തിരുവനന്തപുരം: അതിരൂക്ഷമായ സാമ്പത്തിക പ്രതിസന്ധി നേരിടുമ്പോഴും ഒന്നാം പിണറായി സർക്കാരിന്റെ കാലത്ത് അഞ്ചുവർഷത്തിനിടെ ഓരോ മന്ത്രിയുടെയും വ്യക്തിഗത സ്റ്റാഫ് അംഗങ്ങളെ പരിപാലിക്കുന്നതിനായി സർക്കാർ ഖജനാവിൽ നിന്നും ചെലവിട്ടത് 125 കോടി രൂപയോളം രൂപയെന്ന് കണക്കുകൾ. മുഖ്യമന്ത്രിയുടെയും മറ്റ് 19 മന്ത്രിമാരുടെയും ഓഫീസുകളിൽ മാത്രം 325 ഓളം നിയമനങ്ങൾ (ഡെപ്യൂട്ടേഷൻ നിയമനങ്ങൾ ഒഴികെ) നടത്തിയിട്ടുണ്ട്.

നേരിട്ട് നിയമനം ലഭിച്ച മന്ത്രിമാരുടെ പേഴ്സണൽ സ്റ്റാഫ് അംഗങ്ങൾക്ക് ശമ്പളം നൽകുന്നതിന് കഴിഞ്ഞ എൽഡിഎഫ് സർക്കാർ പ്രതിവർഷം ശരാശരി 25 കോടി രൂപയോളം ചെലവഴിച്ചതായാണ് കണക്കുകളിൽ പറയുന്നത്. 19 മന്ത്രിമാരുടെ സ്റ്റാഫ് അംഗങ്ങളായി നിയമിച്ച 304 പേരുടെ ശമ്പളത്തിനായി ബജറ്റ് രേഖകളുടെയും പുതുക്കിയ ശമ്പള സ്‌കെയിലുകളുടെയും അടിസ്ഥാനത്തിൽ സർക്കാർ പ്രതിമാസം 1.82 കോടി രൂപ ചെലവഴിച്ചിരുന്നു.

മുഖ്യമന്ത്രിയുടെ ഓഫീസിൽ നേരിട്ട് നിയമിക്കുന്നവരുടെ ശമ്പളച്ചെലവ് ചേർത്താൽ ഈ കണക്ക് രണ്ട് കോടി രൂപ കടക്കും. കണക്കാക്കിയ കണക്ക് ശമ്പളത്തിന് മാത്രമുള്ളതാണ്, അതേസമയം വ്യക്തിഗത സ്റ്റാഫ് അംഗങ്ങൾക്ക് വിവിധ തലങ്ങളിൽ റീഇംബേഴ്‌സ്‌മെന്റിന് അർഹതയുണ്ട്, അവയുടെ വിശദാംശങ്ങൾ ലഭ്യമല്ല.

ആദ്യ പിണറായി മന്ത്രിസഭയിൽ പ്രസ് അഡൈ്വസറായി പ്രവർത്തിച്ച എൻ പ്രഭാകര വർമ്മയാണ് മുഖ്യമന്ത്രിയുടെ ഓഫീസിന്റെ ഭാഗമായി പ്രവർത്തിക്കവെ മാസ ശമ്പളമായി ഏറ്റവും കൂടുതൽ തുക കൈപ്പറ്റിയതെന്ന് വിവരാവകശ രേഖയിൽ വ്യക്തമാക്കുന്നു. 1,41,404 രൂപയാണ് മാസശമ്പളമായി കൈപ്പറ്റിയതെന്ന് വിവരാവകാശ രേഖകളിൽ പറയുന്നു. പ്രസ് സെക്രട്ടറിയായ മനോജ് പി എമ്മിന് 1,09,112 രൂപയാണ് മാസ ശമ്പളം. പൊളിറ്റിക്കൽ സെക്രട്ടറി, അസി. പ്രൈവറ്റ് സെക്രട്ടറി, അഡീഷണൽ പ്രൈവറ്റ് സെക്രട്ടറി എന്നിവരുടെ ശമ്പളവും ഒരു ലക്ഷത്തിന് മേലെയാണ്.

