സ്റ്റോക്കോമിലെ ബസ് കാത്തിരിപ്പുകേന്ദ്രത്തിലേക്ക് ഡബിള്‍ ഡക്കര്‍ ബസ് ഇടിച്ചുകയറി അപകടം; മൂന്നു പേര്‍ മരിച്ചു: മൂന്നു പേര്‍ക്ക് പരിക്ക്
ബസ് കാത്തിരിപ്പുകേന്ദ്രത്തിലേക്ക് ബസ് ഇടിച്ചുകയറി അപകടം; മൂന്നു പേര്‍ മരിച്ചു
സ്റ്റോക്‌ഹോം: സ്വീഡന്‍ തലസ്ഥാനമായ സ്റ്റോക്കോമില്‍ ബസ് കാത്തിരിപ്പുകേന്ദ്രത്തിലേക്ക് ഡബിള്‍ ഡക്കര്‍ ബസ് ഇടിച്ചുകയറി മൂന്നു പേര്‍ മരിച്ചെു. അപകടത്തില്‍ മൂന്നു പേര്‍ക്കു പരുക്കേറ്റെന്നും സ്റ്റോക്‌ഹോം രക്ഷാപ്രവര്‍ത്തന വിഭാഗം വക്താവ് പറഞ്ഞു. റോയല്‍ ഇന്‍സ്റ്റിറ്റ്യൂട്ട് ഓഫ് ടെക്നോളജി സര്‍വകലാശാലയുടെ സമീപമാണ് അപകടമുണ്ടായത്. അപകടസമയത്ത് ബസില്‍ ആരും ഉണ്ടായിരുന്നില്ലെന്നാണ് വിവരം.
പൊലീസ്, രക്ഷാപ്രവര്‍ത്തന വിഭാഗം, ആംബുലന്‍സുകള്‍ എന്നിവര്‍ സംഭവസ്ഥലത്ത് പ്രവര്‍ത്തിച്ചുവരികയാണെന്ന് പൊലീസ് അറിയിച്ചു. മനപൂര്‍വമല്ലാത്ത നരഹത്യ എന്ന നിലയിലാണ് അന്വേഷണം നടക്കുന്നതെന്നും ബസ് ഡ്രൈവറെ അറസ്റ്റു ചെയ്തു ചോദ്യം ചെയ്തുവരികയാണെന്നും പൊലീസ് അറിയിച്ചു. ബസ് മനപൂര്‍വം ആള്‍ക്കൂട്ടത്തിലേക്കു വാഹനം ഇടിച്ചുകയറ്റിയതാണോ എന്നതു സംബന്ധിച്ച് വിവരമൊന്നും ലഭ്യമല്ലെന്നും പൊലീസ് അറിയിച്ചു.
അപകട കാരണം സംബന്ധിച്ച് വ്യക്തതയില്ലെന്നും ഈ സമയം തന്റെ ചിന്തകള്‍ ദുരിതബാധിതരിലും അവരുടെ കുടുംബാംഗങ്ങളിലുമാണെന്നും സ്വീഡിഷ് പ്രധാനമന്ത്രി ഉള്‍ഫ് ക്രിസ്റ്റേഴ്സന്‍ സമൂഹമാധ്യമത്തില്‍ കുറിച്ചു.
