'ഗസ്സയിലെ കുറ്റകൃത്യങ്ങൾ അവസാനിപ്പിക്കണം; ഫലസ്തീനികൾക്കെതിരായ സയണിസ്റ്റ് ഭരണകൂടത്തിന്റെ ക്രൂരത തുടർന്നാൽ മുസ്ലീങ്ങളെ തടയാൻ ആർക്കും കഴിയില്ല'; ഇസ്രയേലിന് മുന്നറിയിപ്പുമായി ഇറാന്റെ പരമോന്നത നേതാവ്
ടെഹ്റാൻ: ഹമാസിന് ശക്തമായ തിരിച്ചടി നൽകാൻ ഗസ്സയിൽ കരയുദ്ധത്തിന് ഇസ്രയേൽ തയ്യാറെടുക്കുന്നതിനിടെ ഫലസ്തീൻ ജനതയ്ക്ക് എതിരായ കുറ്റകൃത്യങ്ങൾ അവസാനിപ്പിക്കണമെന്ന മുന്നറിയിപ്പുമായി ഇറാൻ. ഇസ്രയേൽ കുറ്റകൃത്യങ്ങൾ തുടർന്നാൽ ലോകമെമ്പാടുമുള്ള മുസ്ലീങ്ങളെയും പ്രതിരോധ ശക്തികളെയും ആർക്കും തടുക്കാനാവില്ലെന്ന് ഇറാന്റെ പരമോന്നത നേതാവ് ആയത്തുല്ല അലി ഖമേനി മുന്നറിയിപ്പ് നൽകി. ഇറാനിയൻ സ്റ്റേറ്റ് ടിവിയാണ് ഇക്കാര്യം റിപ്പോർട്ട് ചെയ്തത്. ഗസ്സയിൽ കരയുദ്ധം നടത്താൻ ഇസ്രയേലിനെ അനുവദിക്കാനാവില്ലെന്നും അങ്ങനെ ചെയ്താൽ പ്രത്യാഘാതങ്ങൾ നേരിടേണ്ടിവരുമെന്നും ഇറാൻ വിദേശകാര്യ മന്ത്രി ഹുസൈൻ അമിറാബ്ദൊള്ളാഹിയാനും പറഞ്ഞു.
ഫലസ്തീനികൾക്കെതിരായ സയണിസ്റ്റ് ഭരണകൂടത്തിന്റെ കുറ്റകൃത്യങ്ങൾ തുടരുകയാണെങ്കിൽ ആർക്കും മുസ്ലീങ്ങളെയും പ്രതിരോധ ശക്തികളെയും നേരിടാൻ കഴിയില്ല... ഗസ്സയിലെ ബോംബാക്രമണം ഉടൻ അവസാനിപ്പിക്കണം - ഖമേനി പറഞ്ഞു. ഗസ്സയിൽ ഫലസ്തീനികൾക്കെതിരായ കുറ്റകൃത്യങ്ങൾ നടത്തിയ സയണിസ്റ്റ് ഭരണകൂടത്തിന്റെ ഉദ്യോഗസ്ഥരെ വിചാരണ ചെയ്യണമെന്നും അദ്ദേഹം ആവശ്യപ്പെട്ടു.
വരും സമയങ്ങളിൽ ഇറാന്റെ ഭാഗത്ത് നിന്ന് വലിയ തോതിൽ നടപടിയുണ്ടാകുമെന്ന് ഇറാൻ വിദേശകാര്യ മന്ത്രി ഹുസൈൻ അമിറബ്ദുള്ളാഹിയാൻ വെളിപ്പെടുത്തി. ഗസ്സയിൽ ഇസ്രയേൽ സർക്കാരിനെ ഒരു നടപടിയും സ്വീകരിക്കാൻ പ്രതിരോധ സേനാ നേതാക്കൾ അനുവദിക്കില്ല. എല്ലാ വാതിലുകളും ഞങ്ങൾക്കായി തുറന്നിരിക്കുന്നു. ഗസ്സയിലെ ജനങ്ങൾക്കെതിരെ നടക്കുന്ന യുദ്ധക്കുറ്റങ്ങളെക്കുറിച്ച് നിസ്സംഗത പാലിക്കാൻ കഴിയില്ലെന്നും അദ്ദേഹം പറഞ്ഞു.
ഇറാന്റെ പ്രതിരോധ സേനയ്ക്ക് ശത്രുക്കളുമായി (ഇസ്രയേൽ) വളരെക്കാലം പോരാടാനാകും. വരും മണിക്കൂറുകളിൽ പ്രതിരോധ സേനയിൽ നിന്ന് വലിയ നടപടി പ്രതീക്ഷിക്കാമെന്നും അദ്ദേഹം മുന്നറിയിപ്പ് നൽകി. എന്നാൽ ഇസ്രയേലിനെതിരെ ഇറാൻ എന്ത് തരത്തിലുള്ള നടപടിയെടുക്കുമെന്നും ഗസ്സയിലെ ആക്രമണത്തെ എങ്ങനെ തടയുമെന്നും അദ്ദേഹം വെളിപ്പെടുത്തിയില്ല.