വനംവകുപ്പിൽ അഡീഷണൽ പ്രൈവറ്റ് സെക്രട്ടറിയുടെ ചുമതല നിർവഹിച്ച എൻ കെ പ്രേംലാൽ ശമ്പളമായി കൈപ്പറ്റിയത് 2,03,776 രൂപയാണെന്ന് രേഖയിൽ പറയുന്നു. കൂടാതെ വൈദ്യുതി മന്ത്രിയുടെ പ്രൈവറ്റ് സെക്രട്ടറിയായി പ്രവർത്തിച്ച ഷാജഹാൻ എം 1,94,601 രൂപയും അഡീഷണൽ പ്രൈവറ്റ് സെക്രട്ടറിയായിരുന്ന സുരേഷ് കുമാർ എം ജി 1,83,780 രൂപയും ശമ്പള ഇനത്തിൽ വാങ്ങിയിരുന്നതായി കണക്കുകളിൽ സൂചിപ്പിക്കുന്നു.



ശമ്പള ഇനത്തിൽ ഒരു ലക്ഷത്തിലേറെ രൂപ മാസം തോറും കൈപ്പറ്റിയിരുന്ന സ്റ്റാഫുകളുടെ എണ്ണം 26 ആണെന്ന് വിവരാവകാശ നിയമപ്രകാരം ലഭിച്ച രേഖകളിൽ പറയുന്നുണ്ട്. മുഖ്യമന്ത്രിയുടെ വ്യക്തിഗത സ്റ്റാഫിൽ ആറ് പേരുടെ ശമ്പളം ഒരു ലക്ഷത്തിന് മേലാണ്. വൈദ്യുതി മന്ത്രിയുടെയും എക്‌സൈസ് വകുപ്പ് മന്ത്രിയുടേയും വ്യക്തിഗത സ്റ്റാഫുകളിലും ഒരു ലക്ഷത്തിന് മേൽ ശമ്പളം വാങ്ങുന്നവരുണ്ട്. മന്ത്രിമാരായിരിക്കെ കടകംപള്ളി സുരേന്ദ്രന്റെയും ജെ മെഴ്‌സിക്കുട്ടിയമ്മയുടേയും വ്യക്തിഗത പേഴ്‌സണൽ സ്റ്റാഫും വൻതുകയാണ് ശമ്പളമായി കൈപ്പറ്റിയത്.

അതേ സമയം രണ്ടാം പിണറായി വിജയൻ സർക്കാർ അധികാരത്തിലേറിയ ശേഷം നിയമിക്കപ്പെട്ട മന്ത്രിമാരുടേതടക്കമുള്ള സ്റ്റാഫുകളുടെ ശമ്പളം അടക്കമുള്ള കാര്യങ്ങൾ വിവരാവകാശ നിയമപ്രകാരം ലഭ്യമാക്കിയിട്ടില്ല. പൊതുഭരണ വകുപ്പ് പ്രകാരം ഇവർക്ക് നൽകേണ്ട ശമ്പളം നൽകിത്തുടങ്ങിയിട്ടില്ലെന്നാണ് വകുപ്പ് നൽകിയ മറുപടിയിൽ ഉള്ളത്. ഒന്നാം പിണറായി സർക്കാരിന്റെ കാലത്തെ പേഴ്‌സണൽ സ്റ്റാഫുകളുടെ സാലറികൾ ശമ്പളം അടക്കം കൂടുതൽ വിവരങ്ങൾ ലഭ്യമാകണമെങ്കിൽ കോവിഡുമായി ബന്ധപ്പെട്ട നിയന്ത്രണങ്ങൾക്ക് ശേഷം മുൻകൂട്ടി അറിയിച്ച് നിശ്ചിത ഫീസ് നൽകി പരിശോധിക്കാമെന്നും മറുപടിയിൽ പറയുന്നു.



