ടേക്ക് ഓഫ് ചെയ്യുന്നതിനിടെ റണ്‍വേയില്‍ പ്രവേശിച്ചു; വിമാനത്തിന്റെ എഞ്ചിനില്‍ കുടുങ്ങി യുവാവ് മരിച്ചു: ഇറ്റലിയിലെ ബെര്‍ഗാമോ വിമാനത്താവളത്തില്‍ 19 വിമാനങ്ങള്‍ റദ്ദാക്കി: ഒന്‍പത് വിമാനങ്ങള്‍ വഴിതിരിച്ച് വീട്ടു
വിമാനത്തിന്റെ എഞ്ചിനില്‍ കുടുങ്ങി യുവാവ് മരിച്ചു:
മിലാന്‍: ഇറ്റലിയിലെ ബെര്‍ഗാമോ വിമാനത്താവളത്തില്‍ പുറപ്പെടാന്‍ തയാറായി നിന്ന വിമാനത്തിന്റെ എന്‍ജിനില്‍ കുടുങ്ങി യുവാവ് മരിച്ചു. ചൊവ്വാഴ്ച രാവിലെ 10.30നായിരുന്നു സംഭവം. 35 വയസ്സുകാരനാണ് മരണപ്പെട്ടതെന്ന് ഇറ്റാലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു. സ്പെയിനിലെ ആസ്റ്റുരിയസിലേക്കു പുറപ്പെടാന്‍ വിമാനം തയാറായി നില്‍ക്കവെ യുവാവ് റണ്‍വേയിലേക്ക് അവിചാരിതമായി എത്തുകയായിരുന്നു. യുവാവ് തല്‍ക്ഷണം മരിച്ചു.
വൊളോത്തിയ കമ്പനിയുടെ എ319ന്റെ എന്‍ജിനിലാണ് യുവാവ് കുടുങ്ങിയത്. അപകടത്തെത്തുടര്‍ന്ന് 2 മണിക്കൂറോളം വിമാനഗതാഗതം തടസ്സപ്പെട്ടതായി ബെര്‍ഗാമോ വിമാനത്താവള അധികൃതര്‍ അറിയിച്ചു. പത്തൊമ്പതോളം വിമാനങ്ങള്‍ റദ്ദാക്കുകയും ഒന്‍പത് വിമാനങ്ങള്‍ വഴിതിരിച്ചുവിടുകയും ചെയ്തെന്ന് ഫ്ളൈറ്റ് ട്രാക്കര്‍ ഏജന്‍സിയായ ഫ്ളൈറ്റ്റഡാര്‍-24 റിപ്പോര്‍ട്ട് ചെയ്തു.
അതിനിടെ, പൊലീസ് പിന്തുടര്‍ന്നതിനെ തുടര്‍ന്നാണ് യുവാവ് റണ്‍വേയില്‍ എത്തിയതെന്നും സുരക്ഷാവാതിലിലൂടെയാണ് റണ്‍വേയില്‍ കടന്നതെന്നും ചില പ്രാദേശിക മാധ്യങ്ങള്‍ റിപ്പോര്‍ട്ട് ചെയ്തു. ഇയാള്‍ വിമാനയാത്രികനോ എയര്‍പോര്‍ട്ട് ജീവനക്കാരനോ അല്ലെന്നും റിപ്പോര്‍ട്ടുകളില്‍ പറയുന്നു. സംഭവത്തില്‍ വൊളോത്തിയ വിമാന കമ്പനി അന്വേഷണം പ്രഖ്യാപിച്ചു.
