എവിടെ പോയാലും...കിമ്മിന്റെ ഒപ്പം കാണും; ചെറിയൊരു പരിപാടിക്ക് പങ്കെടുത്താലും നടുവിലത്തെ ഇരിപ്പിടത്തിൽ തന്നെ ഇരിക്കുന്നതും സ്ഥിരം കാഴ്ച; ഇതോടെ ജനങ്ങൾക്കിടയിൽ ചർച്ചയായത് അടുത്ത പിൻഗാമി ആരെന്ന ചോദ്യവും; സത്യത്തിൽ കിമ്മിന്റെ മകൾ വെറും പാവയോ? ലോകത്തിന് അറിയാത്ത ആ രഹസ്യങ്ങൾക്ക് പിന്നിലെന്ത്?
പ്യോങ്യാങ്: ഉത്തര കൊറിയയിൽ അടുത്തിടെ നടന്ന വർക്കേഴ്സ് പാർട്ടി കോൺഗ്രസ് ലോകശ്രദ്ധ ആകർഷിച്ചത് കിം ജോങ് ഉന്നിന്റെ ആണവ പ്രഖ്യാപനങ്ങൾ കൊണ്ട് മാത്രമല്ല, അദ്ദേഹത്തിന്റെ പിൻഗാമിയെക്കുറിച്ചുള്ള ചർച്ചകൾ കൂടിയാണ്. 1948 മുതൽ രാജ്യം ഭരിക്കുന്ന കിം രാജവംശത്തിന്റെ നാലാം തലമുറ നേതാവായി കിം തന്റെ മകൾ ജൂ-അയെ തിരഞ്ഞെടുത്തു കഴിഞ്ഞു എന്നതാണ് ഭൂരിഭാഗം നിരീക്ഷകരുടെയും വിലയിരുത്തൽ. എന്നാൽ ഇതിനെതിരെ വ്യത്യസ്തമായ അഭിപ്രായങ്ങളും ഉയരുന്നുണ്ട്.
ഉത്തര കൊറിയൻ രാഷ്ട്രീയത്തെ നിരീക്ഷിക്കുന്ന മിച്ച് ഷിൻ പറയുന്നത്, ജൂ-അയ്ക്ക് മുന്നിലുള്ള ഏറ്റവും വലിയ തടസ്സം രാജ്യത്തെ ആഴത്തിൽ വേരൂന്നിയ പുരുഷാധിപത്യ സ്വഭാവമാണെന്നാണ്. ഉത്തര കൊറിയ ഒരു സോഷ്യലിസ്റ്റ് സ്റ്റേറ്റിനേക്കാൾ ഉപരിയായി ഒരു 'നിയോ-കൺഫ്യൂഷ്യൻ രാജഭരണം' പോലെയാണ് പ്രവർത്തിക്കുന്നത്. 60-ഉം 70-ഉം വയസ്സുള്ള പ്രായമായ ജനറൽമാർ ഒരു യുവതിയെ തങ്ങളുടെ 'പരമോന്നത നേതാവായി' അംഗീകരിക്കാനും അവരോട് മരണം വരെ വിശ്വസ്തത പുലർത്താനും തയ്യാറാകുമോ എന്നത് സംശയമാണ്. ഇത് ഭരണകൂടത്തിന്റെ ആഭ്യന്തര യുക്തിക്ക് തന്നെ വിരുദ്ധമായിരിക്കുമെന്ന് അദ്ദേഹം കരുതുന്നു.
മറ്റൊരു പ്രധാന നിരീക്ഷണം, കിം തന്റെ മകളെ ഒരു 'ഹ്യൂമൻ ഷീൽഡ്' (Human Shield) ആയി ഉപയോഗിക്കുകയാണെന്നാണ്. കിമ്മിന് മൂത്ത ഒരു മകൻ ഉണ്ടെന്ന് പറയപ്പെടുന്നു. അന്താരാഷ്ട്ര രഹസ്യാന്വേഷണ ഏജൻസികളുടെ കണ്ണിൽപ്പെടാതെ യഥാർത്ഥ പിൻഗാമിയായ മകനെ സംരക്ഷിക്കാൻ മകളെ ഒരു മറയായി ഉപയോഗിക്കുകയാണോ എന്ന സംശയവും നിലനിൽക്കുന്നു. എന്നാൽ, പിൻഗാമി 'പെയ്ക്തു' രക്തപരമ്പരയിൽ നിന്നുള്ളയാളായിരിക്കണം എന്ന നിബന്ധനയ്ക്കാണ് മറ്റെന്തിനേക്കാളും പ്രാധാന്യമെന്ന് മറുഭാഗം വാദിക്കുന്നു.