ഹമാസ് ഒക്ടോബർ ഏഴിന് ഇസ്രയേലിനെതിരെ നടത്തിയ ആക്രമണത്തിൽ തങ്ങളുടെ രാജ്യത്തിന് പങ്കില്ലെന്ന് ഇറാൻ പരമോന്നത നേതാവ് ആയത്തുല്ല അലി ഖമേനി കഴിഞ്ഞ ആഴ്ച പറഞ്ഞിരുന്നു. എന്നാൽ ഹമാസ് ആക്രമണത്തിൽ ഇസ്രയേലിന് ഉണ്ടായ നാശനഷ്ടങ്ങളെയും സൈന്യത്തിന്റെയും രഹസ്യാന്വേഷണ വിഭാഗത്തിന്റെയും പരാജയത്തെയും അദ്ദേഹം അഭിനന്ദിച്ചു.
അതേസമയം, ഹമാസിന്റെ ഈ വിജയകരമായ നടപടികൾ തീർച്ചയായും ഇസ്രയേലികളുടെ പതനത്തിന് ആക്കം കൂട്ടുമെന്നും ഉടൻ തന്നെ അവരുടെ നാശത്തിലേക്ക് നയിക്കുമെന്നും ഖമേനിയുടെ ഉന്നത ഉപദേഷ്ടാവ് അലി അക്‌ബർ വെലായത്തി പ്രസ്താവനയിൽ പറഞ്ഞു.'ഈ മഹത്തായതും തന്ത്രപരവുമായ വിജയത്തിൽ ഞാൻ നിങ്ങളെ അഭിനന്ദിക്കുന്നു.വിട്ടുവീഴ്ച ചെയ്യുന്ന ജനങ്ങൾക്കുള്ള ഗുരുതരമായ മുന്നറിയിപ്പാണ് എന്റെ അഭിനന്ദനങ്ങൾ.', അദ്ദേഹം കൂട്ടിച്ചേർത്തു.
ഹമാസ് ആക്രമണത്തെ ഇറാൻ വിദേശകാര്യ മന്ത്രാലയ വക്താവ് നാസർ കനാനിയും ന്യായീകരിച്ചു. 'ഈ ഓപ്പറേഷൻ ... തങ്ങളുടെ അവകാശങ്ങളും ഇസ്രയേലിന്റെ യുദ്ധവും പ്രകോപനപരവുമായ നയങ്ങൾ സംരക്ഷിക്കുന്നതിനുമുള്ള ഫലസ്തീനികളുടെ സ്വാഭാവിക പ്രതികരണമാണ്.ഇത് ഫലസ്തീനിലെ അടിച്ചമർത്തപ്പെട്ട ജനതയുടെ പ്രസ്ഥാനമാണെന്നും അദ്ദേഹം പറഞ്ഞു.
1979-ൽ സ്ഥാപിതമായത് മുതൽ, ഇസ്ലാമിക രാജ്യമായ ഇറാൻ ഫലസ്തീൻ പ്രശ്‌നങ്ങളിൽ വലിയ പിന്തുണ നൽകുന്ന രാജ്യമാണ്.ഷിയാ ആധിപത്യമുള്ള ഇറാൻ മുസ്ലിം ലോകത്തിന്റെ സ്വയം പ്രഖ്യാപിത നേതാവാണ്. ഗസ്സ മുനമ്പ് നിയന്ത്രിക്കുന്ന ഹമാസിന് ധാർമ്മികവും സാമ്പത്തികവുമായ പിന്തുണ നൽകുന്നുണ്ടെന്ന് ഇറാൻ തുറന്ന് സമ്മതിച്ചിട്ടുണ്ട്.
മുമ്പും ഇസ്രയേലിന് ഇറാൻ മുന്നറിയിപ്പ് നൽകിയിട്ടുണ്ട്. ഫലസ്തീനികൾക്കെതിരായ ആക്രമണം അവസാനിപ്പിച്ചില്ലെങ്കിൽ മേഖലയിലെ മറ്റ് കക്ഷികൾ രംഗത്തിറങ്ങാൻ തയ്യാറാണെന്ന മുന്നറിയിപ്പുമായി ഇറാൻ വിദേശകാര്യ മന്ത്രിയാണ് രംഗത്തെത്തിയത്. അർദ്ധ ഔദ്യോഗിക വാർത്താ ഏജൻസിയായ ഫാർസാണ് ഇക്കാര്യം റിപ്പോർട്ട് ചെയ്തത്.
