വാഷിംഗ്ടൺ: അമേരിക്കൻ ഭരണകൂടം നടപ്പിലാക്കിക്കൊണ്ടിരിക്കുന്ന വൻതോതിലുള്ള നാടുകടത്തൽ നടപടികളെക്കുറിച്ചുള്ള നിർണ്ണായക വിവരങ്ങൾ പുറത്ത്. ഡോണൾഡ് ട്രംപ് ഭരണകൂടം അവകാശപ്പെടുന്നത് പോലെ കൊടുംകുറ്റവാളികളെയല്ല, മറിച്ച് യാതൊരുവിധ ക്രിമിനൽ പശ്ചാത്തലവുമില്ലാത്ത സാധാരണക്കാരെയാണ് ഈ പദ്ധതി പ്രധാനമായും ലക്ഷ്യം വെക്കുന്നതെന്ന് അന്താരാഷ്ട്ര മാധ്യമമായ 'ഗാർഡിയ'ന്റെ റിപ്പോർട്ട് വ്യക്തമാക്കുന്നു.

2025-ൽ ഡോണൾഡ് ട്രംപ് രണ്ടാമതും അധികാരമേറ്റതിന് പിന്നാലെ, ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി ആവർത്തിച്ച് ഉപയോഗിച്ച ഒരു പ്രയോഗമായിരുന്നു "ഏറ്റവും മോശമായവരിൽ മോശമായവർ" . അക്രമാസക്തരായ കുറ്റവാളികളെയും കൊലപാതകികളെയും ലൈംഗികാതിക്രമികളെയും രാജ്യത്ത് നിന്ന് പുറത്താക്കുക എന്നതാണ് തങ്ങളുടെ ലക്ഷ്യമെന്ന് ജനങ്ങളെ ബോധ്യപ്പെടുത്താനാണ് ഈ പദം ഉപയോഗിച്ചത്. എന്നാൽ, സർക്കാർ രേഖകൾ വിശകലനം ചെയ്തപ്പോൾ ഈ വാദങ്ങൾ പൊള്ളയാണെന്ന് തെളിഞ്ഞിരിക്കുകയാണ്.

ഗാർഡിയൻ നടത്തിയ വിശകലനമനുസരിച്ച്, 2025-ൽ ആദ്യമായി നാടുകടത്തൽ നടപടികൾ നേരിട്ടവരിൽ 77 ശതമാനം പേർക്കും യാതൊരുവിധ ക്രിമിനൽ ശിക്ഷാവിധി പശ്ചാത്തലവുമില്ല. അതായത്, ഭരണകൂടം ലക്ഷ്യം വെക്കുന്നവരിൽ ഭൂരിഭാഗവും നിയമത്തിന് മുന്നിൽ കുറ്റവാളികളല്ല. വിവരാവകാശ നിയമപ്രകാരം (FOIA) നടത്തിയ നിയമപോരാട്ടത്തിനൊടുവിൽ ഡി.എച്ച്.എസിൽ നിന്നും ഗാർഡിയനും 'റിപ്പോർട്ടേഴ്‌സ് കമ്മിറ്റി ഫോർ ഫ്രീഡം ഓഫ് ദി പ്രസ്സും' കൈക്കലാക്കിയ I-213 ഫോമുകളാണ് ഈ സത്യങ്ങൾ പുറത്തെത്തിച്ചത്. ഒരാൾ നിയമവിരുദ്ധമായി രാജ്യത്ത് കഴിയുന്നു എന്ന് കോടതിയിൽ തെളിയിക്കാൻ ഇമിഗ്രേഷൻ അധികൃതർ തയ്യാറാക്കുന്ന പ്രാഥമിക രേഖയാണിത്.

2025 ജനുവരി മുതൽ ഓഗസ്റ്റ് പകുതി വരെയുള്ള കാലയളവിലെ ഏകദേശം 1,40,000 ഫോമുകളാണ് വിശകലനത്തിന് വിധേയമാക്കിയത്. ഈ രേഖകളിൽ വ്യക്തിയുടെ പേര്, കുടുംബാംഗങ്ങളുടെ വിവരം, കുട്ടികളുടെ പൗരത്വം, ക്രിമിനൽ ചരിത്രം എന്നിവ കൃത്യമായി രേഖപ്പെടുത്തിയിട്ടുണ്ട്. ട്രംപ് ഭരണകൂടത്തിന്റെ നാടുകടത്തൽ നടപടികളെക്കുറിച്ച് ഇതുവരെ ലഭിച്ചിട്ടുള്ളതിൽ വെച്ച് ഏറ്റവും സൂക്ഷ്മമായ വിവരങ്ങളാണിവ. ക്രിമിനൽ പശ്ചാത്തലമുണ്ടെന്ന് ഭരണകൂടം പറയുന്നവരിൽ പോലും ഗുരുതരമായ കുറ്റകൃത്യങ്ങൾ ചെയ്തവർ വളരെ കുറവാണെന്ന് റിപ്പോർട്ട് ചൂണ്ടിക്കാട്ടുന്നു:

