അമേരിക്കന്‍, യുകെ ബിസിനസ് വിസകളും അവിടെയൊക്കെ ബിസിനസുമുണ്ട്; ബിസിനസുകാരനെന്ന നിലയില്‍ അഭിമാനം മാത്രം; കെ ടി ജലീലിന് മറച്ചുവച്ച അഴിമതി പുറത്തുവരുമെന്ന വെപ്രാളം; മലയാളം സര്‍വകലാശാലയുടെ ഭൂമി ഏറ്റെടുക്കലില്‍ ജലീല്‍ കോടികളുടെ അഴിമതി കാട്ടി; മറുപടിയുമായി പി കെ ഫിറോസ്
ജലീലിന് മറുപടിയുമായി പി കെ ഫിറോസ്
കോഴിക്കോട്: കെ.ടി. ജലീല്‍ ഉന്നയിച്ച ആരോപണങ്ങള്‍ക്ക് മറുപടിയുമായി യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ. ഫിറോസ് രംഗത്ത്. മറുപടിക്കൊപ്പം ജലീലിന് എതിരെ ആരോപണങ്ങളും ഉയര്‍ത്തി. ജലീല്‍ മന്ത്രിയായിരുന്ന കാലത്ത് മലയാളം സര്‍വകലാശാലയുടെ ഭൂമി ഏറ്റെടുക്കല്‍ സംബന്ധിച്ച് കോടികളുടെ അഴിമതി നടത്തിയെന്നും ഇതിന് നിര്‍ണായക തെളിവുകള്‍ പുറത്തുവരുമെന്നും ഫിറോസ് വാര്‍ത്താ സമ്മേളനത്തില്‍ പറഞ്ഞു. അഴിമതി പുറത്തുവരുമോ എന്ന ഭയം മൂലമാണ് ജലീല്‍ അടിസ്ഥാനരഹിതമായ ആരോപണങ്ങള്‍ ഉന്നയിക്കുന്നതെന്നും അദ്ദേഹം കൂട്ടിച്ചേര്‍ത്തു.
നാണം കേട്ട് രാജിവെച്ചതിലെ പക മാത്രമല്ല കെ ടി ജലീലിന് ഉള്ളത്. മന്ത്രി ആയപ്പോള്‍ നടത്തിയ മറ്റൊരു ഗുരുതര അഴിമതി പുറത്തു വരാന്‍ പോകുന്നു എന്നതിലെ വെപ്രാളമാണ് ജലീല്‍ കാണിക്കുന്നത്. ഈ അഴിമതി കൂടി പുറത്തു വന്നാല്‍ തലയില്‍ മുണ്ടിട്ടു പുറത്തു നടക്കേണ്ടി വരുമോ എന്ന വെപ്രാളമാണ് ജലീലിനെന്നും പരസ്പര വിരുദ്ധമായ കാര്യങ്ങളാണ് ജലീല്‍ പറയുന്നതെന്നും ഫിറോസ് പറഞ്ഞു.
താന്‍ ബിസിനസ് ചെയ്യുന്ന ആളാണ്. അതില്‍ അഭിമാനം ഉണ്ട്. രാഷ്ട്രീയം ഉപജീവനം ആക്കരുത് എന്ന് പ്രവര്‍ത്തകരോട് പറയാറുണ്ട്. ജലീലിനോടും സ്വന്തം നിലക്ക് തൊഴില്‍ ചെയ്യണം എന്നാണ് പറയാനുള്ളത്. ബിസിനസ്സില്‍ പങ്കാളി ആക്കാന്‍ രാഷ്ട്രീയം നോക്കേണ്ട. വിദേശത്തുള്ള കമ്പനിയില്‍ എത്ര ആള്‍ വേണം, എത്ര ശമ്പളം തരുന്നു എന്നതൊക്കെ കമ്പനിയുടെ സ്വകാര്യ കാര്യം. അതൊക്കെ എന്തിന് ജലീലിനോട് പറയണം. ഫിറോസിന് റിവേഴ്സ് ഹവാല ഉണ്ട് എന്നതില്‍ ജലീലിന് വ്യക്തത ഉണ്ടോ. ഇങ്ങനെ ആരോപണം ഉന്നയിക്കുന്നത് ചെപ്പടി വിദ്യയാണെന്നും അദ്ദേഹം പറഞ്ഞു.
നിയമവിരുദ്ധമായ ബിസിനസ് നടത്തിയില്ലെന്നും ഫിറോസ് പറഞ്ഞു. കൊപ്പം, ഹൈ ലൈറ്റ് മാള്‍ എന്നിവിടങ്ങളില്‍ സ്ഥാപനം ഉണ്ട്. മറ്റു ബിസിനസും ഉണ്ട്. ദുബായിലെ കമ്പനിയില്‍ നിന്നും ജലീല്‍ പറഞ്ഞ അത്ര ശമ്പളം കിട്ടുന്നില്ല. തനിക്ക് അമേരിക്കന്‍, യുകെ ബിസിനസ് വിസ ഉണ്ട്. അവിടെയൊക്കെ ബിസിനസ് നടത്തുന്നുണ്ടെന്നും അദ്ദേഹം വ്യക്തമാക്കി.
