തമിഴ്നാട് രാഷ്ട്രീയത്തില്‍ തിരയിളക്കം; എഐഎഡിഎംകെയില്‍ നിന്ന് പുറത്താക്കിയ മുന്‍ മന്ത്രി കെ.എ.സെങ്കോട്ടയ്യന്‍ എംഎല്‍എ സ്ഥാനം രാജിവച്ചു; ബിജെപിയില്‍ ചേരുമെന്ന അഭ്യൂഹങ്ങള്‍ക്ക് പിന്നാലെ വിജയ്യുടെ ടിവികെയില്‍ ചേരുമെന്ന് സൂചന
കെ.എ. സെങ്കോട്ടയ്യന്‍ എംഎല്‍എ സ്ഥാനം രാജിവച്ചു
ചെന്നൈ: തമിഴ്നാട്ടിലെ എഐഎഡിഎംകെ നേതാവും മുന്‍ മന്ത്രിയുമായ കെ.എ. സെങ്കോട്ടയ്യന്‍ എംഎല്‍എ സ്ഥാനം രാജിവച്ചു. തമിഴ്നാട് നിയമസഭാ സ്പീക്കര്‍ എം. അപ്പാവുവിന് അദ്ദേഹം ഇന്ന് രാവിലെ പതിനൊന്ന് മണിയോടെയാണ് രാജിക്കത്ത് കൈമാറിയത്. വിജയ്യുടെ പാര്‍ട്ടിയായ തമിഴക വെട്രി കഴകത്തില്‍ (ടിവികെ) അദ്ദേഹം ഉടന്‍ ചേരുമെന്നാണ് പുറത്തുവരുന്ന റിപ്പോര്‍ട്ടുകള്‍. നാളെ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടാകുമെന്നും സൂചനയുണ്ട്.
എഐഎഡിഎംകെയുമായുള്ള അകല്‍ച്ച
എഐഎഡിഎംകെ ജനറല്‍ സെക്രട്ടറി എടപ്പാടി പളനിസ്വാമിയുമായി (ഇപിഎസ്) പരസ്യമായി വാക് തര്‍ക്കത്തിലേര്‍പ്പെട്ടതിനെ തുടര്‍ന്നാണ് സെങ്കോട്ടയ്യന്‍ പാര്‍ട്ടിയില്‍ ഒറ്റപ്പെട്ടത്. സെപ്റ്റംബര്‍ 5-ന് എഐഡിഎംകെയില്‍ നിന്നും പുറത്താക്കപ്പെട്ട നേതാക്കളായ ഒ. പനീര്‍ശെല്‍വം, ടി.ടി.വി. ദിനകരന്‍, വി.കെ. ശശികല എന്നിവരെ തിരികെ കൊണ്ടുവരണമെന്ന് അദ്ദേഹം ഇപിഎസിനോട് ശക്തമായി ആവശ്യപ്പെട്ടിരുന്നു.
ഒക്ടോബര്‍ 31-നാണ് സെങ്കോട്ടയ്യനെ എഐഎഡിഎംകെയില്‍ നിന്നും പുറത്താക്കിയത്. രാമനാഥപുരം ജില്ലയിലെ പശുംപൂണില്‍ വെച്ച് എഎംഎംകെ നേതാവ് ടി.ടി.വി. ദിനകരന്‍, എഐഎഡിഎംകെ കാഡര്‍മാരുടെ അവകാശ വീണ്ടെടുപ്പ് കഴകം കോര്‍ഡിനേറ്റര്‍ ഒ. പനീര്‍ശെല്‍വം എന്നിവരോടൊപ്പം അദ്ദേഹം പൊതുവേദിയില്‍ പങ്കെടുത്തതിന് പിന്നാലെയായിരുന്നു ഈ നടപടി.
വരാനിരിക്കുന്ന തിരഞ്ഞെടുപ്പുകളില്‍ പരാജയം ഒഴിവാക്കാന്‍ ഇവരെ തിരികെ കൊണ്ടുവരേണ്ടത് അത്യാവശ്യമാണെന്നായിരുന്നു സെങ്കോട്ടയ്യന്റെ വാദം. ഈ സംഭവത്തിന് പിന്നാലെ അച്ചടക്ക നടപടിയുടെ ഭാഗമായി അദ്ദേഹത്തെ പാര്‍ട്ടിയുടെ ചുമതലകളില്‍ നിന്നും നീക്കിയിരുന്നു. ഇതിന് തുടര്‍ച്ചയായാണ് അദ്ദേഹം ഇപ്പോള്‍ എംഎല്‍എ സ്ഥാനം രാജിവച്ചിരിക്കുന്നത്.
സെങ്കോട്ടയ്യന്റെ രാജി ടിവികെയില്‍ ചേരാനുള്ള നീക്കത്തിന്റെ ഭാഗമാണെന്ന അഭ്യൂഹങ്ങള്‍ ഇതോടെ ബലപ്പെടുകയാണ്. ദ്രാവിഡ രാഷ്ട്രീയത്തിലെ പ്രമുഖനായ സെങ്കോട്ടയ്യന്റെ വരവ് ടിവികെയ്ക്ക് വലിയ മുതല്‍ക്കൂട്ടായേക്കും.
ബിജെപി ഇടപെടല്‍ ശ്രമങ്ങള്‍
പാര്‍ട്ടിയില്‍ നിന്നും പുറത്താക്കപ്പെടുന്നതിന് മുന്‍പും ശേഷവും സെങ്കോട്ടയ്യന്‍ ഡല്‍ഹിയില്‍ മുതിര്‍ന്ന ബിജെപി നേതാക്കളുമായി പലതവണ രഹസ്യ കൂടിക്കാഴ്ചകള്‍ നടത്തിയതായി റിപ്പോര്‍ട്ടുകളുണ്ട്. 'ആത്മീയ സമാധാനം' തേടിയുള്ള യാത്ര എന്നായിരുന്നു അദ്ദേഹം ഒരു സന്ദര്‍ശനത്തെ വിശേഷിപ്പിച്ചത്. എഐഎഡിഎംകെയെ ഒന്നിപ്പിക്കാനുള്ള തന്റെ ശ്രമങ്ങള്‍ ബിജെപിയുടെ ദേശീയ നേതൃത്വത്തിന്റെ നിര്‍ദ്ദേശപ്രകാരമായിരുന്നുവെന്നും അദ്ദേഹം പരസ്യമായി അവകാശപ്പെട്ടിരുന്നു.
എന്നാല്‍, നിലവിലെ രാജിക്ക് പിന്നാലെ അദ്ദേഹം വിജയ്യുടെ ടിവികെയില്‍ ചേരാനുള്ള നീക്കമാണ് നടത്തുന്നത്.