എൻകെ ന്യൂസിലെ ശ്രേയസ് റെഡ്ഡി പറയുന്നത്, ജൂ-അയുടെ സാന്നിധ്യം രാഷ്ട്രീയത്തേക്കാൾ ഉപരിയായി ഒരു 'പ്രകടനം' (Performative) ആണെന്നാണ്. രാജ്യത്തിന്റെ മൊത്തം പിതാവായി കിമ്മിനെ ചിത്രീകരിക്കാനുള്ള ഒരു ശ്രമത്തിന്റെ ഭാഗമായി സ്നേഹനിധിയായ ഒരു അച്ഛൻ എന്ന പ്രതിച്ഛായ നൽകാനാണ് മകളെ ഒപ്പം കൂട്ടുന്നത്. സ്റ്റേറ്റ് മീഡിയ ഇതുവരെ അവളുടെ പേര് ഔദ്യോഗികമായി പ്രസിദ്ധീകരിച്ചിട്ടില്ല എന്നതും ശ്രദ്ധേയമാണ്.
പുതുവർഷത്തിൽ കുംസുസൻ പാലസ് സന്ദർശിച്ചപ്പോൾ മുൻനിരയുടെ മധ്യഭാഗത്താണ് കിം മകളെ ഇരുത്തിയത്. 42 വയസ്സുള്ള കിം തന്റെ അനന്തരാവകാശി മകളാണെന്ന് ഉറപ്പിക്കാൻ ശ്രമിക്കുന്നതിന്റെ തെളിവാണിതെന്ന് നിരീക്ഷകർ പറയുന്നു. മിസൈൽ പരീക്ഷണങ്ങളിലും സൈനിക പരേഡുകളിലും കിമ്മിന്റേതിന് സമാനമായ ലെതർ കോട്ടുകൾ ധരിച്ചാണ് ജൂ-അ പ്രത്യക്ഷപ്പെടുന്നത്. രാജ്യത്തിന്റെ സുരക്ഷയുടെയും ഭാവി ഐശ്വര്യത്തിന്റെയും പ്രതീകമായ ഈ വസ്ത്രധാരണം യാദൃശ്ചികമല്ല.
കഴിഞ്ഞ വർഷം ഷി ജിൻപിങ്ങുമായുള്ള കൂടിക്കാഴ്ചയ്ക്കായി ബീജിംഗിലേക്ക് പോയപ്പോഴും അവൾ പിതാവിനൊപ്പമുണ്ടായിരുന്നു. 2022 നവംബറിലെ മിസൈൽ പരീക്ഷണത്തിലൂടെ ലോകത്തിന് മുന്നിലെത്തിയ കിം ജൂ-അ, ഇന്ന് ഉത്തര കൊറിയൻ രാഷ്ട്രീയത്തിലെ അവിഭാജ്യ സാന്നിധ്യമാണ്. അവൾ രാജ്യത്തിന്റെ അടുത്ത പരമോന്നത നേതാവാകുമോ അതോ ഒരു നിഗൂഢ ഭരണകൂടത്തിന്റെ പ്രചരണ തന്ത്രത്തിന്റെ ഭാഗം മാത്രമാണോ എന്ന് കാത്തിരുന്ന് കാണേണ്ടിയിരിക്കുന്നു.