''സയണിസ്റ്റ് ആക്രമണങ്ങൾ അവസാനിപ്പിച്ചില്ലെങ്കിൽ, മേഖലയിലെ എല്ലാ കക്ഷികളും ഇടപെടാൻ തയ്യാറാണ്'' ഹുസൈൻ അമിറാബ്ദുള്ളാഹിയൻ പറഞ്ഞു. എന്നാൽ ഇസ്രയേലിനെതിരായ ഹമാസ് ഗ്രൂപ്പിന്റെ തീവ്രവാദി ആക്രമണത്തിൽ ടെഹ്റാന് പങ്കില്ലെന്ന് ഇറാന്റെ ഉന്നത അധികാരിയായ പരമോന്നത നേതാവ് ആയത്തുല്ല അലി ഖമേനി നേരത്തെ അറിയിച്ചിരുന്നു. ഇസ്രയേലിന്റെ സൈനിക, രഹസ്യാന്വേഷണ പരാജയമെന്നാണ് അദ്ദേഹം ആക്രമണത്തെ വിശേഷിപ്പിച്ചത്.
ഹമാസിന് ആയുധം നൽകിക്കൊണ്ട് ഇറാനിലെ പൗരോഹിത്യ ഭരണാധികാരികൾ അക്രമം അഴിച്ചുവിടുകയാണെന്ന് ഇസ്രയേൽ ദീർഘകാലമായി ആരോപിച്ചിരുന്നു. എന്നാൽ ഗസ്സ മുനമ്പ് നിയന്ത്രിക്കുന്ന ഹമാസ് ഗ്രൂപ്പിന് ധാർമികവും സാമ്പത്തികവുമായ പിന്തുണ നൽകുന്നുവെന്നാണ് ടെഹ്റാൻ പറയുന്നത്.
1979ലെ വിപ്ലവം മുതൽ സ്വതന്ത്ര ഫലസ്തീൻ എന്ന ലക്ഷ്യത്തെ പിന്തുണയ്ക്കുന്നത് ഇസ്ലാമിക് റിപ്പബ്ലിക്കിന്റെ നിലപാടാണ്, കൂടാതെ ഷിയാ ആധിപത്യമുള്ള രാജ്യം മുസ്ലിം ലോകത്തിന്റെ നേതാവായി സ്വയം കണക്കാക്കുന്നു.
ഗസ്സ മുനമ്പിനെതിരെ ഉപരോധം ഏർപ്പെടുത്തിക്കൊണ്ട് ഇസ്രയേൽ 'വംശഹത്യ' നടത്തുകയാണെന്ന് കഴിഞ്ഞ ആഴ്ച ആരോപിച്ച അമിറാബ്ദുല്ലാഹിയൻ, ഗസ്സയ്ക്കെതിരായ ആക്രമണം മിഡിൽ ഈസ്റ്റിൽ പ്രതിരോധത്തിന്റെ പുതിയ മുന്നണികൾ തുറക്കുമെന്നും ചൂണ്ടിക്കാട്ടി.
''മേഖലയിൽ പ്രതിരോധത്തിന്റെ പുതിയ മുന്നണികൾ തുറക്കുന്നതിന്റെയും ഇന്നത്തെ യുദ്ധത്തിന്റെ ഏത് തീവ്രതയുടെയും ഉത്തരവാദിത്തം നേരിട്ട് അമേരിക്കയുടെയും സയണിസ്റ്റ് ഭരണകൂടത്തിന്റെയും (ഇസ്രയേലിന്റെ) മേൽ പതിക്കുന്നു' അമിറാബ്ദുല്ലാഹിയൻ പറഞ്ഞു.
ശനിയാഴ്ച ഖത്തറിൽ വെച്ച് ഹമാസ് നേതാവ് ഇസ്മയിൽ ഹനിയേയുമായി അമിറാബ്ദുള്ളാഹിയൻ കൂടിക്കാഴ്ച നടത്തി, അവിടെ അവർ ഇസ്രയേലിലെ മാരകമായ ആക്രമണത്തെക്കുറിച്ച് ചർച്ച ചെയ്യുകയും ഗ്രൂപ്പിന്റെ ലക്ഷ്യങ്ങൾ കൈവരിക്കുന്നതിനായി സഹകരണം തുടരാൻ സമ്മതിക്കുകയും ചെയ്തുവെന്ന് ഇറാൻ പിന്തുണയുള്ള ഹമാസ് പ്രസ്താവനയിൽ പറഞ്ഞു.
നേരത്തെ, ഇറാൻ പ്രസിഡന്റ് ഇബ്രാഹിം റെയ്സി ഇമ്മാനുവൽ മാക്രോണിനെ ഫോണിലൂടെ ബന്ധപ്പെടുകയും, ഫലസ്തീനികൾക്കെതിരായ അടിച്ചമർത്തൽ തടയുന്നതിന് സഹായിക്കാൻ ഫ്രാൻസിനോട് അഭ്യർത്ഥിക്കുകയും ചെയ്തിരുന്നു.
