'ബുർഖ' ധരിച്ച് വോട്ട് ചെയ്യാനെത്തുന്ന സ്ത്രീകളുടെ മുഖം വോട്ടർ കാർഡുമായി ഉറപ്പായും ഒത്തുനോക്കണം; ആത്മവിശ്വാസം വളർത്താൻ ഫ്ലാഗ് മാർച്ച് നടത്താനും മറക്കല്ലേ; തെരഞ്ഞെടുപ്പ് കമ്മീഷനോട് ബിജെപി

പട്ന: ബിഹാർ നിയമസഭാ തെരഞ്ഞെടുപ്പിൽ, ബുർഖ ധരിച്ച് വോട്ട് ചെയ്യാൻ എത്തുന്ന സ്ത്രീകളുടെ മുഖം വോട്ടർ കാർഡുകളുമായി താരതമ്യം ചെയ്ത് യഥാർത്ഥ വോട്ടർമാർക്ക് മാത്രമേ വോട്ടവകാശം വിനിയോഗിക്കാൻ കഴിയൂ എന്ന് ഉറപ്പാക്കണമെന്ന് ബിജെപി തെരഞ്ഞെടുപ്പ് കമ്മീഷനോട് ആവശ്യപ്പെട്ടു. കൂടാതെ, തെരഞ്ഞെടുപ്പ് ഒന്നോ രണ്ടോ ഘട്ടങ്ങളിലായി നടത്തണമെന്നും പാർട്ടി ശുപാർശ ചെയ്തിട്ടുണ്ട്.

ബിജെപി സംസ്ഥാന പ്രസിഡന്റ് ദിലീപ് ജയ്‌സ്വാളിന്റെ നേതൃത്വത്തിലുള്ള പ്രതിനിധി സംഘം പട്‌നയിൽ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ നേതൃത്വത്തിലുള്ള സംഘത്തെ സന്ദർശിച്ചപ്പോഴാണ് ഈ ആവശ്യങ്ങൾ ഉന്നയിച്ചത്. തെരഞ്ഞെടുപ്പ് ഒരുക്കങ്ങൾ വിലയിരുത്തുന്നതിന്റെ ഭാഗമായി കമ്മീഷൻ സംസ്ഥാനം സന്ദർശിക്കുകയും ഏതാനും ദിവസങ്ങൾക്കുള്ളിൽ തെരഞ്ഞെടുപ്പ് ഷെഡ്യൂൾ പ്രഖ്യാപിക്കുമെന്ന് അറിയിക്കുകയും ചെയ്തു.

"ബുർഖ ധരിച്ച സ്ത്രീകളുടെ മുഖം അതത് കാർഡുകൾ ഉപയോഗിച്ച് ഉറപ്പാക്കണം. അതുവഴി യഥാർത്ഥ വോട്ടർമാർക്ക് മാത്രമേ അവരുടെ വോട്ടവകാശം വിനിയോഗിക്കാൻ കഴിയൂവെന്ന് ഉറപ്പാക്കാം," ജയ്‌സ്വാൾ മാധ്യമപ്രവർത്തകരോട് പറഞ്ഞു. പിന്നാക്ക വിഭാഗങ്ങളുള്ള ഗ്രാമങ്ങളിൽ തെരഞ്ഞെടുപ്പ് ദിവസത്തിന് മുമ്പായി അർദ്ധസൈനിക വിഭാഗങ്ങളെ വിന്യസിക്കണമെന്നും വോട്ടർമാരിൽ ആത്മവിശ്വാസം വളർത്തുന്നതിനായി ഫ്ലാഗ് മാർച്ച് നടത്തണമെന്നും ബിജെപി ആവശ്യപ്പെട്ടു.