കേരളത്തിലെ ഒരു സർക്കാരിന് പരമാവധി ഉൾപ്പെടുത്താവുന്ന 21 മന്ത്രിമാരുമായാണ് പുതിയ മന്ത്രിസഭ ഭരണത്തിലേറിയത്. കോവിഡും സാമ്പത്തിക ഞെരുക്കങ്ങളും മൂലം മന്ത്രിമാരുടെ പേഴ്‌സണൽ സ്റ്റാഫുകളുടെ എണ്ണത്തിൽ കുറവുണ്ടാകുമെന്ന തരത്തിലുള്ള ചർച്ചകൾ തുടക്കത്തിൽ ഉണ്ടായിരുന്നെങ്കിലും എല്ലാ മന്ത്രിമാർക്കും 25 സ്റ്റാഫ് അംഗങ്ങളെ വീതം നിയമിക്കാൻ സിപിഎം സംസ്ഥാന സെക്രട്ടറിയേറ്റ് തീരുമാനമെടുത്തിരുന്നു.

കഴിഞ്ഞ സർക്കാരിന്റെ കാലത്ത് പ്രതിപക്ഷ നേതാവ്, സ്പീക്കർ, ഡെപ്യൂട്ടി സ്പീക്കർ, സർക്കാർ ചീഫ് വിപ്പ്, ഭരണപരിഷ്‌കരണ കമ്മീഷൻ ചെയർമാൻ, മുന്നാക്ക വികസന കോർപ്പറേഷൻ ചെയർമാൻ എന്നിങ്ങനെ കാബിനറ്റ് പദവിയിലുള്ള വ്യക്തികൾ എല്ലാവരും സമാനമായ സ്റ്റാഫ് പോസ്റ്റിംഗുകൾ നടത്തി. പേഴ്‌സണൽ സ്റ്റാഫ് അംഗങ്ങൾക്ക് ശമ്പളം നൽകുന്നതിന് പ്രതിവർഷം കാബിനറ്റ് റാങ്കുള്ള മറ്റ് നേതാക്കൾ കുറഞ്ഞത് 6 കോടി രൂപയെങ്കിലും ചെലവഴിച്ചിരിക്കാം. അവർ സൃഷ്ടിക്കുന്ന അഞ്ചുവർഷത്തെ ഭാരം കുറഞ്ഞത് 30 കോടി രൂപയാകും. അതായത് 2016-21 മുതൽ പേഴ്സണൽ സ്റ്റാഫിലേക്കുള്ള റിക്രൂട്ട്‌മെന്റിലൂടെ ഖജനാവിന് ഉണ്ടാകുന്ന മൊത്തം ഭാരം കുറഞ്ഞത് 155 കോടി രൂപയാണ്.

കഴിഞ്ഞ സർക്കാരിന്റെ ഭരണകാലത്ത് ഭരണ പരിഷ്‌കരണ കമ്മീഷൻ ചെയർമാനായ അച്ചുതാനന്ദൻ 20 ഓളം സ്റ്റാഫുകളെ നിയമിച്ചപ്പോൾ മുന്നാക്ക വികസന കോർപ്പറേഷൻ ചെയർമാനായ ആർ ബാലകൃഷ്ണ പിള്ള ഈ സംഖ്യ 10 ൽ താഴെയായി പരിമിതപ്പെടുത്തിയിരുന്നു. സർക്കാർ ജീവനക്കാർക്കായി നടപ്പിലാക്കിയ ശമ്പള പരിഷ്‌കരണത്തിന് അനുസൃതമായി പേഴ്‌സണൽ സ്റ്റാഫുകളുടെ ശമ്പളം ഏപ്രിലിൽ സർക്കാർ പരിഷ്‌കരിച്ചു. ജനറൽ അഡ്‌മിനിസ്‌ട്രേഷൻ വകുപ്പ് പുറപ്പെടുവിച്ച ഉത്തരവ് പ്രകാരം മന്ത്രിമാർക്കും കാബിനറ്റ് റാങ്കിലുള്ളവർക്കും പേഴ്‌സണൽ സെക്രട്ടറി മുതൽ കോൺഫിഡൻഷ്യൽ അസിസ്റ്റന്റ്, പാചകക്കാരൻ വരെയുള്ള 15 തസ്തികകളിലേക്ക് നിയമനം നടത്താം.

