തുടർചികിൽസയ്ക്ക് മുഖ്യമന്ത്രി വീണ്ടും അമേരിക്കയിൽ പോയേക്കും; പിണറായി പോകുമ്പോൾ മന്ത്രിസഭയുടെ ചുമതല കേന്ദ്ര കമ്മറ്റി അംഗം രാധാകൃഷ്ണന് നൽകിയേക്കും; തൃശൂരിലെ നേതാവിനെ രണ്ടാമനാക്കുന്നതിന് പിന്നിൽ മന്ത്രിയായുള്ള മുൻ പരിചയം; ശൈലജ ടീച്ചറെ ഒഴിവാക്കിയതിന് പിന്നിൽ വിദേശ ചികിൽസാ യാത്രയോ?
തിരുവനന്തപുരം: തുടർചികിൽസാർത്ഥം മുഖ്യമന്ത്രി പിണറായി വിജയൻ ഉടൻ അമേരിക്കയിലേക്ക് വീണ്ടും പോകുമെന്ന് സൂചന. സിപിഎം സമ്മേളനങ്ങൾ ചൂടു പിടിക്കും മുമ്പ് ചികിൽസ പൂർത്തിയാക്കി മടങ്ങിയെത്താനാണ് നീക്കം. നേരത്തെ അമേരിക്കയിൽ ചികിൽസ തേടിയ പിണറായിയോട് തുടർ പരിശോധനയ്ക്ക് എത്തണമെന്ന് മയോ ക്ലീനിക് നിർദ്ദേശിച്ചിരുന്നു. കോവിഡ് പ്രതിസന്ധി കാരണം ഈ പരിശോധന നീണ്ടു. കോവിഡിൽ ഇളവുകൾ വരുമ്പോൾ തന്നെ അമേരിക്കയിൽ എത്തി പരിശോധനകൾ നടത്താനാണ് നീക്കം.
നിയമസഭാ സമ്മേളനം ഉടൻ ചേരും. അതിന് ശേഷം മുഖ്യമന്ത്രി അമേരിക്കയിലേക്ക് പോകുമെന്നാണ് സൂചന. അമേരിക്കയിലേക്ക് പോകുമ്പോൾ മുഖ്യമന്ത്രിയുടെ ചുമതല ആരെ ഏൽപ്പിക്കുമെന്നതാണ് നിർണ്ണായകം. കേന്ദ്ര കമ്മറ്റി അംഗമായ എംവി ഗോവിന്ദനാണ് മന്ത്രിസഭയിൽ പാർട്ടിയിലെ സീനിയർ. എന്നാൽ മറ്റൊരു കേന്ദ്ര കമ്മറ്റി അംഗമായ കെ രാധാകൃഷ്ണന് മുഖ്യമന്ത്രിയുടെ ചുമതല നൽകുമെന്നാണ് സൂചന. ഇതെല്ലാം മുന്നിൽ കണ്ടാണ് അതിവിശ്വസ്തനായ എ സമ്പത്തിനെ രാധാകൃഷ്ണന്റെ പ്രൈവറ്റ് സെക്രട്ടറിയായി പിണറായി നിയോഗിച്ചതെന്നും റിപ്പോർട്ടുണ്ട്. കണ്ണൂർ ലോബിയുടെ സ്വാധീനം സർക്കാരിൽ ഉണ്ടാകുന്നില്ലെന്ന് വ്യക്തമാക്കാൻ കൂടിയാകും ഈ നടപടി.
കാബിനെറ്റിൽ സിപിഎമ്മിൽ നിന്നുള്ള ഏക മുൻ മന്ത്രിയാണ് രാധാകൃഷ്ണൻ. ഇതിനൊപ്പം സ്പീക്കറുമായിരുന്നു. ഈ പ്രവർത്തന പരിചയം ചൂണ്ടിക്കാട്ടിയാകും മുഖ്യമന്ത്രിയുടെ വിദേശയാത്രാ കാലത്ത് മന്ത്രിസഭാ യോഗത്തിൽ അധ്യക്ഷത വഹിക്കുന്നത് അടക്കമുള്ള ചുമതല രാധാകൃഷ്ണന് നൽകുക. വകുപ്പ് വിഭജനത്തിൽ വേണ്ടത്ര പരിഗണന രാധാകൃഷ്ണന് മുഖ്യമന്ത്രി നൽകിയില്ലെന്ന പരാതിയുണ്ട്. ഇതിനിടെയാണ് രാധാകൃഷ്ണന് മുഖ്യമന്ത്രിയുടെ ചുമതല നൽകി വ്യക്തമായ സന്ദേശം നൽകാനുള്ള പിണറായിയുടെ നീക്കം.
