വീട്ടില്‍ നിന്നിറങ്ങുമ്പോള്‍ മുതല്‍ നിരീക്ഷണം; ഫോണ്‍ വിവരങ്ങള്‍ ചോര്‍ത്തുന്നു; രണ്ടുമന്ത്രിമാരുടെ ശല്യം സഹിക്ക വയ്യ; തന്റെ അവസ്ഥ ഇതാണെങ്കില്‍ സാധാരണക്കാരന്റെ അവസ്ഥ എന്തായിരിക്കും? പുതുച്ചേരിയില്‍ സ്പീക്കര്‍ക്ക് പരാതി നല്‍കി വനിതാ എം എല്‍ എ
പുതുച്ചേരിയില്‍ സ്പീക്കര്‍ക്ക് പരാതി നല്‍കി വനിതാ എം എല്‍ എ
പുതുച്ചേരി: പുതുച്ചേരി നിയമസഭാംഗവും മുന്‍ ഗതാഗത, സാംസ്‌കാരിക മന്ത്രിയുമായ ചന്ദിര പ്രിയങ്ക, ബിജെപിയില്‍ നിന്നും എന്‍ആര്‍ കോണ്‍ഗ്രസില്‍ നിന്നുമുള്ള മന്ത്രിമാര്‍ക്കെതിരെ സ്പീക്കര്‍ക്ക് ഔദ്യോഗികമായി പരാതി നല്‍കി. തന്നെ നിരന്തരം ശല്യപ്പെടുത്തുകയും രാഷ്ട്രീയ പ്രവര്‍ത്തനങ്ങള്‍ നടത്തുന്നതില്‍ നിന്ന് തടയുകയും ചെയ്യുന്നുവെന്ന് എംഎല്‍എയുടെ പരാതിയില്‍ പറയുന്നു. ഈ വിഷയത്തില്‍ അന്വേഷണം നടത്താന്‍ സ്പീക്കര്‍ നിര്‍ദേശം നല്‍കിയിട്ടുണ്ട്.
കഴിഞ്ഞദിവസം സോഷ്യല്‍ മീഡിയയില്‍ പങ്കുവെച്ച ഒരു വീഡിയോയിലൂടെയാണ് ചന്ദിര പ്രിയങ്ക ആദ്യം മന്ത്രിമാര്‍ക്കെതിരെ ആരോപണമുന്നയിച്ചത്. ഒരു സ്ത്രീ ഉയരങ്ങളിലെത്തുന്നത് പലര്‍ക്കും ഇഷ്ടപ്പെടുന്നില്ലെന്നും, രാഷ്ട്രീയ പ്രതിസന്ധികളെല്ലാം തരണം ചെയ്ത് മുന്നോട്ടുവരുന്നവരെ അപമാനിക്കുകയും അവരുടെ രാഷ്ട്രീയ ഭാവിയെ തകര്‍ക്കാന്‍ ശ്രമിക്കുകയും ചെയ്യുന്ന പ്രവണതയുണ്ടെന്നും അവര്‍ വീഡിയോയില്‍ വ്യക്തമാക്കി. ഇത് തന്റെ രാഷ്ട്രീയ മൂല്യങ്ങള്‍ക്ക് വിരുദ്ധമാണെന്നും, താന്‍ പുറത്തിറങ്ങാന്‍ പോലും ഭയക്കുന്ന സാഹചര്യമാണെന്നും എംഎല്‍എ കൂട്ടിച്ചേര്‍ത്തു.
തന്റെ പരാതിയെ ആരും ചോദ്യം ചെയ്യില്ലെന്ന തെറ്റായ ധാരണ മന്ത്രിമാര്‍ക്കുണ്ടായിരിക്കാം എന്ന് ചന്ദിര പ്രിയങ്ക വീഡിയോയില്‍ സൂചിപ്പിച്ചു. 'ഞാന്‍ വീട്ടില്‍ നിന്നിറങ്ങുമ്പോള്‍ മുതല്‍ നിങ്ങള്‍ എന്നെ നിരീക്ഷിക്കുന്നുണ്ട്. സര്‍ക്കാര്‍ സ്രോതസ്സുകള്‍ ഉപയോഗിച്ച് എന്റെ ഫോണ്‍ വിവരങ്ങള്‍ നിങ്ങള്‍ ചോര്‍ത്തി. ഞാന്‍ സുരക്ഷിതമായ സ്ഥലത്തല്ലെന്ന് എനിക്കറിയാം. ഒരു എംഎല്‍എയും മുന്‍ മന്ത്രിയുമായ എന്റെ അവസ്ഥ ഇതാണെങ്കില്‍ സാധാരണക്കാരന്റെ അവസ്ഥ എന്തായിരിക്കും? നിങ്ങള്‍ എന്ത് ചെയ്താലും എനിക്ക് ഒന്നും സംഭവിക്കില്ല,' അവര്‍ കൂട്ടിച്ചേര്‍ത്തു. ഈ വാക്കുകളില്‍ നിന്ന്, താന്‍ നേരിടുന്ന ഭീഷണികളുടെയും നിരീക്ഷണങ്ങളുടെയും ഗൗരവം വ്യക്തമാകുന്നു.
ചന്ദിര പ്രിയങ്ക എന്‍.ആര്‍. കോണ്‍ഗ്രസ് ടിക്കറ്റില്‍ കാരൈക്കാലില്‍ നിന്നാണ് നിയമസഭയിലെത്തിയത്. മുന്‍ കോണ്‍ഗ്രസ് നേതാവ് എസ്. ചന്ദ്രഹാസുവിന്റെ മകളായ ഇവര്‍ 2023 ഒക്ടോബറിലാണ് എന്‍.ആര്‍. കോണ്‍ഗ്രസ്-ബിജെപി സഖ്യസര്‍ക്കാരില്‍ ഗതാഗത, സാംസ്‌കാരിക മന്ത്രി സ്ഥാനം രാജിവെച്ചത്. സ്ത്രീ എന്ന നിലയിലും ജാതീയപരമായ അവഹേളനങ്ങള്‍ നേരിട്ടതിന്റെയും പേരിലാണ് അന്ന് രാജിവെച്ചതെന്ന് അവര്‍ വ്യക്തമാക്കിയിരുന്നു. മന്ത്രിസ്ഥാനം രാജിവെച്ച് ഏകദേശം രണ്ട് വര്‍ഷത്തിന് ശേഷമാണ് ഇപ്പോള്‍ രണ്ട് മന്ത്രിമാര്‍ക്കെതിരെ അവര്‍ ഗുരുതരമായ ആരോപണങ്ങളുമായി രംഗത്തെത്തിയിരിക്കുന്നത്. വിഷയം സംബന്ധിച്ച് ചന്ദിര പ്രിയങ്ക നേരത്തെ മുഖ്യമന്ത്രിക്ക് പരാതി നല്‍കിയിരുന്നതായും റിപ്പോര്‍ട്ടുകളുണ്ട്.
