ബിജെപിയുടെ വളര്‍ച്ച കണക്ക്കൂട്ടലിന് അപ്പുറം; അധികാരം ഉപയോഗിച്ച് സമഗ്രമേഖലയിലും ബിജെപി കടന്നു കയറി; ബിജെപിക്കെതിരെ വേണ്ടത് വിശാല ഇടതുപക്ഷ ഐക്യമാണ്, അത് തന്ത്രപരമായ അനിവാര്യത; 'ഹിന്ദു രാഷ്ട്രം', 'രാജവാഴ്ച' എന്നീ ആവശ്യങ്ങള്‍ വര്‍ധിക്കുന്നു; ബിജെപി വളര്‍ച്ചയിലെ ആശങ്ക ചൂണ്ടിക്കാട്ടി സിപിഐയുടെ കരട് രാഷ്ട്രീയ പ്രമേയം
ബിജെപിയുടെ വളര്‍ച്ച കണക്ക്കൂട്ടലിന് അപ്പുറം
ആലപ്പുഴ: ബിജെപിയുടെ വളര്‍ച്ച കണക്ക്കൂട്ടലിന് അപ്പുറമെന്ന് സിപിഐ സംസ്ഥാന സമ്മേളനത്തലെ കരട് രാഷ്ട്രീയ പ്രമേയത്തില്‍. ബിജെപിയുടെ വളര്‍ച്ചയുടെ ആശങ്ക ചൂണ്ടിക്കാട്ടുന്നതാണ് കരട് രാഷ്ട്രീയ പ്രമേയം. അധികാരം ഉപയോഗിച്ച് സമഗ്രമേഖലയിലും ബിജെപി കടന്നു കയറിയെന്നും സംസ്ഥാന സമ്മേളനത്തില്‍ അവതരിപ്പിച്ച കരട് രാഷ്ട്രീയ പ്രമേയത്തില്‍ വിശദീകരിക്കുന്നു.
ബിജെപി വളര്‍ച്ച തടയാന്‍ വേണ്ടത് വിശാല ഇടതുപക്ഷ ഐക്യമാണെന്നും കരട് പ്രമേയത്തില്‍ വിശദീകരിക്കുന്നു. ഐക്യം തന്ത്രപരമായ അനിവാര്യതയാണ്. തെരഞ്ഞെടുപ്പുകളെ സീസണലായി കാണരുത്. പ്രതീകാത്മക സ്ഥാനാര്‍ത്ഥിത്വങ്ങള്‍ ഒഴിവാക്കണം തദ്ദേശ തെരഞ്ഞെടുപ്പിനെ ജനങ്ങളിലേക്ക് ആഴത്തില്‍ ഇറങാനുള്ള അവസരം ആക്കണം. നേതൃതലത്തില്‍ പുതു തലമുറ വികസിക്കണമെന്നും റിപ്പോര്‍ട്ടില്‍ പറയുന്നു.
ഇടതുപക്ഷ സഖ്യത്തിനുള്ളിലെ വിള്ളല്‍ നേപ്പാളില്‍ രാഷ്ട്രീയ അസ്ഥിരതക്ക് സാക്ഷ്യം വഹിക്കുന്നുവെന്നും പ്രമേയത്തില്‍ വിശദീകരിക്കുന്നു. ഇടതുപക്ഷ സഖ്യത്തിനുള്ളില്‍ പ്രത്യേകിച്ച് സിപിഎന്‍-യുഎംഎല്ലിനും സിപിഎന്‍ മാവോയിസ്റ്റ് സെന്റര്‍ നും ഇടയിലുള്ള വിള്ളല്‍ ആഴത്തിലാകുന്നതിലൂടെ ഫലപ്രദമായി ഭരിക്കാനുള്ള സഖ്യത്തിന്റെ കഴിവിനെ ദുര്‍ബലപ്പെടുത്തുന്നതിലൂടെ നേപ്പാള്‍ വളര്‍ന്നുവരുന്ന രാഷ്ട്രീയ അസ്ഥിരതക്ക് സാക്ഷ്യം വഹിക്കുന്നു.
