വീഴ്ചയില്‍ നടുവിന് പരുക്കേറ്റു കിടപ്പിലായപ്പോള്‍ ആശുപത്രിയില്‍ എത്തിച്ച് പരിചരിച്ചു; മരണശേഷം ഹൈന്ദവ ആചാരപ്രകാരം അന്ത്യകര്‍മ്മങ്ങള്‍ ചെയ്ത് പഞ്ചായത്ത് അംഗം; ആരോരും അഭയമില്ലാത്ത ശിവശങ്കരന് നായര്‍ക്ക് മെമ്പറും നാട്ടുകാരും ചേര്‍ന്ന അന്ത്യയാത്ര നല്‍കിയത് ഇങ്ങനെ
ആരോരും അഭയമില്ലാത്ത ശിവശങ്കരന് നായര്‍ക്ക് മെമ്പറും നാട്ടുകാരും ചേര്‍ന്ന അന്ത്യയാത്ര നല്‍കി
കോട്ടയം: ഈ കാലത്ത് ഇങ്ങനെയും ഒരു പഞ്ചായത്തംഗമോ..ആരോരുമില്ലാത്ത വയോധികനെ പരിചരിച്ച് മരണശേഷം സ്വന്തം വീട്ടില്‍ പൊതുദര്‍ശനം വച്ച് അന്ത്യകര്‍മ്മങ്ങള്‍ ചെയ്ത് സംസ്‌ക്കാരം നടത്തിയ പഞ്ചായത്തംഗം കോട്ടയം ജില്ലയിലുണ്ട്. പാലായ്ക്ക് സമീപം കരൂര്‍ പഞ്ചായത്തിലെ വള്ളിച്ചിറയിലെത്തിയാല്‍ ആരും മെമ്പറെ നോക്കി ഇങ്ങനെ ചോദിച്ചു പോകും. ഏറെക്കാലം കടത്തിണ്ണയില്‍ അന്തിയുറങ്ങിയിരുന്ന ശിവശങ്കരന് നായര്‍ (75) ക്ക് താങ്ങായും തണലായും മെമ്പറുടെ നേതൃത്വത്തില്‍ നാട്ടുകാര്‍ നിന്നു. അന്ത്യയാത്രയില്‍ മെമ്പറുടെ വീട്ടില്‍ തന്നെ മൃതദേഹം പൊതുദര്‍ശനത്തിന് വച്ചു. ഹൈന്ദവ ആചാരപ്രകാരം അന്ത്യകര്‍മ്മങ്ങള്‍ ചെയ്തതും മെമ്പര്‍ തന്നെ.
കോട്ടയം ജില്ലയിലെ പാലാ കരൂര്‍ ഗ്രാമപഞ്ചായത്തിലെ 11 ാം വാര്‍ഡിലെ സ്വതന്ത്ര അംഗമായ പ്രിന്‍സ് അഗസ്റ്റിനാണ് അന്ത്യകര്‍മ്മങ്ങള്‍ ചെയ്തത്. ഉറ്റവരും ഉടയവരുമില്ലാതെ കഴിഞ്ഞ കണിയാരംപറമ്പില്‍ ശിവശങ്കരന് നായരുടെ മൃതദേഹമാണ് പാലായില്‍ പൊതുശ്മശാനത്തില്‍ സംസ്‌കരിച്ചത്. അവിവാഹിതനായ ശിവശങ്കരന് നായര്‍ കടത്തിണ്ണയിലാണ് കഴിഞ്ഞിരുന്നത്.
വാര്‍ധക്യകാലത്ത് അദ്ദേഹത്തിന് തുണയായി മാറുകയായിരുന്നു പ്രിന്‍സ് മെമ്പറും നാട്ടുകാരും.. ചെറുകര സെന്റ് മേരീസ് പള്ളിയുടെ നേതൃത്വത്തില്‍ ചെറിയ വീട് നിര്‍മ്മിച്ചു നല്‍കി. മാസങ്ങള്‍ക്ക് മുന്‍പ് വീഴ്ച്ചയില്‍ നട്ടെല്ലിന് പരുക്കേറ്റതോടെ കിടപ്പിലായി. അടുത്ത ബന്ധുക്കളൊന്നുമില്ലാത്ത ശിവശങ്കരന് നായരുടെ ചികിത്സ സഹായവും മറ്റും പ്രിന്‍സിന്റെ നേതൃത്വത്തില്‍ നാട്ടുകാര്‍ ഏറ്റെടുത്തു. എട്ടു മാസത്തോളം മെമ്പറും സുഹൃത്തുക്കളുമാണ് ആശുപത്രിയില്‍ ശിവശങ്കരന്ആശ്രയമായത്. നാട്ടുകാരില്‍ ചിലരെ ഭക്ഷണം നല്‍കുന്നതിനും ഏര്‍പ്പാടാക്കി.
വീഡിയോ കാണാം:
https://youtu.be/OAD5-BFLE6Q?si=O0erykaB92xMlt8K
