ഫ്ലൈഓവർ കണ്ടതും ഒരു 'റീൽ' എടുക്കാൻ മോഹം; രണ്ടുംകല്പിച്ച് സ്ലാബിന് മുകളിലൂടെ ഡാൻസ് കളിച്ച് നടത്തം; ഷൂട്ട് തുടങ്ങി കുറച്ച് കഴിഞ്ഞതും തീർത്തും അസ്വസ്ഥത പെടുത്തുന്ന കാഴ്ച; കണ്ടു നിൽക്കാൻ പറ്റാതെ ആളുകൾ അവിടെ നിന്ന് മാറി; യുവാവിന് പറ്റിയത്

ബറേലി: സോഷ്യൽ മീഡിയ പ്ലാറ്റ്‌ഫോമുകളിൽ പ്രശസ്തിയും ലൈക്കുകളും തേടിയുള്ള ഇന്നത്തെ തലമുറയുടെ അപകടകരമായ യാത്രകൾ പലപ്പോഴും ചെന്നെത്തുന്നത് തീരാദുഃഖങ്ങളിലേക്കാണ്. അത്തരത്തിൽ വിറങ്ങലിപ്പിക്കുന്ന ഒരു വാർത്തയാണ് ഉത്തർപ്രദേശിലെ ബറേലിയിൽ നിന്നും പുറത്തുവരുന്നത്. നിർമ്മാണത്തിലിരിക്കുന്ന ഫ്ലൈഓവറിന് മുകളിൽ വെച്ച് റീൽസ് ചിത്രീകരിക്കുന്നതിനിടെ കോൺക്രീറ്റ് സ്ലാബ് തലയിൽ വീണ് മുഹമ്മദ് ഫൈസാൻ എന്ന 22 വയസ്സുകാരൻ ദാരുണമായി കൊല്ലപ്പെട്ടു. കഴിഞ്ഞ വെള്ളിയാഴ്ച വൈകുന്നേരമാണ് നാടിനെ നടുക്കിയ ഈ സംഭവം ഉണ്ടായത്.

ബറേലിയിലെ നവാബ്ഗഞ്ച് പോലീസ് സ്റ്റേഷൻ പരിധിയിലുള്ള ബിസോറിയ റെയിൽവേ സ്റ്റേഷന് സമീപമാണ് അപകടം നടന്ന ഫ്ലൈഓവർ സ്ഥിതി ചെയ്യുന്നത്. റിച്ചോള ഗ്രാമത്തിൽ നിന്നുള്ള ഫൈസാൻ തന്റെ സുഹൃത്തായ അനുജിനൊപ്പമാണ് ദൃശ്യങ്ങൾ ചിത്രീകരിക്കാനായി ഇവിടെയെത്തിയത്. പ്രൊഫഷണൽ ഹെയർഡ്രെസ്സറായി ജോലി ചെയ്തിരുന്ന ഫൈസാൻ, സമൂഹമാധ്യമങ്ങളിൽ സജീവമായിരുന്നു. കൂടുതൽ ആളുകളിലേക്ക് എത്തുന്ന തരത്തിലുള്ള വീഡിയോകൾ ചെയ്യുന്നതിനായി ഫ്ലൈഓവറിൽ അടുക്കിവച്ചിരുന്ന ഭീമാകാരമായ കോൺക്രീറ്റ് സ്ലാബുകൾക്ക് മുകളിലാണ് ഇയാൾ നൃത്തം ചെയ്യാനായി തിരഞ്ഞെടുത്തത്.

