ജോലി കഴിഞ്ഞ് മടങ്ങവേ വഴിയിൽ നിന്നും ബാഗ് വീണുകിട്ടി; തുറന്നു നോക്കിയപ്പോൾ കണ്ടത് നോട്ടുകെട്ടുകൾ; ലക്ഷങ്ങൾ ഉണ്ടായിരുന്ന ബാഗ് പോലീസിനെ ഏൽപ്പിച്ച് മാതൃകയായ യുവാവ്

ഹൈദരാബാദ്: വഴിയിൽ നിന്നും വീണുകിട്ടിയ ബാഗിൽ ലക്ഷങ്ങൾ ഉണ്ടായിരുന്നിട്ടും ബാഗ് സുരക്ഷിതമായി പോലീസിനെ ഏൽപ്പിച്ച് മാതൃകയായ യുവാവിന് സമൂഹ മാധ്യമങ്ങളിൽ കയ്യടി. ഹൈദരാബാദിലെ ലാലാഗുഡ പ്രദേശത്താണ് സംഭവം. ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന സതീഷ് യാദവ് എന്ന യുവാവിനാണ് വഴിയിൽ ബാഗ് കണ്ടെത്തിയത്.

ബാഗ് ഉടമസ്ഥന് തിരിച്ച് നൽകാനുള്ള ശ്രമം വിഭലമായതോടെയാണ് ബാഗിൽ പണമാണെന്ന് ഇയാൾ തിരിച്ചറിയുന്നത്. അപ്രതീക്ഷിതമായി ഉണ്ടായ സംഭവത്തിൽ ആദ്യം ഒന്ന് അമ്പരപ്പുണ്ടായെങ്കിലും ഇയാൾ ബാഗ് സുരക്ഷിതമായി പോലീസിന് കൈമാറുകയായിരുന്നു.

ജോലി കഴിഞ്ഞ് സതീഷ് വീട്ടിലേക്ക് മടങ്ങുന്നതിനിടയിലാണ് അമിതവേഗതിയിൽ വന്ന ഒരു ബൈക്കിൽ നിന്ന് ബാഗ് റോഡിലേക്ക് തെറിച്ചു വീണത്. എന്നാൽ ബാഗ് നിലത്തു വീണിട്ടും വാഹനം നിർത്താതെ വേഗത്തിൽ പോകുകയായിരുന്നു. ഇതിനാൽ ബാഗ് ഉടമസ്ഥന് തിരികെ ഏൽപ്പിക്കാൻ സതീഷിന് കഴിഞ്ഞില്ല.

സമീപത്തുണ്ടായിരുന്നവരോട് സംസാരിച്ച് ബൈക്ക് യാത്രികനെ കണ്ടെത്താനുള്ള ശ്രമം നടത്തി. എന്നാൽ അതും പരാജയപ്പെട്ടു. ഇതിനിടയിൽ ബാഗ് തുറന്നു നോക്കിയപ്പോഴാണ് അതിനുള്ളിൽ നിറച്ച നോട്ടുകെട്ടുകൾ സതീഷ് കാണാനിടയായത്. ആദ്യം ഒന്ന് പകച്ച് പോയെങ്കിലും സതീഷ് ഉടൻതന്നെ ബാഗ് ലാലാഗുഡ പോലീസ് സ്റ്റേഷനിൽ എത്തിക്കുകയായിരുന്നു.

സതീഷിനെ ലാലാഗുഡ പോലീസ് ഉദ്യോഗസ്ഥർ അഭിനന്ദിച്ചു. ഇത്തരം പ്രവൃത്തികൾ സമൂഹത്തിന് നൽകുന്നത് ശക്തമായ സാമൂഹിക ബോധത്തിന്റെയും ഉത്തരവാദിത്വത്തിന്റെയും സന്ദേശമാണെന്നും പോലീസ് പറഞ്ഞു. സതീഷിനെ പോലുള്ള വ്യക്തിപരമായ നേട്ടങ്ങൾ മാത്രം ലക്ഷ്യം വയ്ക്കാതെ ഉത്തരവാദിത്വത്തോടെ പെരുമാറുന്ന സാമൂഹിക ബോധമുള്ളവരെയാണ് നാടിന് ആവശ്യമെന്നും പോലീസ് കൂട്ടിച്ചേർത്തു. പോലീസ് സ്റ്റേഷനിൽ വച്ച് നടത്തിയ പരിശോധനയിലാണ് ബാഗിനുള്ളിൽ ആകെ രണ്ട് ലക്ഷം രൂപയാണ് ഉള്ളത് എന്ന് കണ്ടെത്തിയത്. പണം ആരുടേതാണെന്നുള്ള അന്വേഷണത്തിലാണ് പോലീസ് ഇപ്പോൾ.