ഒമാനിലുണ്ടായ വാഹനാപകടത്തിൽ കോഴിക്കോട് സ്വദേശി മരണപ്പെട്ടു; മൃതദേഹം നാട്ടിലെത്തിക്കുന്നതിനുള്ള നടപടികൾ പുരോഗമിക്കുന്നു

കോഴിക്കോട്: ഒമാനിലെ ഇബ്രിയിലുണ്ടായ വാഹനാപകടത്തിൽ കോഴിക്കോട് വടകര സ്വദേശി മരണപ്പെട്ടു. വടകര മൊകേരി കോവുക്കുന്ന് താണിയുള്ളതിൽ വീട്ടിൽ യൂസഫിന്റെ മകൻ ആഷിർ ആണ് മരിച്ചത്. 33 വയസ്സുണ്ടായിരുന്നു.ഇബ്രിക്കടുത്ത് കുബാറയിൽ ബുധനാഴ്ച രാവിലെ പത്തരയോടെയായിരുന്നു അപകടം.സമാഈലിൽ ഫുഡ്സ്റ്റഫ് കമ്പനിയിൽ വാൻസെയിൽസ് വിഭാഗം ജീവനക്കാരനായിരുന്നു.

ജോലി ആവശ്യാർഥം ഇബ്രിയിലെത്തിയ ആഷിർ സഞ്ചരിച്ച വാൻ നഗരസഭയുടെ വാഹനത്തിൽ ഇടിച്ചാണ് അപകടമുണ്ടായത്.ആഷിർ സംഭവ സ്ഥലത്ത് വെച്ച് തന്നെ മരിച്ചു. വാഹനത്തിൽ ഒപ്പമുണ്ടായിരുന്ന സ്വദേശി പൗരനും മറ്റൊരാൾക്കും ഗുരുതര പരിക്കേറ്റു.നഫീസയാണ് മാതാവ്. മൃതദേഹം നാട്ടിലെത്തിക്കുന്നതിനുള്ള നടപടികൾ പുരോഗമിക്കുന്നു.