അപകടത്തിന്റെ ഭീകരത വ്യക്തമാക്കുന്ന ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്. കോൺക്രീറ്റ് സ്ലാബുകൾക്ക് മുകളിലൂടെ നൃത്തം ചെയ്ത് നീങ്ങുന്നതിനിടെ, ഒരു സ്ലാബ് അപ്രതീക്ഷിതമായി തെന്നിമാറുകയായിരുന്നു. നിയന്ത്രണം നഷ്ടപ്പെട്ട ഫൈസാൻ സ്ലാബുകൾക്കിടയിലൂടെ താഴേക്ക് വഴുതി വീണു. ഫൈസാൻ താഴെ പതിച്ചതിന് തൊട്ടുപിന്നാലെ, മുകളിലുണ്ടായിരുന്ന ഭാരമേറിയ മറ്റൊരു കോൺക്രീറ്റ് സ്ലാബ് ഇയാളുടെ തലയിലേക്ക് തന്നെ മറിഞ്ഞുവീണു. അതീവ ഗുരുതരമായി പരിക്കേറ്റ ഫൈസാൻ നിമിഷങ്ങൾക്കുള്ളിൽ തന്നെ മരണത്തിന് കീഴടങ്ങി. കൂടെയുണ്ടായിരുന്ന സുഹൃത്ത് പകച്ചുപോയ നിമിഷമായിരുന്നു അത്.

ശബ്ദം കേട്ടെത്തിയ നാട്ടുകാരും വഴിയാത്രക്കാരും ചേർന്ന് ഉടൻ തന്നെ പോലീസിനെ വിവരമറിയിച്ചു. നവാബ്ഗഞ്ച് പോലീസ് സ്ഥലത്തെത്തി സ്ലാബുകൾക്കിടയിൽ കുടുങ്ങിയ ഫൈസാനെ പുറത്തെടുത്ത് ഉടൻ തന്നെ ആശുപത്രിയിൽ എത്തിച്ചെങ്കിലും മരണം നേരത്തെ സംഭവിച്ചിരുന്നതായി ഡോക്ടർമാർ സ്ഥിരീകരിച്ചു. സംഭവത്തിന്റെ വീഡിയോ ദൃശ്യങ്ങൾ ഇപ്പോൾ ഇന്റർനെറ്റിൽ വ്യാപകമായി പ്രചരിക്കുന്നുണ്ട്, ഇത് കണ്ടവർക്കെല്ലാം വലിയൊരു നടുക്കമാണ് ഉണ്ടാക്കിയിരിക്കുന്നത്.

യുവതലമുറക്കിടയിൽ വർദ്ധിച്ചു വരുന്ന ഈ "റീൽസ് ഭ്രമ"ത്തിനെതിരെ കടുത്ത ഭാഷയിലാണ് പോലീസ് പ്രതികരിച്ചത്. "ഓൺലൈൻ ലോകത്തെ താൽക്കാലിക പ്രശസ്തിക്കും ലൈക്കുകൾക്കും വേണ്ടി സ്വന്തം ജീവൻ പണയപ്പെടുത്തരുത്. നിർമ്മാണ സ്ഥലങ്ങളോ അപകടസാധ്യതയുള്ള മേഖലകളോ ഇത്തരം വിനോദങ്ങൾക്കായി ഉപയോഗിക്കുന്നത് ആത്മഹത്യാപരമാണ്," എന്ന് പോലീസ് വൃത്തങ്ങൾ മുന്നറിയിപ്പ് നൽകി.

മുഹമ്മദ് ഫൈസാന്റെ മരണം ഒരു ഗ്രാമത്തെ മുഴുവൻ കണ്ണീരിലാഴ്ത്തിയിരിക്കുകയാണ്. ഒരു മികച്ച കരിയർ മുന്നിലുണ്ടായിരുന്ന ഒരു യുവാവിന്റെ സ്വപ്നങ്ങളാണ് ഒരു നിമിഷത്തെ അശ്രദ്ധ കൊണ്ട് പൊലിഞ്ഞുപോയത്. റെയിൽവേ പാളങ്ങളിലും, ഉയരമുള്ള കെട്ടിടങ്ങളിലും, തിരക്കേറിയ റോഡുകളിലും ക്യാമറയുമായി ഇറങ്ങുന്നവർ ഈ വാർത്ത ഒരു പാഠമായി ഉൾക്കൊള്ളേണ്ടതുണ്ട്. സ്ക്രീനിലെ ലൈക്കുകളേക്കാൾ വിലപ്പെട്ടതാണ് യഥാർത്ഥ ജീവിതമെന്ന് ഓർമ്മിപ്പിച്ചുകൊണ്ട് ഫൈസാന്റെ വിയോഗം ഒരു വലിയ നൊമ്പരമായി മാറുന്നു.