അന്ന് ഒരു കരാറുമില്ലാതെ തട്ടിപ്പിന് സ്റ്റേഡിയം വിട്ടു നല്കി; ഇന്ന് 25 ലക്ഷം സെക്യൂരിറ്റി ഡെപ്പോസിറ്റ് പൂര്ണ്ണമായും അടയ്ക്കാതെ സ്റ്റേഡിയം വിട്ടുനല്കില്ലെന്ന വാശിയില് ചന്ദ്രന്പിള്ളയും കൂട്ടരും; കല്ലൂരില് ജി.സി.ഡി.എ വീണ്ടും കളിമുടക്കുന്നു; തെരഞ്ഞെടുപ്പ് കാലത്ത് സര്ക്കാരിനെതിരെ കായിക പ്രേമികളെ തിരിയ്ക്കാനോ ഈ ഗൂഡാലോചന; മെസ്സിയുടെ പേരിലെ പിരിവിന് കൂട്ടുനിന്നവര്ക്ക് 'ഇന്ത്യ' ഒരു വികാരമല്ല
കൊച്ചി: കേരളത്തിന്റെ ഫുട്ബോള് ആവേശത്തിന് മേല് വീണ്ടും കരിനിഴല് വീഴ്ത്തി ജി.സി.ഡി.എ. കലൂര് അന്താരാഷ്ട്ര സ്റ്റേഡിയത്തില് നടക്കാനിരിക്കുന്ന ഇന്ത്യ-ഹോങ്കോംഗ് എ.എഫ്.സി ഏഷ്യന് കപ്പ് യോഗ്യതാ മത്സരത്തിന് സെക്യൂരിറ്റി ഡെപ്പോസിറ്റ് തുകയുടെ പേരില് തടസ്സവാദങ്ങള് ഉന്നയിക്കുന്ന ജി.സി.ഡി.എ നിലപാട് കടുത്ത പ്രതിഷേധത്തിന് കാരണമാകുന്നു. സെക്യൂരിറ്റി ഡെപ്പോസിറ്റായ 25 ലക്ഷം രൂപ പൂര്ണ്ണമായും അടയ്ക്കാതെ സ്റ്റേഡിയം വിട്ടുനല്കില്ലെന്ന വാശിയിലാണ് അധികൃതര്.
വാടകയിനത്തില് 3,54,000 രൂപ കേരള ഫുട്ബോള് അസോസിയേഷന് (കെ.എഫ്.എ) ഇതിനകം അടച്ചിട്ടുണ്ട്. മാര്ച്ച് 31-നാണ് നിര്ണ്ണായകമായ മത്സരം നിശ്ചയിച്ചിരിക്കുന്നത്. എന്നാല്, സെക്യൂരിറ്റി ഡെപ്പോസിറ്റില് സാവകാശം ചോദിച്ച കെ.എഫ്.എയുടെ അപേക്ഷ തള്ളിയ ജി.സി.ഡി.എ, വ്യാഴാഴ്ച നടത്താനിരുന്ന വാര്ത്താസമ്മേളനത്തിന് പോലും സ്റ്റേഡിയത്തില് അനുമതി നല്കിയില്ല. ഇന്ത്യ എന്ന വികാരം പോലും മനസ്സിലാക്കാതെയാണ് ജി.സി.ഡി.എ പെരുമാറുന്നതെന്ന ആക്ഷേപം ശക്തമാണ്. വാര്ത്താസമ്മേളനത്തിനായി എത്തിയ ഇന്ത്യന് കോച്ച് ഖാലിദ് ജമീല്, പ്രമുഖ താരങ്ങളായ ആഷിഖ് കുരുണിയന്, സഹല് അബ്ദുള് സമദ്, ബിജോയ് വര്ഗീസ് എന്നിവരെ സ്റ്റേഡിയത്തില് പ്രവേശിക്കുന്നതില് നിന്ന് സുരക്ഷാ ഉദ്യോഗസ്ഥര് തടഞ്ഞത് നാണക്കേടായി. സ്വന്തം നാട്ടിലെ താരങ്ങളെ പോലും അപമാനിക്കുന്ന നിലപാടാണ് അധികൃതരുടെ ഭാഗത്തുനിന്നുണ്ടായത്.