രേഖകളിലുള്ളവരിൽ വെറും 23 ശതമാനം പേർക്ക് മാത്രമാണ് ഏതെങ്കിലും കുറ്റത്തിന് ശിക്ഷ ലഭിച്ചിട്ടുള്ളത്. ശിക്ഷിക്കപ്പെട്ടവരിൽ പകുതിയോളം പേർ (ഏകദേശം 30%) ട്രാഫിക് നിയമലംഘനങ്ങളോ ഇമിഗ്രേഷൻ സംബന്ധമായ ചെറിയ പിഴവുകളോ വരുത്തിയവരാണ്. വെറും 1 ശതമാനം പേർ മാത്രമാണ് ലൈംഗികാതിക്രമ കേസുകളിൽ ഉൾപ്പെട്ടത്. കൊലപാതകക്കേസിൽ ശിക്ഷിക്കപ്പെട്ടവർ വെറും 0.5 ശതമാനം (ഏകദേശം 400 പേർ) മാത്രമാണ്. ഈ കണക്കുകൾ സൂചിപ്പിക്കുന്നത്, ഭീകരരായ കുറ്റവാളികളെ പിടികൂടുന്നു എന്ന വ്യാജേന സാധാരണക്കാരെയാണ് ഭരണകൂടം തടങ്കലിലാക്കുന്നത് എന്നാണ്.

ഇതിനെ ഒരു 'ഡ്രാഗ്‌നെറ്റ്' അഥവാ വ്യാപകമായ വലവീശൽ എന്നാണ് വിദഗ്ധർ വിശേഷിപ്പിക്കുന്നത്. വാഷിംഗ്ടൺ സർവകലാശാലയിലെ സെന്റർ ഫോർ ഹ്യൂമൻ റൈറ്റ്‌സ് റിസർച്ച് കോർഡിനേറ്റർ ഫിൽ നെഫ് പറയുന്നത്, ഭരണകൂടം പരമാവധി ആളുകളെ നാടുകടത്തൽ പ്രക്രിയയിൽ കുടുക്കാൻ ശ്രമിക്കുകയാണെന്നാണ്. വർഷങ്ങളായി അമേരിക്കയിൽ ജീവിക്കുന്നവരും ഇവിടുത്തെ സമൂഹവുമായി അലിഞ്ഞുചേർന്നവരുമായ സാധാരണക്കാരെയാണ് ഈ നടപടികൾ ബാധിക്കുന്നത്. ഇത് അമേരിക്കൻ ചരിത്രത്തിലെ തന്നെ ഏറ്റവും വലിയ ഇമിഗ്രേഷൻ തടങ്കൽ നടപടികൾക്ക് കാരണമായിട്ടുണ്ട്.

അമേരിക്കൻ ഇമിഗ്രേഷൻ കൗൺസിലിലെ സ്റ്റാഫ് അറ്റോർണി ക്രിസ് ഓപില ഭരണകൂടത്തിന്റെ ഇരട്ടത്താപ്പിനെ രൂക്ഷമായി വിമർശിച്ചു. "ഭരണകൂടത്തിന്റെ വാദങ്ങളെ പിന്തുണയ്ക്കുന്ന ഡാറ്റ അവരുടെ കൈവശം ഉണ്ടായിരുന്നെങ്കിൽ അവർ അത് എന്നേ പുറത്തുവിടുമായിരുന്നു. അതില്ലാത്തതുകൊണ്ടാണ് അവർ വെറും പ്രചാരണങ്ങളും മുദ്രാവാക്യങ്ങളും മാത്രം ഉപയോഗിക്കുന്നത്," അദ്ദേഹം പറഞ്ഞു.

നാടുകടത്തൽ നടപടികൾക്ക് പിന്നിൽ കൃത്യമായ ഒരു 'ക്വോട്ട' ഉണ്ടെന്നും അത് തികയ്ക്കാനായി ജോലിസ്ഥിരതയോ കുടുംബ സാഹചര്യമോ നോക്കാതെ കൈയ്യിൽ കിട്ടുന്നവരെയെല്ലാം അധികൃതർ പിടികൂടുകയാണെന്നും അദ്ദേഹം ആരോപിക്കുന്നു. ഡി.എച്ച്.എസ് സെക്രട്ടറി ക്രിസ്റ്റി നോം ഉൾപ്പെടെയുള്ളവർ ഈ നടപടികളെ ന്യായീകരിക്കുന്ന വെബ്‌സൈറ്റുകൾ വരെ നിർമ്മിച്ചിട്ടുണ്ടെങ്കിലും, ആഭ്യന്തര രേഖകൾ ഇതിനെ പൂർണ്ണമായും തള്ളിക്കളയുകയാണ്.

അമേരിക്കൻ ഭരണകൂടംഡോണൾഡ് ട്രംപ്ഹോംലാൻഡ് സെക്യൂരിറ്റി

സ്വന്തം ലേഖകൻ