'കേരളത്തിന് ഇന്നൊരു ഇമാമുണ്ട്, ശൈഖുൽ മശായിഖ് പിണറായി വിജയൻ'; ഇഎംഎസ് ദിനാചരണത്തിൽ പിണറായിയെ പുകഴ്‌ത്തി സിപിഎം നേതാവിന്റെ പ്രസംഗം
മലപ്പുറം: ഇഎംഎസ്, എകെജി ദിനാചരണത്തിൽ മുഖ്യമന്ത്രി പിണറായി വിജയനെ വാനോളം പുകഴത്തി പ്രസംഗം. ഇഎംഎസ് ദിനാചരണത്തോട് അനുബന്ധിച്ചു നടത്തിയ പരിപാടിയിലെ പ്രസംഗത്തിലാണ് പിണറായി വിജയനെ പുകഴ്‌ത്തി സിപിഎം നേതാവ് രംഗത്തുവന്നത്. മാർച്ച് 19 ന് ചെമ്പ്രക്കോട്ടൂരിൽ നടന്ന ഇഎംഎസ്, എകെജി ദിനാചരണ യോഗത്തിലെ പ്രസംഗമാണ് ഇപ്പോൾ സമൂഹ മാധ്യങ്ങളിൽ പ്രചരിക്കുന്നത്. മുഖ്യമന്ത്രി പിണറായി വിജയൻ കേരളത്തിലെ ജനങ്ങളുടെ ഇമാമാണെന്നാണ് സിപിഐഎം പ്രാദേശിക നേതാവായ അബ്ദുറഹ്മാൻ പുൽപറ്റ അഭിപ്രായപ്പെട്ടത്.
'വലത്തേ അറ്റത്ത് ഖമറുൽ ഉലമ, ഇടത്തേ ഭാഗത്ത് സയിദ് ഉൽ ഉലമ ജിഫ്രി മുത്തുക്കോയ തങ്ങൾ. നടുക്ക് ശൈഖുൽ മശായിഖ് പിണറായി വിജയൻ, ക്യാപ്റ്റൻ. കേരളത്തിലെ ജനങ്ങൾക്ക് ഇപ്പോൾ ഒരു ഇമാമുണ്ടെന്ന് മനസ്സിലായിരിക്കുന്നു. അതാണ് ഒരു ശർറും ഏൽക്കാത്തത്,' അബ്ദുറഹ്മാൻ പുൽപറ്റ പറഞ്ഞു. വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. മുസ്ലിം ലീഗിൽ നിന്ന് സിപിഐഎമ്മിലെത്തിയ നേതാവാണ് അബ്ദുറഹ്മാൻ പുൽപറ്റ.
