കൊള്ളയടിച്ചത് അയ്യപ്പന്റെ പൊന്ന്, കൂട്ടിന് രാഷ്ട്രീയ ഉന്നതര്‍; ഭരണ-പ്രതിപക്ഷ ഭേദമന്യേ നേതാക്കള്‍ ഉണ്ണികൃഷ്ണന്‍ പോറ്റിയുടെ അടുപ്പക്കാര്‍; ബെംഗളുരുവില്‍ ബിജെപി നേതാക്കള്‍ക്കൊപ്പം ക്ഷേത്ര ചടങ്ങില്‍ പങ്കെടുത്ത ചിത്രങ്ങള്‍ പുറത്ത്

കൊച്ചി: ശബരിമല സ്വര്‍ണക്കൊള്ളക്കേസിലെ മുഖ്യപ്രതി ഉണ്ണികൃഷ്ണന്‍ പോറ്റിക്ക് ബി.ജെ.പി. നേതാക്കളുമായി അടുത്ത ബന്ധങ്ങളുണ്ടെന്ന് വെളിപ്പെടുത്തുന്ന ദൃശ്യങ്ങള്‍ പുറത്തുവന്നു. മുന്‍ കര്‍ണാടക മുഖ്യമന്ത്രി സദാനന്ദ ഗൗഡയും അന്നത്തെ ഉപമുഖ്യമന്ത്രിയായിരുന്ന അശ്വന്ത് നാരായണനും ഉണ്ണികൃഷ്ണന്‍ പോറ്റിയോടൊപ്പം ഒരു പൊതുപരിപാടിയില്‍ പങ്കെടുത്തതിന്റെ ചിത്രങ്ങളാണ് ടെലിവിഷന്‍ ചാനല്‍ പുറത്തുവിട്ടത്്.

ബംഗളൂരു ജാലഹള്ളി അയ്യപ്പക്ഷേത്രത്തിലെ സ്വര്‍ണവാതിലുകളുടെ സമര്‍പ്പണ ചടങ്ങിലാണ് ഈ നേതാക്കള്‍ ഉണ്ണികൃഷ്ണന്‍ പോറ്റിയോടൊപ്പം പങ്കെടുത്തത്. 2020 ജനുവരിയിലാണ് ഈ ചടങ്ങ് നടന്നത്. സദാനന്ദ ഗൗഡ കേന്ദ്രമന്ത്രിയായിരിക്കെയാണ് ഈ പരിപാടിയില്‍ പങ്കെടുത്തതെന്നതും ശ്രദ്ധേയമാണ്. ശബരിമല കേസിലെ മുഖ്യപ്രതിക്ക് ഉന്നത രാഷ്ട്രീയ ബന്ധങ്ങളുണ്ടെന്ന വെളിപ്പെടുത്തല്‍ വിഷയത്തില്‍ കൂടുതല്‍ ചോദ്യങ്ങള്‍ ഉയര്‍ത്തുകയാണ്.

ജാലഹള്ളി അയ്യപ്പക്ഷേത്രത്തിലെ സ്വര്‍ണവാതില്‍ സമര്‍പ്പണ ചടങ്ങിലാണ് ഡി.വി. സദാനന്ദ ഗൗഡ, അശ്വന്ത് നാരായണന്‍ എന്നിവര്‍ക്കൊപ്പം ഉണ്ണികൃഷ്ണന്‍ പോറ്റി പങ്കെടുത്തത്. കേന്ദ്രമന്ത്രി പദവിയിലിരുന്ന നേതാക്കളുമായി ഇയാള്‍ക്ക് അത്രമേല്‍ സ്വാധീനമുണ്ടായിരുന്നു എന്നാണ് ഈ ചിത്രങ്ങള്‍ സൂചിപ്പിക്കുന്നത്.

അതേസമയം, സംസ്ഥാനത്തെ മുന്‍ ദേവസ്വം മന്ത്രിയും സിപിഎം നേതാവുമായ കടകംപള്ളി സുരേന്ദ്രനുമായും ഉണ്ണികൃഷ്ണന്‍ പോറ്റിക്ക് അടുത്ത വ്യക്തിബന്ധമുണ്ടെന്നതിന്റെ തെളിവുകള്‍ പുറത്തുവന്നു. പോറ്റിയുടെ വീട്ടില്‍ കടകംപള്ളി സുരേന്ദ്രന്‍ സന്ദര്‍ശനം നടത്തുന്നതിന്റെ പുതിയ ചിത്രങ്ങളാണ് പുറത്തായത്. പോറ്റിയുടെ അമ്മാവന്റെ മകള്‍ക്ക് ബിരുദത്തിന് റാങ്ക് ലഭിച്ചപ്പോള്‍ ഉപഹാരം നല്‍കാനാണ് മന്ത്രി എത്തിയത്. എന്നാല്‍ ഔദ്യോഗിക പദവിയിലിരുന്ന ഒരാള്‍ എന്തിനാണ് ഇത്രയും താല്പര്യമെടുത്ത് പ്രതിയുടെ വീട്ടിലെത്തിയത് എന്ന കാര്യത്തില്‍ ദുരൂഹത നിലനില്‍ക്കുന്നുണ്ട്. പോറ്റിയുടെ മകളെ പുളിമാത്തെ വീട്ടിലേക്ക് വിളിച്ച് വരുത്തിയാണ് ഈ ചടങ്ങ് സംഘടിപ്പിച്ചതെന്ന് അദ്ദേഹത്തിന്റെ അമ്മാവന്‍ വെങ്കിടേശ്വരന്‍ പോറ്റി സ്ഥിരീകരിച്ചിട്ടുണ്ട്.

ഇതിനുപുറമെ, കടകംപള്ളി സുരേന്ദ്രനും സിപിഎം പത്തനംതിട്ട ജില്ലാ സെക്രട്ടറി രാജു എബ്രഹാമും ഉണ്ണികൃഷ്ണന്‍ പോറ്റിയുടെ കുടുംബത്തിനൊപ്പം നില്‍ക്കുന്ന മറ്റൊരു ചിത്രവും നേരത്തെ പുറത്തുവന്നിരുന്നു. പോറ്റിയുടെ അച്ഛന് കടകംപള്ളി സമ്മാനം നല്‍കുന്ന ദൃശ്യങ്ങളും ഇതില്‍ ഉള്‍പ്പെടുന്നു. കേരളത്തിലെയും കര്‍ണാടകയിലെയും പ്രമുഖ രാഷ്ട്രീയ നേതാക്കളുമായി പ്രതിക്കുള്ള ഈ അവിശുദ്ധ ബന്ധം സ്വര്‍ണക്കൊള്ളക്കേസിന്റെ അന്വേഷണത്തെ സ്വാധീനിച്ചിട്ടുണ്ടോ എന്ന സംശയം ഇപ്പോള്‍ ശക്തമാവുകയാണ്.