ഇന്ത്യാക്കാര്‍ക്കും ഇരട്ടപൗരത്വം എന്ന ആവശ്യമുന്നയിച്ച് പ്രവാസി സംഘടന; ആഗോള തലത്തില്‍ തന്നെ ഇന്ത്യയുടെ പ്രതിച്ഛായ വര്‍ദ്ധിപ്പിക്കുമെന്ന് സംഘടന
ഇന്ത്യാക്കാര്‍ക്കും ഇരട്ടപൗരത്വം എന്ന ആവശ്യമുന്നയിച്ച് പ്രവാസി സംഘടന
ടൊറന്‍ോ: ലോകത്തിലെ ഏറ്റവും വലിയ പ്രവാസി സമൂഹമാണ് ഇന്ത്യാക്കാര്‍. ഏകദേശം മൂന്നരക്കോടിയിലധികം ഇന്ത്യാക്കാര്‍ വിവിധ വിദേശ രാജ്യങ്ങളിലായി കഴിയുന്നു എന്നാണ് ഒരു എകദേശ കണക്ക് സൂചിപ്പിക്കുന്നത്. ഇതോടെയാണ് ആഗോളതലത്തില്‍ തന്നെ രാജ്യത്തിന്റെ പ്രതിച്ഛായ ഉയര്‍ത്തുന്നതിനായി ഇന്ത്യാക്കാര്‍ക്ക് ഇരട്ടപൗരത്വം അനുവദിക്കണമെന്ന ആവശ്യം ഉയരുന്നത്.
അമേരിക്കയിലും കാനഡയിലുമായുള്ള 79 പ്രവാസി ഇന്ത്യന്‍ സംഘടനകളെ പ്രതിനിധാനം ചെയ്യുന്ന ഇന്‍ഡ് യു എസ് കാനഡ എന്ന സംഘടനയാണ് ഇപ്പോള്‍ ഇരട്ട പൗരത്വം എന്ന ആവശ്യം ഇന്ത്യന്‍ സര്‍ക്കാരിനോട് ഉന്നയിച്ചിരിക്കുന്നത്. അതല്ലെങ്കില്‍ ഓവര്‍സീസ് സിറ്റിസെന്‍ ഓഫ് ഇന്‍ഡ്യ (ഒ സി ഐ) സ്റ്റാറ്റസിനും കീഴില്‍ കൂടുതല്‍ അവകാശങ്ങള്‍ അനുവദിക്കണമെന്നും അവര്‍ ആവശ്യപ്പെടുന്നു. ഇരട്ടപൗരത്വം എന്നത് കേവലം ഒരു ഭരണപരമായ പരിഷ്‌കാരം മാത്രമായിരിക്കില്ലെന്നും, മറിച്ച് ആഗോള തലത്തില്‍ തന്നെ ഇന്ത്യയുടെ പ്രതിച്ഛായ വര്‍ദ്ധിപ്പിക്കുന്ന ഒന്നായിരിക്കുമെന്നും ഫോറം തലാന്‍ വിക്രം ബജ്വാ അഭിപ്രായപ്പെടുന്നു.
