അത് ശരിയാവില്ല..ഞാൻ ഒരിക്കലും വരില്ല!! ഒരു പരിപാടിയിൽ പങ്കെടുക്കണമെന്ന മന്ത്രിയുടെ നിർദ്ദേശത്തിന് പുല്ലുവില; സീരിയസ് വിഷയമെന്ന് പറഞ്ഞിട്ടും കേട്ടില്ല; ഒടുവിൽ ഐഎഎസ് ഉദ്യോഗസ്ഥന് എട്ടിന്റെ പണി
മുംബൈ: മന്ത്രി വിളിച്ചുചേർത്ത നിർണ്ണായക യോഗങ്ങളിൽ നിന്ന് വിട്ടുനിന്ന ഐഎഎസ് ഉദ്യോഗസ്ഥനെതിരെയും മുതിർന്ന ഉദ്യോഗസ്ഥനെതിരെയും കർശന നടപടിയുമായി മഹാരാഷ്ട്ര സർക്കാർ. 2011 ബാച്ച് ഐഎഎസ് ഉദ്യോഗസ്ഥനും മഹാരാഷ്ട്ര മലിനീകരണ നിയന്ത്രണ ബോർഡ് (MPCB) മെമ്പർ സെക്രട്ടറിയുമായ എം. ദേവേന്ദർ സിംഗ്, എംപിസിബി ജോയിന്റ് ഡയറക്ടർ സതീഷ് പദ്വൽ എന്നിവരെയാണ് സർവീസിൽ നിന്ന് സസ്പെൻഡ് ചെയ്തത്. ഭരണനിർവ്വഹണത്തിൽ ഉദ്യോഗസ്ഥർ കാട്ടുന്ന അലംഭാവത്തിനെതിരെയുള്ള ശക്തമായ താക്കീതായാണ് ഈ നടപടി വിലയിരുത്തപ്പെടുന്നത്.
ഫെബ്രുവരി 26-ന് മഹാരാഷ്ട്ര നിയമസഭാ സമ്മേളനത്തിനിടെയാണ് നാടകീയമായ സംഭവങ്ങൾ അരങ്ങേറിയത്. ചന്ദ്രപൂർ ജില്ലയിലെ വർദ്ധിച്ചുവരുന്ന മലിനീകരണത്തെക്കുറിച്ച് സഭയിൽ ഉന്നയിക്കപ്പെട്ട ചോദ്യത്തിന് മറുപടി നൽകാൻ സംസ്ഥാന പരിസ്ഥിതി മന്ത്രി പങ്കജ മുണ്ടെയോട് സ്പീക്കർ ആവശ്യപ്പെട്ടു. എന്നാൽ, വിഷയത്തിൽ കൃത്യമായ മറുപടി നൽകാൻ ആവശ്യമായ വിവരങ്ങൾ തന്റെ പക്കലില്ലെന്ന് മന്ത്രി സഭയെ അറിയിച്ചു.
മറുപടി തയ്യാറാക്കുന്നതിനായി ബന്ധപ്പെട്ട ഉദ്യോഗസ്ഥരുടെ യോഗം മന്ത്രി വിളിച്ചുചേർത്തിരുന്നു. എന്നാൽ ഐഎഎസ് ഉദ്യോഗസ്ഥനായ ദേവേന്ദർ സിംഗും ജോയിന്റ് ഡയറക്ടറും യോഗത്തിൽ പങ്കെടുത്തില്ല. താൻ യോഗത്തിൽ പങ്കെടുക്കില്ലെന്ന് ദേവേന്ദർ സിംഗ് സന്ദേശം അയക്കുക കൂടി ചെയ്തതോടെ സംഗതി വിവാദമായി. നിയമസഭയിൽ മറുപടി നൽകേണ്ട ഗൗരവകരമായ ഒരു വിഷയത്തിൽ ഉദ്യോഗസ്ഥർ കാട്ടിയ നിരുത്തരവാദപരമായ സമീപനം മന്ത്രി സഭയുടെ ശ്രദ്ധയിൽപ്പെടുത്തി.
മന്ത്രിയുടെ വിശദീകരണം കേട്ട സ്പീക്കർ, സംഭവത്തിൽ അടിയന്തര നടപടി സ്വീകരിക്കാൻ സർക്കാരിനോട് നിർദ്ദേശിച്ചു. തുടർന്ന് വെറും 24 മണിക്കൂറിനുള്ളിൽ തന്നെ സർക്കാർ സസ്പെൻഷൻ ഉത്തരവ് പുറപ്പെടുവിച്ചു. 1969-ലെ അഖിലേന്ത്യാ സർവീസസ് (അച്ചടക്കവും അപ്പീലും) ചട്ടങ്ങൾ പ്രകാരമാണ് ഐഎഎസ് ഉദ്യോഗസ്ഥനെതിരെ നടപടിയെടുത്തത്. സതീഷ് പദ്വലിനെതിരെ വകുപ്പുതല അന്വേഷണത്തിനും ഉത്തരവിട്ടു.
സംഭവം ഐഎഎസ് വൃത്തങ്ങൾക്കിടയിൽ വലിയ ചർച്ചയായിട്ടുണ്ട്. തിരഞ്ഞെടുക്കപ്പെട്ട ജനപ്രതിനിധികളോടും നിയമസഭയോടും ഉദ്യോഗസ്ഥർക്ക് ഉത്തരവാദിത്തമുണ്ടെന്ന് ബിജെപി നേതാവ് സുധീർ മുൻഗന്തിവാർ പ്രതികരിച്ചു. മന്ത്രിമാർ വിളിക്കുന്ന യോഗങ്ങളിൽ പങ്കെടുക്കാതിരിക്കുന്നത് ഭരണസംവിധാനത്തോടുള്ള വെല്ലുവിളിയാണെന്നും അദ്ദേഹം കൂട്ടിച്ചേർത്തു.
ജനകീയ പ്രശ്നങ്ങളിൽ ഉദ്യോഗസ്ഥർ കാണിക്കുന്ന അനാസ്ഥ വച്ചുപൊറുപ്പിക്കില്ലെന്ന കർശന സന്ദേശമാണ് ഏകനാഥ് ഷിൻഡെ സർക്കാർ ഈ നടപടിയിലൂടെ നൽകുന്നത്. ചന്ദ്രപൂർ ജില്ലയിലെ മലിനീകരണ പ്രശ്നത്തിൽ പരിഹാരം കാണുന്നതിന് പകരം ഉദ്യോഗസ്ഥർ ഒഴിഞ്ഞുമാറിയത് സർക്കാരിനെ സഭയിൽ പ്രതിരോധത്തിലാക്കിയിരുന്നു.
