കുട്ടിയുടെ മൃതദേഹം കണ്ടെത്തിയ പ്രദേശത്ത് രണ്ട് മൂന്ന് തവണ തിരച്ചില് നടത്തിയിരുന്നു; മറ്റൊരു മലയുടെ ചെരിവില് വെച്ചാണ് ശ്രീനന്ദയെ കാണാതായത്; ആരോ അപായപ്പെടുത്തിയതാണെന്ന് ബന്ധുക്കള്; പോസ്റ്റ്മോര്ട്ടം ഇന്ന് തന്നെ നടത്തും; കുടുംബത്തിന്റെ ആരോപണങ്ങള് പരിശോധിക്കുമെന്ന് ചിക്ക്മഗളൂരു പൊലീസ്
ചിക്കമഗളൂരു: കര്ണാടകയിലെ ചിക്കമംഗലൂരില് വിനോദസഞ്ചാരത്തിനിടെ ദുരൂഹ സാഹചര്യത്തില് മരിച്ച പാലക്കാട് കടമ്പഴിപ്പുറം സ്വദേശിയായ പെണ്കുട്ടി ശ്രീനന്ദയുടെ പോസ്റ്റ്മോര്ട്ടം ഇന്ന് തന്നെ പൂര്ത്തിയാക്കാന് നിര്ദേശം. പോസ്റ്റ്മോര്ട്ടത്തിന്റെ സമയം കഴിഞ്ഞാലും പ്രത്യേക കേസായി പരിഗണിക്കാനാണ് ചിക്കമഗളൂരു ജില്ലാ കളക്ടര് ഉദ്യോഗസ്ഥര്ക്ക് നിര്ദേശം നല്കിയത്. ചിക്കമഗളൂരു ജില്ലാ ആശുപത്രിയിലാണ് ശ്രീനന്ദയുടെ പോസ്റ്റ്മോര്ട്ടം നടത്തുക. പോസ്റ്റ്മോര്ട്ടം പൂര്ത്തിയായാല് മൃതദേഹം രാത്രിയോടെ നാട്ടിലേക്ക് കൊണ്ടുപോകുമെന്ന് കുടുംബം അറിയിച്ചു.
ശ്രീനന്ദയുടെ മൃതദേഹം കണ്ടെത്തിയ സ്ഥലത്ത് സോകോ ടീമിന്റെ പരിശോധന തുടരുകയാണ്. ശ്രീനന്ദയുടെ അച്ഛന്റെ സാന്നിധ്യത്തിലാണ് പരിശോധന. കുടുംബത്തിന്റെ ആരോപണം പരിശോധിക്കുമെന്നും ഒരു സാധ്യതയും തള്ളില്ലെന്നും ചിക്ക്മഗളൂരു എസ്പി ജിതേന്ദ്ര ദയമ വ്യക്തമാക്കി. നാല് ദിവസം നീണ്ട തിരച്ചിലിനൊടുവിലാണ് ശ്രീനന്ദയുടെ മൃതദേഹം കണ്ടെത്തിയത്. പത്ത് മിനിറ്റുകള് കൊണ്ട് അപ്രത്യക്ഷയായ ശ്രീനന്ദയെ കാത്ത്, മണിക്കധാര വെള്ളച്ചാട്ടത്തിന്റെ വ്യൂ പോയിന്റില് അമ്മയും അച്ഛനും ബന്ധുക്കളും കാത്തിരുന്നത് മൂന്ന് രാത്രിയും നാല് പകലുമാണ്. 1500 അടി താഴ്ചയില് നിന്നാണ് സ്പെഷ്യല് ടാക്സ് ഫോഴ്സ് അംഗങ്ങള് മൃതദേഹം കണ്ടെത്തിയത്.
നാലാം ദിവസത്തെ തെരച്ചിലിനൊടുവിലാണ് 15കാരിയായ ശ്രീനന്ദയെ മരിച്ച നിലയില് കണ്ടെത്തി. കുട്ടിയെ കാണാതായ മാണിക്കധാര വെള്ളച്ചാട്ടത്തിന്റെ വ്യൂ പോയിന്റിന് സമീപം 1500 അടി താഴ്ചയില് നിന്നാണ് കുട്ടിയുടെ മൃതദേഹം കണ്ടെത്തിയത്. തെര്മല് ഡ്രോണിലാണ് കുട്ടിയുടെ മൃതദേഹത്തിന്റെ ദൃശ്യം ആദ്യം പതിഞ്ഞത്. 100 അംഗ സംഘമാണ് ശ്രീനന്ദയ്ക്ക് വേണ്ടി തെരച്ചില് നടത്തിയിരുന്നത്. ശ്രീനന്ദയെ കാണാതായ സ്ഥലത്തിന്റെ താഴ്വരയില് നിന്ന് മുകളിലേക്ക് നടത്തിയ തെരച്ചിലിലാണ് മൃതദേഹം കണ്ടെത്തിയത്. കുടുംബത്തിനൊപ്പം ഉല്ലാസയാത്രയുടെ ഭാഗമായാണ് ശ്രീനന്ദ ഈ പ്രദേശത്ത് എത്തിയത്. മരണത്തില് ദുരൂഹതയുണ്ടെന്നാണ് ബന്ധുക്കള് ആരോപിക്കുന്നത്.