നേരത്തെ കേരള ബ്ലാസ്റ്റേഴ്സ് മാനേജ്മെന്റിനെയും സമാനമായ രീതിയില് ജി.സി.ഡി.എ അപമാനിച്ചിരുന്നു. കഴിഞ്ഞ മാസം ബ്ലാസ്റ്റേഴ്സ് കോച്ചിനെയും താരങ്ങളെയും വാര്ത്താസമ്മേളനത്തിനിടെ മുറിയില് നിന്ന് ഇറക്കിവിട്ട നടപടി വലിയ വിവാദമായിരുന്നു. പ്രൊഫഷണല് ക്ലബ്ബുകളോടും ദേശീയ ടീമിനോടും ജി.സി.ഡി.എ കാട്ടുന്ന ഈ വിവേചനം കായിക പ്രേമികളെ ചൊടിപ്പിക്കുന്നുണ്ട്. ജി.സി.ഡി.എയുടെ ഈ ഇരട്ടത്താപ്പിന് പിന്നില് വലിയ രാഷ്ട്രീയമുണ്ടെന്ന് ആരോപണമുയരുന്നു. ലയണല് മെസ്സിയെ കൊച്ചിയില് എത്തിക്കുമെന്ന പേരില് യാതൊരു കരാറുമില്ലാതെ തട്ടിപ്പ് നടത്താന് ശ്രമിച്ചവര്ക്ക് സ്റ്റേഡിയം വിട്ടുനല്കിയ ചരിത്രമാണ് ജി.സി.ഡി.എയ്ക്കുള്ളത്. മെസ്സിയുടെ പേരില് ഫണ്ടുണ്ടാക്കാന് ശ്രമിച്ചവര്ക്ക് എല്ലാ സൗകര്യവും നല്കിയവര് ഇപ്പോള് ദേശീയ ടീമിനോട് മുഖം തിരിക്കുകയാണ്.
മെസ്സി വരുമെന്ന് തെറ്റിദ്ധരിപ്പിച്ച് ഫണ്ട് പിരിക്കാന് ശ്രമിച്ചവര്ക്ക് കൂട്ടുനിന്ന ജി.സി.ഡി.എ, രാജ്യത്തിന് വേണ്ടി ബൂട്ടണിയുന്ന താരങ്ങളോട് കാണിക്കുന്നത് കടുത്ത അവഗണനയാണ്. പണം മാത്രമാണ് ലക്ഷ്യമെങ്കില് എന്തിനാണ് കായിക പ്രോത്സാഹനം എന്ന പേരില് ഇവര് സ്റ്റേഡിയം കൈവശം വെച്ചിരിക്കുന്നത് എന്ന ചോദ്യം ഉയരുന്നു. ഇന്ത്യന് ഫുട്ബോളിന്റെ വളര്ച്ചയില് നിര്ണ്ണായക പങ്കുവഹിക്കേണ്ട സ്ഥാപനം തടസ്സവാദങ്ങള് ഉയര്ത്തുന്നത് അംഗീകരിക്കാനാവില്ല. ഏഷ്യന് കപ്പ് യോഗ്യത പോലുള്ള അന്താരാഷ്ട്ര പ്രാധാന്യമുള്ള മത്സരങ്ങള്ക്ക് ആതിഥേയത്വം വഹിക്കുമ്പോള് കാണിക്കേണ്ട മിനിമം മര്യാദ പോലും ജി.സി.ഡി.എ കാട്ടുന്നില്ല. മത്സരത്തിനായി തയ്യാറെടുക്കുന്ന താരങ്ങളുടെ മനോവീര്യത്തെ ബാധിക്കുന്ന തരത്തിലാണ് ജി.സി.ഡി.എയുടെ ഇടപെടലുകള്. പണത്തിന്റെ പേരില് താരങ്ങളെ സ്റ്റേഡിയത്തിന് പുറത്ത് നിര്ത്തുന്നത് രാജ്യത്തിന് തന്നെ അപമാനമാണ്. ഫുട്ബോള് അസോസിയേഷനുമായുള്ള തര്ക്കങ്ങള് ചര്ച്ചയിലൂടെ പരിഹരിക്കാന് ശ്രമിക്കാതെ വാര്ത്താസമ്മേളനം തടഞ്ഞത് ധിക്കാരപരമായ നടപടിയാണ്.
