ജയ്പുർ: ബാബറി മസ്ജിദ് തകർത്ത ഡിസംബർ ആറാം തീയതി സംസ്ഥാനത്തെ സ്കൂളുകളിൽ 'ശൗര്യ ദിവസ്' ആയി ആഘോഷിക്കണമെന്ന രാജസ്ഥാൻ വിദ്യാഭ്യാസ മന്ത്രി മദൻ ദിലാവറിന്റെ ഉത്തരവ് മണിക്കൂറുകൾക്കകം പിൻവലിച്ചു. സ്കൂളുകളിൽ നിലവിൽ പരീക്ഷകൾ നടക്കുകയാണെന്നും അതിനാൽ മറ്റ് പരിപാടികൾ സംഘടിപ്പിക്കാൻ സാധിക്കില്ലെന്നും ചൂണ്ടിക്കാട്ടിയാണ് വിദ്യാഭ്യാസ വകുപ്പ് ഉത്തരവ് പിൻവലിച്ചത്. രാജസ്ഥാൻ വിദ്യാഭ്യാസ വകുപ്പ് ശനിയാഴ്ച വൈകുന്നേരം പുറപ്പെടുവിച്ച ഉത്തരവ് ഞായറാഴ്ച രാവിലെ 9.15-ഓടെയാണ് പിൻവലിച്ചത്.

നിർദ്ദേശം പുറത്തുവിട്ടതിന് പിന്നാലെയുണ്ടായ വ്യാപക വിമർശനങ്ങളെ തുടർന്ന് ഏകദേശം 12 മണിക്കൂറിനുള്ളിലാണ് ഈ നടപടി. "സംസ്ഥാനത്തെ എല്ലാ സ്കൂളുകളിലും നിലവിൽ പരീക്ഷകൾ നടക്കുകയാണ്. ഈ സാഹചര്യത്തിൽ സ്കൂളുകളിൽ മറ്റ് പ്രവർത്തനങ്ങളോ പരിപാടികളോ നടത്താൻ സാധിക്കില്ല. അതിനാൽ, 'ശൗര്യ ദിവസ്' ആഘോഷങ്ങൾ താൽക്കാലികമായി മാറ്റിവെച്ചിരിക്കുന്നു" എന്ന് പിൻവലിക്കൽ ഉത്തരവിൽ വ്യക്തമാക്കുന്നു.

വിദ്യാർത്ഥികളിലും അധ്യാപകരിലുമടക്കം "ദേശസ്നേഹം, ദേശീയത, ധീരത, സാംസ്കാരിക അഭിമാനം, ദേശീയ ഐക്യം" എന്നിവ പ്രോത്സാഹിപ്പിക്കുന്നതിനായി ഡിസംബർ ആറിന് വിവിധ വിദ്യാഭ്യാസപരവും സാംസ്കാരികപരവുമായ പരിപാടികൾ സംഘടിപ്പിക്കാനായിരുന്നു സെക്കൻഡറി വിദ്യാഭ്യാസ ഡയറക്ടർ സീതാറാം ജാട്ട് സ്കൂളുകൾക്ക് നിർദ്ദേശം നൽകിയിരുന്നത്. ബാബറി മസ്ജിദ് തകർത്തതിന്റെ വാർഷിക ദിനമായ ഡിസംബർ ആറിനെ 'ശൗര്യ ദിവസ്' ആയി ആചരിക്കാൻ നിർദ്ദേശിച്ചതിനെതിരെ പ്രതിപക്ഷത്തു നിന്നും വിവിധ സാംസ്കാരിക സംഘടനകളിൽ നിന്നും ശക്തമായ വിമർശനങ്ങൾ ഉയർന്നിരുന്നു.

താൻ പുറപ്പെടുവിച്ച നിർദ്ദേശം പിൻവലിക്കേണ്ടി വന്നെങ്കിലും, 'ശൗര്യ ദിവസ്' ആഘോഷിക്കാനുള്ള തീരുമാനത്തെ മന്ത്രി ദിലാവർ പിന്നീട് ന്യായീകരിച്ചു. ശ്രീരാമൻ ഇന്ത്യൻ സംസ്കാരത്തിന്റെ ആദർശങ്ങളെയും മൂല്യങ്ങളെയും പ്രതിനിധീകരിക്കുന്നുവെന്നും അയോധ്യയിലെ രാമക്ഷേത്രം രാജ്യത്തിന്റെ സാംസ്കാരിക അഭിമാനത്തിന്റെ പ്രതീകമാണെന്നും അദ്ദേഹം വ്യക്തമാക്കി. രാമജന്മഭൂമി പ്രസ്ഥാനത്തെക്കുറിച്ചും അതിന്റെ ചരിത്രത്തെക്കുറിച്ചും വിദ്യാർത്ഥികൾ പഠിക്കുന്നത് അവരിൽ ദേശസ്നേഹവും ദേശീയ ഐക്യവും വളർത്തിയെടുക്കാൻ സഹായിക്കുമെന്നായിരുന്നു മന്ത്രിയുടെ നിലപാട്.

'ശൗര്യ ദിവസിന്റെ' ഭാഗമായി വിപുലമായ പരിപാടികളാണ് സ്കൂളുകളിൽ സംഘടിപ്പിക്കാൻ ഉദ്ദേശിച്ചിരുന്നത്. ഇന്ത്യൻ സംസ്കാരത്തെയും രാമക്ഷേത്ര പ്രസ്ഥാനത്തെയും കേന്ദ്രീകരിച്ച് പ്രസംഗ, ഉപന്യാസ മത്സരങ്ങൾ നടത്താനും, അയോധ്യ രാമക്ഷേത്രത്തെ പ്രമേയമാക്കിയുള്ള ചിത്രരചനയും പോസ്റ്റർ നിർമ്മാണ പ്രവർത്തനങ്ങളും സംഘടിപ്പിക്കാനും നിർദ്ദേശിച്ചിരുന്നു. ഇതിനുപുറമെ, ദേശഭക്തി ഗാനാവതരണങ്ങൾ, നാടോടി നൃത്ത പ്രകടനങ്ങൾ, ചരിത്രപരമോ പുരാണപരമോ ആയ സംഭവങ്ങളെ അടിസ്ഥാനമാക്കിയുള്ള ഹ്രസ്വ നാടകങ്ങൾ എന്നിവയും പരിപാടികളിൽ ഉൾപ്പെടുത്താൻ ആവശ്യപ്പെട്ടിരുന്നു. രാമജന്മഭൂമി പ്രസ്ഥാനവുമായും ഇന്ത്യൻ ചരിത്രത്തിലെ മറ്റ് "വീര സംഭവങ്ങളുമായും" ബന്ധപ്പെട്ട ഫോട്ടോഗ്രാഫുകൾ, ലേഖനങ്ങൾ, പുരാവസ്തുക്കൾ എന്നിവയുടെ പ്രദർശനങ്ങളും സംഘടിപ്പിക്കാൻ നിർദ്ദേശം നൽകിയിരുന്നു.

ബാബരി മസ്ജിദ്ശൗര്യ ദിവസ്വിദ്യാഭ്യാസ മന്ത്രി

സ്വന്തം ലേഖകൻ