂണ്ടിക്കാട്ടി. എന്നാല് നിലവില് അത് ആയിരത്തിലേറെയായി വര്ധിച്ചു. ലഹരി തടയാന് അധികാരപ്പെട്ടവര് തന്നെ അത് യഥേഷ്ടം വ്യാപിപ്പിക്കാന് കൂട്ടുനില്ക്കുകയാണെന്നും സര്ക്കുലറില് ആരോപിക്കുന്നു. മദ്യവര്ജ്ജനമെന്ന പ്രഖ്യാപിത നയത്തില് നിന്ന് മാറി മദ്യവ്യാപനമാണ് സര്ക്കാര് ലക്ഷ്യമിടുന്നതെന്ന് സഭ ആഞ്ഞടിച്ചു.
ലഹരി വിമുക്ത പ്രവര്ത്തനങ്ങള്ക്കായി സര്ക്കാര് നടത്തുന്ന മീറ്റിംഗുകള് വെറും പ്രഹസനമായി മാറുകയാണ്. ബാറുകളുടെ പ്രവര്ത്തന സമയം വര്ദ്ധിപ്പിച്ചത് ഉള്പ്പെടെയുള്ള തീരുമാനങ്ങള് ഇതിന് തെളിവാണ്. മദ്യവും മറ്റ് മാരക ലഹരിവസ്തുക്കളും സമൂഹത്തെ കാര്ന്നുതിന്നുമ്പോള് സര്ക്കാര് വരുമാനത്തില് മാത്രമാണ് കണ്ണ് വെക്കുന്നതെന്നും കെസിബിസി ആരോപിച്ചു. ലഹരിക്കെതിരെ ആര്ജ്ജവമുള്ള ഭരണസംവിധാനം വേണമെന്നും സഭ ആവശ്യപ്പെട്ടു.
യുവാക്കള്ക്കിടയിലും കുടുംബങ്ങളിലും ലഹരി ഉപയോഗം വര്ധിക്കുന്നത് തടയാന് സഭയുടെ നേതൃത്വത്തില് ബോധവല്ക്കരണ പരിപാടികള് ഊര്ജ്ജിതമാക്കാനും സര്ക്കുലറില് ആഹ്വാനമുണ്ട്. സര്ക്കാരിന്റെ മദ്യനയത്തിനെതിരെ വരും ദിവസങ്ങളില് ശക്തമായ പ്രക്ഷോഭ പരിപാടികളിലേക്ക് നീങ്ങാനാണ് കെസിബിസിയുടെ തീരുമാനം.
മദ്യനയം പിന്വലിക്കണമെന്നാവശ്യപ്പെട്ട് സംസ്ഥാനവ്യാപകമായി പ്രതിഷേധ പരിപാടികള് നടത്തുമെന്ന് കെസിബിസി മദ്യവിരുദ്ധ സമിതി അറിയിച്ചു. മദ്യശാലകളുടെ സമയം അര്ദ്ധരാത്രി വരെയാക്കിയത് തിരഞ്ഞെടുപ്പ് മുന്നില് കണ്ടുള്ള മദ്യലോബിയുമായുള്ള 'ഡീല്' ആണെന്നാണ് സഭയുടെ ആരോപണം. ബാറുകളുടെ സമയം കൂട്ടിയത് ഒരു തലമുറയെത്തന്നെ നശിപ്പിക്കുമെന്നും യുവാക്കളെ ബാറുകളില് ഉറക്കാന് സര്ക്കാര് ആഗ്രഹിക്കുന്നുണ്ടോ എന്നും സഭകള് ചോദിച്ചു. റവന്യൂ വരുമാനത്തിന് വേണ്ടി ജനങ്ങളുടെ കണ്ണീര് സര്ക്കാര് കാണുന്നില്ലെന്ന് സഭ കുറ്റപ്പെടുത്തി.
എല്ലാ മതവിഭാഗങ്ങളെയും ഉള്പ്പെടുത്തി സംസ്ഥാനതലത്തില് ഒരു സംയുക്ത വേദി രൂപീകരിച്ച് മദ്യനയത്തിനെതിരെ പോരാടുമെന്ന് ഓര്ത്തഡോക്സ് സഭാ അധ്യക്ഷന് ബസേലിയോസ് മാര്ത്തോമ്മാ മാത്യൂസ് തൃതീയന് കാതോലിക്കാ ബാവാ വ്യക്തമാക്കിയിരുന്നു. ടൂറിസം വികസനത്തിനാണ് മദ്യനയത്തില് ഇളവ് നല്കുന്നതെന്ന സര്ക്കാരിന്റെ വാദം കെസിബിസി തള്ളി. വിദേശികള് കേരളത്തിലേക്ക് വരുന്നത് പ്രകൃതി ഭംഗി കാണാനാണെന്നും അല്ലാതെ മദ്യപിക്കാനല്ലെന്നും സഭ പരിഹസിച്ചു.
അതേസമയം, വിനോദസഞ്ചാര മേഖലയുടെയും ബിസിനസ് മീറ്റിംഗുകളുടെയും ആവശ്യങ്ങള് മുന്നിര്ത്തിയാണ് സമയം വര്ധിപ്പിച്ചതെന്നാണ് എക്സൈസ് മന്ത്രി എം.ബി രാജേഷിന്റെ വിശദീകരണം. എന്നാല് മുന്നണിയിലോ ക്യാബിനറ്റിലോ ആലോചിക്കാതെയാണ് ഈ തിടുക്കത്തിലുള്ള തീരുമാനമെന്ന അതൃപ്തി ഭരണപക്ഷത്തിനുള്ളിലെ ചില സംഘടനകള്ക്കും ഉണ്ട്.
