'എന്തുകണ്ടിട്ടാണ് ഇയാളെ വിവാഹം ചെയ്തത്?, ഇതിന് പിന്നിലെ കാരണം എന്തായിരിക്കും?'; വിവാഹഫോട്ടോയ്ക്ക് വന്നത് പരിഹാസ കമന്റുകൾ; സ്നേഹബന്ധങ്ങളെക്കാൾ ബാഹ്യരൂപത്തിന് പ്രാധാന്യം നൽകുന്ന പ്രവണതകൾക്കെതിരെയുള്ള സന്ദേശമായി വരന്റെ മറുപടി
ഭോപ്പാൽ: മധ്യപ്രദേശിൽ പതിനൊന്ന് വർഷത്തെ പ്രണയത്തിനൊടുവിൽ വിവാഹിതരായ മധ്യപ്രദേശിൽ നിന്നുള്ള ദമ്പതികളുടെ സന്തോഷകരമായ നിമിഷങ്ങൾക്ക് നേരെ സമൂഹമാധ്യമങ്ങളിൽ വ്യാപകമായ സൈബർ ആക്രമണം. വരനായ റിഷഭ് രജ്പുത്തിന്റെ നിറത്തെ ചൊല്ലിയാണ് സോഷ്യൽ മീഡിയ പ്ലാറ്റ്‌ഫോമുകളിൽ, പ്രത്യേകിച്ച് എക്സിൽ, വിദ്വേഷ കമന്റുകൾ നിറഞ്ഞിരിക്കുന്നത്. എന്നാൽ, ഇത്തരം പരിഹാസങ്ങളെയോ വിമർശനങ്ങളെയോ തങ്ങൾ കാര്യമാക്കുന്നില്ലെന്ന് വരൻ റിഷഭ് രജ്പുത് തുറന്നുപറഞ്ഞതോടെ സംഭവം വലിയ ചർച്ചയായി മാറിക്കഴിഞ്ഞു.
റിഷഭ് രജ്പുത്തും ഷോണാലി ചൗക്‌സിയും പരസ്പരം ഹാരം അണിയിക്കുന്ന അതിമനോഹരമായ വിവാഹചിത്രങ്ങളും വീഡിയോകളും എക്സിൽ വൈറലായതിന് പിന്നാലെയാണ് ദമ്പതികൾക്ക് നേരെ വലിയ തോതിലുള്ള സൈബർ ആക്രമണം ആരംഭിച്ചത്. "എന്തുകണ്ടിട്ടാണ് ഇയാളെ വിവാഹം ചെയ്തത്?" എന്ന ചോദ്യവുമായാണ് ഒരു വിഭാഗം ഉപയോക്താക്കൾ കമന്റുകൾ പങ്കുവെച്ചത്. ദിവ്യ എന്ന ഒരു യൂസർ ചിത്രം എക്സിൽ ഷെയർ ചെയ്തുകൊണ്ട് "ഇത്തരം വിവാഹത്തിന് പിന്നിലെ പ്രധാന കാരണം എന്തായിരിക്കും" എന്ന് ചോദിച്ചത് വലിയ ചർച്ചകൾക്ക് വഴിവെക്കുകയും വർണ്ണവിവേചനത്തിനെതിരായ സംവാദങ്ങൾക്കും വഴിയൊരുക്കുകയും ചെയ്തു.
തുടർന്ന് വന്ന കമന്റുകളിൽ പലതും വ്യക്തിപരമായ അധിക്ഷേപങ്ങളായിരുന്നു. 'പണം കണ്ടിട്ടായിരിക്കാം', 'സർക്കാർ ജോലി കണ്ടിട്ടായിരിക്കാം' എന്നിങ്ങനെയുള്ള നിരീക്ഷണങ്ങളാണ് പലരും ഉന്നയിച്ചത്. "എന്തിനാണ് സഹോദരീ ഇത് ചെയ്തത്" എന്ന് ചോദിച്ചുകൊണ്ടുള്ള കമന്റുകളും ധാരാളമായിരുന്നു. എന്നാൽ, ഈ നെഗറ്റീവ് കമന്റുകൾക്കിടയിലും, സ്നേഹത്തിന്റെ അടിസ്ഥാനത്തിലാണ് ഈ വിവാഹം എന്ന് ചൂണ്ടിക്കാട്ടി നിരവധിപ്പേർ ദമ്പതികൾക്ക് പിന്തുണയുമായി രംഗത്തെത്തി. നിറത്തിന്റെ പേരിൽ ഒരാളെ വിലയിരുത്തുന്നതിലെ തെറ്റും സമൂഹത്തിലെ വർണ്ണവിവേചന പ്രവണതയും ഇവർ ശക്തമായി ചോദ്യം ചെയ്യുകയുണ്ടായി. "ഈ ലോകത്ത് എത്രമാത്രം വിദ്വേഷമാണ് നിറഞ്ഞിരിക്കുന്നത്" എന്ന് രോഷത്തോടെ ചിലർ കമന്റ് ചെയ്തു.
ചിത്രങ്ങൾ വൈറലാവുകയും പരിഹാസങ്ങൾ ഏറ്റുവാങ്ങേണ്ടി വരികയും ചെയ്തതോടെയാണ് വരൻ റിഷഭ് രജ്പുത് ശക്തമായി പ്രതികരിച്ചത്. "നിങ്ങളുടെ കമന്റുകൾ ഞങ്ങളുടെ വിഷയമല്ല" എന്നായിരുന്നു മറുപടി. സമൂഹമാധ്യമങ്ങളിലെ വർണ്ണവിവേചനത്തിനും സൗന്ദര്യസങ്കൽപ്പങ്ങളിലെ തെറ്റായ ധാരണകൾക്കുമെതിരെയുള്ള ശക്തമായൊരു നിലപാടായി ഈ പ്രതികരണം വിലയിരുത്തപ്പെടുന്നു. സ്നേഹബന്ധങ്ങളെക്കാൾ ബാഹ്യരൂപത്തിന് അമിത പ്രാധാന്യം നൽകുന്ന ഇത്തരം പ്രവണതകൾക്കെതിരെ ഈ ദമ്പതികളുടെ മറുപടി ഒരു സന്ദേശമായി മാറുകയാണ്.