കൊച്ചിയിലെ ഫുട്ബോള് ആരാധകര് ജി.സി.ഡി.എയുടെ നിലപാടിനെതിരെ സോഷ്യല് മീഡിയയില് പ്രതിഷേധം രേഖപ്പെടുത്തിക്കഴിഞ്ഞു. വന്കിട തട്ടിപ്പുകാര്ക്ക് വാതില് തുറന്നിടുന്നവര് നാടിന്റെ അഭിമാനമായ താരങ്ങളെ പുറത്തുനിര്ത്തുന്നത് വിരോധാഭാസമാണെന്ന് അവര് ചൂണ്ടിക്കാട്ടുന്നു. സര്ക്കാര് തലത്തില് ഉടന് ഇടപെടലുണ്ടായില്ലെങ്കില് ഇന്ത്യ-ഹോങ്കോംഗ് മത്സരം തന്നെ പ്രതിസന്ധിയിലായേക്കാം. കായിക വകുപ്പ് ഇടപെട്ട് ജി.സി.ഡി.എയുടെ ഈ കടുംപിടുത്തം അവസാനിപ്പിക്കണമെന്നാണ് ഫുട്ബോള് പ്രേമികളുടെ ആവശ്യം. രാജ്യസ്നേഹവും കായിക താല്പര്യവും മുന്നിര്ത്തി സ്റ്റേഡിയം വിട്ടുനല്കാന് ജി.സി.ഡി.എ തയ്യാറാകണം.
ലയണല് മെസ്സിയെ കൊച്ചിയില് എത്തിക്കുമെന്ന പേരില് യാതൊരു കരാറുമില്ലാതെ തട്ടിപ്പിന് തുനിഞ്ഞവര്ക്ക് സ്റ്റേഡിയം മലര്ക്കെ തുറന്നുകൊടുത്ത ചരിത്രമാണ് ജി.സി.ഡി.എയ്ക്കുള്ളത്. അന്ന് മെസ്സിയുടെ പേരില് ഫണ്ടുണ്ടാക്കാന് നോക്കിയവര്ക്ക് എല്ലാ സൗകര്യവും നല്കിയവര് സ്റ്റേഡിയത്തിന്റെ മേല്ക്കൂര പോലും നശിപ്പിച്ചു. യാതൊരു സുരക്ഷാ മാനദണ്ഡങ്ങളും പാലിക്കാതെ അന്ന് കൂട്ടുനിന്നവര് ഇന്ന് രാജ്യത്തിന് വേണ്ടി കളിക്കാനിറങ്ങുന്ന ഇന്ത്യന് ടീമിനോട് ഇങ്ങനെ കാട്ടുന്നത് വിരോധാഭാസമാണ്.
സ്വന്തം നാട്ടിലെ താരങ്ങളെ പടിക്കല് തടയുന്ന ജി.സി.ഡി.എയുടെ 'അഹങ്കാരത്തിന്' എതിരെ കായിക പ്രേമികള് രംഗത്തിറങ്ങിക്കഴിഞ്ഞു. നേരത്തെ കേരള ബ്ലാസ്റ്റേഴ്സിനോടും ഇതേ സമീപനമാണ് ഇവര് സ്വീകരിച്ചത്.