ഒക്ടോബറിൽ പിണറായി ചികിൽസയ്ക്ക് പോകുമെന്നാണ് സൂചന. കഴിഞ്ഞ വർഷവും ഇതിനുള്ള ആലോചനയുണ്ടായിരുന്നു. എന്നാൽ കോവിഡ് കാരണം നടന്നില്ല. നിലവിൽ മയോക്ലീനിക്കിന്റെ നിർദ്ദേശ പ്രകാരമുള്ള ചികിൽസയാണ് മുഖ്യമന്ത്രി തുടരുന്നത്. ഒരു ആരോഗ്യ പ്രശ്‌നവുമില്ല. അതുകൊണ്ട് തന്നെ വിദഗ്ധാഭിപ്രായങ്ങൾ കൂടി പരിഗണിച്ചേ അമേരിക്കൻ യാത്രയിൽ അന്തിമ തീരുമാനം എടുക്കൂ. പാർട്ടി സമ്മേളനത്തിന് മുമ്പ് തന്നെ അത് ഉണ്ടാകുമെന്നാണ് മറുനാടൻ ലഭിക്കുന്ന സൂചന.
നേരത്തെ അമേരിക്കയിലേക്ക് പോയപ്പോൾ അന്ന് മന്ത്രിയായിരുന്ന ഇപി ജയരാജനെയാണ് പകരം ചുമതല ഏൽപ്പിച്ചത്. മന്ത്രിസഭയിലെ രണ്ടാമൻ അന്ന് ജയരാജന് ആണെന്ന് ഏവർക്കും അറിയാമായിരുന്നു. ശൈലജ ടീച്ചറിനെ രണ്ടാം മന്ത്രിസഭയിൽ എടുക്കാത്തതിന് കാരണവും വിദേശത്തേക്കുള്ള ചികിൽസാ യാത്രകൾ ഉണ്ടെന്ന തിരിച്ചറിവിലാണെന്ന് നേരത്തെ റിപ്പോർട്ട് ഉണ്ടായിരുന്നു. ശൈലജ ടീച്ചർ മന്ത്രിസഭയിൽ ഉണ്ടായിരുന്നുവെങ്കിൽ ഇത്തവണ മുഖ്യമന്ത്രിയുടെ ചുമതല ടീച്ചറിന് നൽകേണ്ടി വരുമായിരുന്നു. ഇതൊഴിവാക്കാനാണ് ഏറെ സമ്മർദ്ദം ഉണ്ടായിട്ടും ശൈലജ ടീച്ചറിനെ ഒഴിവാക്കിയതെന്നാണ് സൂചന.
തിരുവനന്തപുരത്ത് ഏഷ്യയിലെ തന്നെ മികച്ച ആർ സി സി, ലോക പ്രശസ്തമായ ശ്രീ ചിത്തിര തിരുന്നാൾ ഇൻസ്റ്റിറ്റ്യൂട്ട്, സൂപ്പർ സ്പെഷ്യാലിറ്റി മെഡിക്കൽ കോളേജ്, എറണാകുളത്തെ ലേക് ഷോർ, അമൃത ഇങ്ങനെ ലോകോത്തരമായ ഒരുപാട് ആശുപത്രികളുണ്ട്. ഇവിടെ എല്ലാ രോഗത്തിനും ചികിൽസയുമുണ്ട്. ഈ സാഹചര്യത്തിൽ എന്തിനാണ് മുഖ്യമന്ത്രി അമേരിക്കയിൽ പോകുന്നതെന്ന ചോദ്യം ആദ്യ ഘട്ടത്തിൽ ഉടർന്നിരുന്നു. സിപിഎം നേതാക്കൾക്ക് പോലും മുഖ്യമന്ത്രിയുടെ രോഗത്തെ കുറിച്ച് അറിയില്ല. അത്രയും രഹസ്യമായാണ് രോഗ വിവരം സൂക്ഷിക്കുന്നത്. യു.എസിലെ മിനസോട്ടയിലെ റോചെസ്റ്ററിൽ പ്രവർത്തിക്കുന്ന മയോ ക്ലിനിക്കിലാക്കിനെ കാൻസറിന്റെ വിദഗ്ദ ചികിൽസാലയം ആയാണ് വിലിയിരുത്തുന്നത്.
മുൻ പ്രതിരോധ മന്ത്രി എ.കെ. ആന്റണി, നിയമസഭാ സ്പീക്കറായിരുന്ന ജി. കാർത്തികേയൻ എന്നിവരും മയോ ക്ലിനിക്കിൽ ചികിൽസ തേടിയിരുന്നു. ഇരുവരും കാൻസർ രോഗത്തിനാണ് മയോ ക്ലീനിക്കിൽ ചികിൽസയ്ക്ക് എത്തിയത്. ഇന്ത്യയിലെ പല പ്രമുഖരും ചികിൽസയ്ക്കായി പോകുന്നത് മയോ ക്ലീനിക്കിലാണ്. ഈ പാതയാണ് പിണറായിയും പിന്തുടരുന്നത്. മലയാളികളായ അമേരിക്കൻ ഡോക്ടർമാരാണ് ചികിൽസയ്ക്ക് വേണ്ട സൗകര്യങ്ങൾ പിണറായിക്ക് ഒരുക്കി നൽകിയത്.