അതേസമയം, രാഷ്ട്രീയ അഴിമതിയിലും ഭരണപരാജയങ്ങളിലും പൊതുജനങ്ങള്‍ക്കുള്ള നിരാശയെ ഇന്ധനമായി രാജവാഴ്ചയെ അനുകൂലിക്കുന്ന പ്രകടനങ്ങള്‍ വീണ്ടും ഉയര്‍ന്നുവന്നിട്ടുണ്ട്. 'ഹിന്ദു രാഷ്ട്രം', 'ഭരണഘടനാ രാജവാഴ്ച' എന്നീ ആവശ്യങ്ങള്‍ ദിനം പ്രതി വര്‍ദ്ധിച്ചുവരികയാണ്. ഈ ശക്തികളെ പരാജയപ്പെടുത്താന്‍ എല്ലാ ഇടതുപക്ഷ, ജനാധിപത്യ പാര്‍ട്ടികളുടെയും ഏകീകൃത ശ്രമവും ദൃഢനിശ്ചയവും സാഹചര്യവും ആവശ്യപ്പെടുന്നുവെന്നും പ്രമേയത്തില്‍ വിശദീകരിക്കുന്നു.
അതേസമയം സംസ്ഥാന സര്‍ക്കാരിനെതിരെ വിമര്‍ശനം ഉന്നയിക്കുന്നതാണ് സിപിഐയുടെ പ്രവര്‍ത്തന റിപ്പോര്‍ട്ട്. സര്‍ക്കാരിന്റെ മുന്‍ഗണനാക്രമങ്ങളില്‍ പാളിച്ചയുണ്ട്. സര്‍ക്കാരിന് കള്ളുവ്യവസായത്തെക്കാള്‍ താല്‍പര്യം വിദേശമദ്യത്തോടാണ്. ഇടത് അണികളുടെ അടിസ്ഥാന പ്രശ്‌നങ്ങള്‍ അവഗണിക്കുകയാണ്. ഇത് പരിഹരിച്ചില്ലെങ്കില്‍ ഗുരുതരമായ തിരിച്ചടി ഉണ്ടാകുമെന്നും പ്രവര്‍ത്തന റിപ്പോര്‍ട്ട് മുന്നറിയിപ്പ് നല്‍കുന്നു. ഇടതു മുന്നണി ശക്തമാക്കണമെന്നും എല്‍ഡിഎഫിന്റെ പ്രവര്‍ത്തനങ്ങള്‍ താഴേത്തട്ടിലേക്ക് എത്തണമെന്നും റിപ്പോര്‍ട്ട് നിര്‍ദേശിക്കുന്നു. ലോക്‌സഭാ തിരഞ്ഞെടുപ്പിലെ ബിജെപിയുടെ നേട്ടത്തെ കുറച്ച് കാണരുതെന്നും റിപ്പോര്‍ട്ടിലുണ്ട്.
അതിനിടെ, മുതിര്‍ന്ന നേതാവ് കെ.ഇ.ഇസ്മയിലിനെ സമ്മേളന പ്രതിനിധിയാക്കിയില്ല എന്ന വിവാദത്തിനിടെയാണ് ആലപ്പുഴയുടെ ചുവന്ന മണ്ണില്‍ സിപിഐ സംസ്ഥാന സമ്മേളനത്തിന് ഇന്ന് ഔദ്യോഗിക തുടക്കമാകുന്നത്. 43 വര്‍ഷത്തിനുശേഷമാണ് ആലപ്പുഴ സിപിഐ സംസ്ഥാന സമ്മേളനത്തിന് വീണ്ടും വേദിയാവുന്നത്. സമ്മേളന നഗറില്‍ സ്ഥാപിക്കുന്ന ദീപശിഖ വയലാര്‍ രക്തസാക്ഷി മണ്ഡപത്തില്‍ നിന്ന് ഇന്നലെ വൈകിട്ട് വലിയ ചുടുകാട്ടില്‍ എത്തിച്ചു. സിപിഐ ശതാബ്ദിയെ അനുസ്മരിച്ച് 100 വനിതാ അത്ലിറ്റുകളാണ് ദീപശിഖ ഇന്ന് സമ്മേളന വേദിയില്‍ എത്തിക്കുന്നത്. സിപിഐ യുടെ യൂ ട്യൂബ് ചാനലായ 'കനല്‍' ദേശീയ സെക്രട്ടേറിയറ്റ് അംഗം ഡോ. കെ.നാരായണ ഉദ്ഘാടനം ചെയ്യും. നാളെയും മറ്റന്നാളും പ്രതിനിധി സമ്മേളനം തുടരും. 39 ക്ഷണിതാക്കള്‍ ഉള്‍പ്പെടെ 528 പ്രതിനിധികളാണ് പങ്കെടുക്കുന്നത്. ഇന്ന് 5 ന് നടക്കുന്ന സെമിനാര്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും.