കൂട്ടത്തിൽ ഏറ്റവും കൂടുതൽ പ്രതിഫലം ലഭിക്കുന്നത് പേഴ്‌സണൽ സെക്രട്ടറിക്കാണ് (ശമ്പള സ്‌കെയിൽ് 1.07 ലക്ഷം രൂപ - 1.6 ലക്ഷം രൂപ). 23,000 മുതൽ 50,200 രൂപ വരെ ശമ്പള സ്‌കെയിൽ ഉള്ള ഓഫീസ് അറ്റൻഡന്റ്, കുക്ക് വിഭാഗങ്ങളാണ് ഏറ്റവും താഴ്ന്നത്. എല്ലാവർക്കും 7% ഡിഎ, ഭവന വാടക അലവൻസ്, സർക്കാർ ജീവനക്കാർക്ക് ലഭ്യമായ മറ്റ് ആനുകൂല്യങ്ങൾ എന്നിവയ്ക്ക് അർഹതയുണ്ട്. ഒരു പിഎസിന്റെ ഏറ്റവും കുറഞ്ഞ ശമ്പളം 1.48 ലക്ഷം രൂപയും ഒരു പാചകക്കാരന് 26,910 രൂപയുമാണ്. ഒരു സാധാരണ സർക്കാർ ഉദ്യോഗസ്ഥനുമായി താരതമ്യപ്പെടുത്തുമ്പോൾ തുക കുറവാണെങ്കിലും ജീവനക്കാരന് ആജീവനാന്ത പെൻഷൻ ലഭിക്കും. പെൻഷനറുടെ മരണത്തിൽ, അയാളുടെ പങ്കാളിക്ക് കുടുംബ പെൻഷൻ ആനുകൂല്യവും ലഭിക്കും.

മന്ത്രിമാരുടെ പേഴ്‌സണൽ സ്റ്റാഫിൽ നിയമിക്കപ്പെടുന്നവരുടെ 90 ശതമാനവും പാർട്ടി പ്രവർത്തകരോ മുതിർന്ന നേതാക്കളുടെ അടുപ്പക്കാരോ ആണെന്നാണ് റിപ്പോർട്ടുകൾ. വി എസ് സർക്കാരിന്റെ കാലത്ത് ആരോഗ്യമന്ത്രിയായിരുന്ന ശ്രീമതി ടീച്ചറുടെ പേഴ്‌സണൽ സ്റ്റാഫ് അംഗമായി മരുകളായ ധന്യാ നായരെ പാചകക്കാരിയുടെ തസ്തികയിൽ നിയമിച്ചത് വിവാദമായിരുന്നു. ഒന്നാം പിണറായി സർക്കാർ മാത്രം മുഖ്യമന്ത്രിയുടെയും മറ്റ് 19 മന്ത്രിമാരുടെയും ഓഫീസുകളിൽ മാത്രം 325 ഓളം നിയമനങ്ങൾ (ഡെപ്യൂട്ടേഷൻ നിയമനങ്ങൾ ഒഴികെ) നടത്തിയിട്ടുണ്ട്. നേരിട്ട് നിയമനം ലഭിച്ച മന്ത്രിമാരുടെ പേഴ്സണൽ സ്റ്റാഫ് അംഗങ്ങൾക്ക് ശമ്പളം നൽകുന്നതിന് കഴിഞ്ഞ എൽഡിഎഫ് സർക്കാർ പ്രതിവർഷം ശരാശരി 25 കോടി രൂപയോളം ചെലവഴിച്ചിരുന്നു. അത്തരത്തിൽ കഴിഞ്ഞ അഞ്ചുവർഷത്തിനിടെ ഓരോ മന്ത്രിയുടെയും വ്യക്തിഗത സ്റ്റാഫ് അംഗങ്ങളെ പരിപാലിക്കുന്നതിനായി സർക്കാർ 125 കോടി രൂപയോളം ചെലവഴിച്ചെന്നാണ് കണക്കുകൾ.