2022 നവംബറിലാണ് ലോകം ആദ്യമായി കിം ജൂ-അയെ കാണുന്നത്. അന്ന് ഒരു ഭൂഖണ്ഡാന്തര ബാലിസ്റ്റിക് മിസൈലിന്റെ (ICBM) പരീക്ഷണ വേളയിൽ പിതാവിന്റെ കൈപിടിച്ച് നടക്കുന്ന ഒരു കുഞ്ഞു പെൺകുട്ടിയായാണ് അവൾ പ്രത്യക്ഷപ്പെട്ടത്. എന്നാൽ പിന്നീട് നടന്ന ഓരോ ചടങ്ങുകളിലും അവൾക്ക് ലഭിക്കുന്ന പ്രാധാന്യം വർദ്ധിച്ചുവരികയായിരുന്നു. ദക്ഷിണ കൊറിയൻ രഹസ്യാന്വേഷണ ഏജൻസികളുടെ (NIS) റിപ്പോർട്ട് പ്രകാരം, ഉത്തര കൊറിയൻ മാധ്യമങ്ങൾ ഇപ്പോൾ അവളെ വിശേഷിപ്പിക്കുന്നത് "ബഹുമാന്യയായ മകൾ" (Respected Daughter) എന്നും "പ്രിയപ്പെട്ട മകൾ" എന്നുമാണ്. മുൻപ് കിം ജോങ് ഉന്നിനെ വിശേഷിപ്പിക്കാൻ ഉപയോഗിച്ചിരുന്ന പദവികൾ തന്നെ മകൾക്ക് നൽകുന്നത് അവൾ അടുത്ത ഭരണാധികാരിയാകും എന്നതിന്റെ കൃത്യമായ അടയാളമാണ്.
അടുത്തിടെ നടന്ന ഉത്തര കൊറിയൻ സൈന്യത്തിന്റെ വാർഷിക പരേഡിലും മറ്റ് മിസൈൽ പരീക്ഷണങ്ങളിലും കിം ജൂ-അയ്ക്ക് വലിയ പ്രാധാന്യമാണ് നൽകപ്പെട്ടത്. പരേഡുകളിൽ കിം ജോങ് ഉന്നിനൊപ്പം പ്രധാന വേദിയിൽ അവൾ നിൽക്കുന്നത് സാധാരണയായി. സൈനിക ജനറൽമാർ പോലും ഈ പെൺകുട്ടിയോട് അങ്ങേയറ്റം ആദരവോടെ പെരുമാറുന്ന ദൃശ്യങ്ങൾ ഉത്തര കൊറിയൻ ടെലിവിഷൻ ചാനലുകൾ പുറത്തുവിട്ടിരുന്നു. രാജ്യത്തിന്റെ സുരക്ഷയുടെയും ഭാവിശക്തിയുടെയും പ്രതീകമായാണ് അവളെ അവതരിപ്പിക്കുന്നത്.
കിം കുടുംബത്തിന്റെ നാലാം തലമുറ ഭരണം ഉറപ്പാക്കുക എന്നതാണ് കിം ജോങ് ഉന്നിന്റെ ലക്ഷ്യമെന്ന് കരുതപ്പെടുന്നു. കിമ്മിന് ഒരു മകൻ ഉണ്ടെന്ന് നേരത്തെ ചില റിപ്പോർട്ടുകൾ ഉണ്ടായിരുന്നുവെങ്കിലും, ഇതുവരെ ആൺമക്കളെ ആരെയും പൊതുവേദിയിൽ കൊണ്ടുവന്നിട്ടില്ല. അതിനാൽ തന്നെ ജൂ-അയെ തന്റെ രാഷ്ട്രീയ പിൻഗാമിയായി അദ്ദേഹം നേരത്തെ തന്നെ പരിശീലിപ്പിക്കുകയാണെന്ന് കരുതപ്പെടുന്നു. ഉത്തര കൊറിയ പോലുള്ള ഒരു തീവ്ര പുരുഷാധിപത്യ സമൂഹത്തിൽ ഒരു വനിതാ ഭരണാധികാരിയെ അംഗീകരിപ്പിക്കുക എന്നത് വെല്ലുവിളിയായതിനാൽ, ചെറുപ്പത്തിലേ അവളെ ജനങ്ങൾക്കിടയിൽ പരിചിതയാക്കാനാണ് ഈ നീക്കങ്ങൾ.
