മുട്ടില്‍ ഇഴഞ്ഞു; കല്ലുപ്പില്‍ മുട്ടുക്കുത്തി നിന്നും ശയനപ്രദക്ഷിണവും പാട്ടകുലുക്കി ഭിക്ഷയാചിച്ചും സമരം നടത്തി; എന്നിട്ടും കണ്ണ് തുറക്കാതെ സര്‍ക്കാര്‍; വനിതാ സിപിഒ റാങ്ക് ലിസ്റ്റ് കാലാവധി ഇന്ന് അവസാനിക്കും; പ്രതീക്ഷയും അകന്ന് സമരക്കാര്‍
തിരുവനന്തപുരം: സെക്രട്ടേറിയറ്റിന് മുന്നില്‍ തങ്ങളുടെ അടിസ്ഥാനാവകാശങ്ങള്‍ക്കായി പ്രതീക്ഷയോടെ നീതിയേന്തി നില്ക്കുന്ന വനിതാ സിവില്‍ പൊലീസ് ഓഫീസര്‍ ഉദ്യോഗാര്‍ത്ഥികള്‍ക്ക് നിരാശ മാത്രം. ഏപ്രില്‍ 20, 2023-ന് പ്രസിദ്ധീകരിച്ച റാങ്ക് ലിസ്റ്റിന്റെ കാലാവധി ഇന്നോടെ അവസാനിക്കാനിരിക്കെ, നിലവിലെ സ്ഥിതിഗതികള്‍ അവരുടെ പ്രതീക്ഷകള്‍ക്ക് മങ്ങിയ നിറമാണ് നല്‍കുന്നത്.
മുട്ടിലിഴഞ്ഞും കല്ലുപ്പില്‍ മുട്ടുകുത്തി നിന്നും ശയനപ്രദക്ഷിണം നടത്തിയും പാട്ടകുലുക്കി ഭിക്ഷയാചിച്ചും സഹനത്തിന്റെ സമര മുറകള്‍ പലതും പയറ്റിയിട്ടും വനിത ഉദ്യോഗാര്‍ത്ഥികള്‍ക്ക് നിരാശയാണ് ഫലം. നിലവില്‍ 964 പേര്‍ ഉള്‍പ്പെട്ട റാങ്ക് ലിസ്റ്റില്‍ 30% പേര്‍ക്ക് മാത്രമാണ് നിയമനം ലഭിച്ചിട്ടുള്ളത്. കഴിഞ്ഞ ദിവസം മാത്രം 45 പേര്‍ക്ക് നിയമന ശുപാര്‍ശ നല്‍കിയിട്ടുണ്ടെങ്കിലും, പട്ടികയില്‍ കൂടുതല്‍ പേര്‍ക്ക് അവസരം നല്‍കണമെന്ന ആവശ്യത്തിലാണ് സമരം ശക്തമാകുന്നത്.
രാപ്പകല്‍ സമരവും പ്രതിഷേധ പ്രകടനങ്ങളും പതിവായിത്തീര്‍ന്നിരിക്കെയാണ് ഉദ്യോഗാര്‍ത്ഥികള്‍ പ്രതീക്ഷയോടെ ഇനിയും കൂടുതല്‍ നിയമനത്തിന് വഴിയൊരുങ്ങുമോ എന്ന ചോദ്യവുമായി മുന്നോട്ടു പോകുന്നത്. കഴിഞ്ഞ ദിവസവും പ്രതീകാത്മക ബാലറ്റ് പെട്ടിയില്‍ വോട്ട് ചെയ്തും, റീത്ത് വച്ചും സമരക്കാര്‍ പ്രതിഷേധിച്ചിരുന്നു. എന്നിട്ടും അധികാരികളില്‍ നിന്ന് അനുകൂല പ്രതികരണം ലഭിച്ചിട്ടില്ലെന്നു സമരക്കാര്‍ പറയുന്നു.
സമരം ആരംഭിച്ച് ഈ മാസം രണ്ടാമത്തെ ആഴ്ചയായപ്പോഴും ഭരണകൂടത്തിന്റെ നിലപാട് മാറ്റമില്ലാത്തത്, സമരത്തിന്റെ സങ്കീര്‍ണ്ണത വര്‍ധിപ്പിച്ചിരിക്കുകയാണ്. റാങ്ക് ലിസ്റ്റ് അവസാനിക്കുന്ന നിമിഷം വരെ നിയമനം ലഭിക്കുമെന്ന പ്രതീക്ഷയില്‍ മുന്നോട്ടുള്ള ഓരോ മിനിറ്റും ഇവര്‍ക്കു നിമിഷമല്ല, ശ്വാസം അടുക്കുന്ന അനുഭവമായിരിക്കും. സമരക്കാര്‍ക്ക് പൂര്‍ണ നീതി ലഭിക്കുമോയെന്നും, സര്‍ക്കാര്‍ ഇതിനെ മാനവികമായി സമീപിക്കുമോയെന്നുമുള്ള ചോദ്യത്തിന് ഉത്തരമാകുന്നത് ഇന്ന് നിലനില്‍ക്കുന്ന നിശ്ശബ്ദത മറികടക്കുമ്പോഴാണ്.