പാലക്കാട് കടമ്പഴിപ്പുറത്തെ രമേശ്, രോഹിണി ദമ്പതിമാരുടെ മകളാണ് ശ്രീനന്ദ. ചൊവ്വാഴ്ച വൈകീട്ടോടെയാണ് ശ്രീനന്ദയെ കാണാതായത്. വൈകീട്ട് 5.20 വരെ കുട്ടി മാതാപിതാക്കളുടെ കൂടെ ശ്രീനന്ദ ഉണ്ടായിരുന്നു. പിന്നീട് പെട്ടെന്ന് കാണാതായി. മാതാപിതാക്കള് ഉള്പ്പടെ 40 പേരുള്ള ഒരു സംഘത്തില് നിന്നാണ് കുട്ടിയെ കാണാതായത്. പാലക്കാട് നിന്നുള്ള സംഘം സന്ദര്ശിക്കുമ്പോള് മറ്റ് 10 പേര് കൂടി സ്ഥലത്ത് ഉണ്ടായിരുന്നു. ഇവരെ സിസിടിവി ദൃശ്യങ്ങള് വഴി തിരിച്ചറിയാന് ശ്രമിക്കുന്നുണ്ട്.
ദുരൂഹത ആരോപിച്ച് കുടുംബം
ശ്രീനന്ദയുടെ മരണത്തില് ദുരൂഹത ആരോപിച്ച് കുടുംബം രംഗത്ത് വന്നിരുന്നു. കുട്ടിയെ കാണാതായ പ്രദേശത്ത് നിന്നല്ല മൃതദേഹം കിട്ടിയതെന്ന് ശ്രീനന്ദയുടെ അച്ഛന്റെ സഹോദരന് ശശി കുമാര് പറഞ്ഞു. ആ സ്ഥലത്ത് രണ്ട് മൂന്ന് തവണ തിരച്ചില് നടത്തിയിരുന്നുവെന്നും അദ്ദേഹം പറഞ്ഞു. 'കുട്ടിയെ കണ്ടെത്തിയ പ്രദേശത്ത് രണ്ട് മൂന്ന് തവണ തിരച്ചില് നടത്തിയിരുന്നു. ഈ പറയുന്ന മേഖലയില് ഞങ്ങള് നേരിട്ട് തിരച്ചില് നടത്തിയതാണ്. 300,400 അടി വരെ ഞങ്ങള് ഇറങ്ങി പരിശോധിച്ചതാണ്. ആ പ്രദേശത്ത് വെച്ചല്ല കുട്ടിയെ കാണാതായത്. 150 മീറ്റര് അപ്പുറത്ത് മറ്റൊരു മലയുടെ ചെരിവില് വെച്ചാണ് കാണാതായത്. ഡോഗ് സ്ക്വാഡ് വന്നപ്പോഴും ഈ പ്രദേശത്തിന് നേരെ ഓപ്പസിറ്റായിട്ടാണ് പൊലീസ് നായ ഓടിയത്. കടയുടെ അടുത്ത് വരെ നായ മണം പിടിച്ച് വന്നിട്ടുണ്ട്', ശശി കുമാര് പറഞ്ഞു.
കടയുടെ ഭാഗത്ത് വെച്ച് ആരോ കുട്ടിയെ അപായപ്പെടുത്തിയെന്നാണ് സംശയമെന്നും അദ്ദേഹം പറഞ്ഞു. അവസാനം കുട്ടി പോയത് ആ കടയിലാണെന്നും ആ കടയില് മിക്കവാറും ആളുകള് ഉണ്ടാകാറുണ്ടെന്നും അദ്ദേഹം കൂട്ടിച്ചേര്ത്തു. 'പൊലീസുകാരോട് ആദ്യമേ പറഞ്ഞതാണ് അവിടെ ചോദ്യം ചെയ്യാന്, എന്നാല് ഇതുവരെ അങ്ങനെ ഒരു സംഭവം നടന്നിട്ടില്ലെന്നാണ് പൊലീസ് പറഞ്ഞത്. അപകടം സംഭവിച്ചിട്ടുണ്ടെന്നും മിസ്സിങ് ഇതുവരെ നടന്നിട്ടില്ലെന്നും പൊലീസ് പറഞ്ഞു', ശശി കുമാര് പറഞ്ഞു.
തെരച്ചില് ഊര്ജിതമല്ലെന്ന് ആരോപിച്ച് കുടുംബം ഇന്ന് രംഗത്തെത്തിയിരുന്നു. കുട്ടിയെ തട്ടിക്കൊണ്ടുപോയോ എന്ന സംശയവും മാതാപിതാക്കള് നേരത്തെ തന്നെ പങ്കുവെച്ചിരുന്നു. ഏപ്രില് ഏഴ് ചൊവ്വാഴ്ച വൈകീട്ടോടെയാണ് ശ്രീനന്ദയെ കാണാതാകുന്നത്. പാലക്കാട് കടമ്പഴിപ്പുറത്ത് നിന്ന് കുടുംബം അടക്കമുള്ള 40 അംഗ സംഘത്തിനൊപ്പം ചിക്കമഗളൂരുവില് എത്തിയതായിരുന്നു ശ്രീനന്ദ. മാണിക്യധാര വെള്ളച്ചാട്ടത്തിന് സമീപത്തുവെച്ചായിരുന്നു ശ്രീനന്ദയെ കാണാതാകുന്നത്. പൊലീസ്, വനംവകുപ്പ്, അഗ്നിരക്ഷാസേന എന്നിവര് ഉള്പ്പെടുന്ന 100 അംഗ സ്പെഷ്യല് ടാസ്ക് ഫോഴ്സാണ് നിലവില് തെരച്ചില് നടത്തിയത്. തെര്മല് ഡ്രോണുകളും പൊലീസ് നായയെ ഉപയോഗിച്ചാണ് പരിശോധന നടത്തിയത്.