പ്രതിപക്ഷനേതാവ്, സ്പീക്കർ, ഡെപ്യൂട്ടി സ്പീക്കർ, ചീഫ് വിപ്പ് തുടങ്ങി ക്യാബിനറ്റ് റാങ്കുള്ള എല്ലാപേർക്കും 25 പേരെ വീതം നിയമിക്കാനാകും. ഇപ്പോൾ സർക്കാർ നിയമിക്കാൻ ആലോചിക്കുന്ന ഭരണപരിഷ്‌കാര കമ്മീഷൻ ചെയർമാൻ, കാർഷിക വികസന കമ്മീഷൻ ചെയർമാൻ എന്നിവർക്കും മന്ത്രിമാർക്ക് ആനുപാതികമായ സ്റ്റാഫുകളെ നിയമിക്കാൻ കഴിയും. അവർക്കും ഔദ്യോഗിക വസതി, വാഹനം, എന്നിവയും അനുവദിക്കും.



പ്രധാനപ്പെട്ട വകുപ്പുകൾ കൈകാര്യം ചെയ്യുന്നവർക്ക് മാത്രമല്ല, എല്ലാ വകുപ്പ് മന്ത്രിമാർക്കും ഇത്രയും അംഗങ്ങളെ നിയമിക്കുന്നത് അനാവശ്യ ചെലവാണെന്ന് സാമ്പത്തിക വിദഗ്ദ്ധർ ചൂണ്ടിക്കാട്ടുന്നു. മുഴുവൻ സമയ പാർട്ടിപ്രവർത്തകർക്ക് ഒരു വരുമാനമാർഗമായാണ് ഇതിനെ രാഷ്ട്രീയ പാർട്ടികൾ കാണുന്നതെന്നും അവർ വിമർശിക്കുന്നു. ഒന്നാം പിണറായി സർക്കാരിന്റെ കാലത്ത് പേഴ്‌സണൽ സ്റ്റാഫ് അംഗങ്ങൾ രണ്ടര വർഷം കഴിഞ്ഞാൽ പെൻഷൻ ആനുകൂല്യങ്ങൾക്ക് യോഗ്യരാകുംവിധം നിയമനിർമ്മാണം നടത്തിയിരുന്നു. മുമ്പ് അത് മൂന്ന് വർഷമായിരുന്നു. പുതിയ നിയമത്തിലൂടെ രണ്ടര വർഷം കഴിഞ്ഞ് ഒരാളെ മാറ്റി പുതിയ ആളെ നിയമിച്ചാൽ ഒരേ തസ്തികയിൽ രണ്ട് പേരും പെൻഷൻ ആനുകൂല്യങ്ങൾക്ക് യോഗ്യരാകും. ഇത് ഇരട്ടി ചെലവാണ് സംസ്ഥാനത്തിന് ഉണ്ടാക്കുക.

ഉമ്മൻ ചാണ്ടി സർക്കാരിന്റെ കാലത്തായിരുന്നു മുന്നാക്ക വികസന ചെയർമാനും ചീഫ് വിപ്പും കാബിനറ്റ് റാങ്കുകളാകുന്നത്. സംസ്ഥാനത്തിന്റെ സാമ്പത്തികസ്ഥിതി ചൂണ്ടിക്കാട്ടി അന്നതിനെ വിമർശിച്ചവർക്കും ഇപ്പോൾ ആ പദവികൾ പ്രിയങ്കരമാണ്. കാലിയായ ഖജനാവ് കാണിച്ച് ആയിരക്കണക്കിന് കോടിരൂപ വായ്പ എടുത്തവരും ജീവനക്കാർക്ക് സാലറി ചലഞ്ച് നടത്തിയവരുമൊക്കെയാണ് ഇപ്പോൾ 21 മന്ത്രിമാർക്കും മുഖ്യമന്ത്രിക്കും മറ്റ് ക്യാബിനറ്റ് റാങ്കുകാർക്കുമായി അഞ്ഞൂറിലധികം പേഴ്‌സണൽ സ്റ്റാഫ് നിയമനങ്ങൾ നടത്തുന്നത്.

പിണറായി സർക്കാർവൻധൂർത്ത്സാമ്പത്തിക പ്രതിസന്ധി

മറുനാടന്‍ മലയാളി

    മറുനാടന്‍ മലയാളി ബ്യൂറോ