'രാഹുലിനെതിരെ ആരോപണം ഉയര്‍ന്നപ്പോള്‍ തന്നെ നടപടിയെടുത്തു'; അഭിമാനകരമായ തീരുമാനമാണ് കോണ്‍ഗ്രസ് എടുത്തതെന്ന് വി ഡി സതീശന്‍; രാഹുലിനെ പിന്തുണക്കുന്ന വീക്ഷണത്തിലെ മുഖപ്രസംഗം അത് എഴുതിയവരോട് പോയി ചോദിക്കണമെന്നും പ്രതിപക്ഷ നേതാവ്
'രാഹുലിനെതിരെ ആരോപണം ഉയര്‍ന്നപ്പോള്‍ തന്നെ നടപടിയെടുത്തു'
കണ്ണൂര്‍: ശബരിമല കൊള്ള മറക്കാന്‍ മറ്റൊരു വിഷയം കൊണ്ടുവന്നാലും ഞങ്ങള്‍ അതില്‍ വീഴില്ലെന്നും രാഹുല്‍ വിഷയത്തില്‍ പാര്‍ട്ടി നിലപാട് കെപിസിസി പ്രസിഡന്റ് വ്യക്തമാക്കിയിട്ടുണ്ടെന്നും വിഡി സതീശന്‍ പറഞ്ഞു. ആരോപണം ഉണ്ടായപ്പോള്‍ തന്നെ നടപടിയെടുത്ത പാര്‍ട്ടിയാണ് കോണ്‍ഗ്രസ്. അഭിമാനകരമായ തീരുമാനമാണ് കോണ്‍ഗ്രസ് എടുത്തതെന്നും വിഡി സതീശന്‍ പറഞ്ഞു. ഒരു വിഷയത്തില്‍ ഒരാള്‍ക്കെതിരെ ഒരു നടപടി മാത്രമാണ് എടുക്കാനാകുക. രണ്ടു പ്രാവശ്യം നടപടിയെടുക്കാനാകില്ലെന്നും വിഡി സതീശന്‍ പറഞ്ഞു.
രാഹുല്‍ വിഷയത്തില്‍ വീക്ഷണത്തെ തള്ളിയാണ് വി ഡി സതീശന്‍ വാദിച്ചതും. രാഹുല്‍ മാങ്കൂട്ടത്തിലിന് അനുകൂലമായ വീക്ഷണം മുഖപ്രസംഗം എഴുതിയതിനെ കുറിച്ച് അതേഴുതിയവരോട് ചോദിക്കണമെന്ന് പ്രതിപക്ഷ നേതാവ് വി ഡി സതീശന്‍. കണ്ണൂരില്‍ മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കുകയായിരുന്നു അദ്ദേഹം.
ശബരിമല വിഷയത്തിലും കണ്ണൂര്‍ പയ്യന്നൂരില്‍ പൊലീസ് വാഹനത്തിന് നേരെ ബോംബെറിഞ്ഞ് ശിക്ഷിക്കപ്പെട്ടയാള്‍ക്കെതിരെയും നടപടി സ്വീകരിക്കാത്ത സിപിഐഎമ്മിന്റെ ഇരട്ടമുഖം ഈ തെരഞ്ഞെടുപ്പില്‍ ചര്‍ച്ചചെയ്യപ്പെടുമെന്നും വി ഡി സതീശന്‍ പറഞ്ഞു.
വി ഡി സതീശന്റെ വാക്കുകള്‍: 'ശബരിമലയില്‍ അയ്യപ്പന്റെ സ്വര്‍ണം മോഷ്ടിച്ച രണ്ട് മുന്‍ ദേവസ്വം പ്രസിഡന്റുമാര്‍ക്കെതിരെ ഒരു നടപടിയും സിപിഐഎം സ്വീകരിക്കുന്നില്ല. ആഭ്യന്തരവകുപ്പു കൂടി കൈകാര്യം ചെയ്യുന്ന വ്യക്തിയാണ് മുഖ്യമന്ത്രി. നിരപരാധികളായ പൊലീസുകാര്‍ സഞ്ചരിച്ച പൊലീസ് ജീപ്പിന് നേരെ ബോംബെറിഞ്ഞതിന് കോടതി ഇരുപത് വര്‍ഷം ശിക്ഷിച്ചയാളാണ് സിപിഐഎമ്മിന്റെ സ്ഥാനാര്‍ത്ഥി. ഇതില്‍ ധാര്‍മികതയുടെ പ്രശ്നമില്ലെന്നാണ് ഡിവൈഎഫ്ഐയുടെ പ്രസ്താവന. മോഷ്ടാക്കളെയും ക്രിമിനലുകളെയും സംരക്ഷിക്കുന്ന പാര്‍ട്ടിയാണ് സിപിഐഎം എന്നതാണ് പരിതാപകരമായ കാര്യം. എന്ത് ക്രിമിനല്‍കുറ്റം ചെയ്യുന്നവര്‍ക്കും കുട പിടിച്ചുകൊടുക്കുന്ന പാര്‍ട്ടിയാണ് സിപിഐഎം. ക്രിമിനലുകളെയും മോഷ്ടാക്കളെയും പ്രോത്സാഹിപ്പിക്കുന്ന സിപിഐഎമ്മിന്റെ ഇരട്ടമുഖം ഈ തെരഞ്ഞെടുപ്പില്‍ ഉറപ്പായും ചര്‍ച്ചചെയ്യപ്പെടും.
രാഹുല്‍ വിഷത്തില്‍ പാര്‍ട്ടി നടപടി സ്വീകരിച്ചിട്ടുണ്ട്. ഒരു വിഷയത്തില്‍ ഒരാള്‍ക്കെതിരെ രണ്ടു തവണ നടപടി സ്വീകരിക്കാന്‍ കഴിയില്ല. ഇതില്‍ കെപിസിസി പ്രസിഡന്റ് അഭിപ്രായം പറഞ്ഞിട്ടുണ്ട്. പാര്‍ട്ടിയുടെ നിലപാടും അത് തന്നെയാണ്. എല്ലാവരുമായി കൂടിയാലോചന നടത്തിയാണ് അന്ന് നടപടി സ്വീകരിച്ചതും ഇപ്പോഴത്തെ നിലപാട് കെപിസിസി അധ്യക്ഷന്‍ പറഞ്ഞതും. ഈ വിഷയം വീണ്ടും ഉയര്‍ത്തിക്കൊണ്ട് വന്ന് ശബരിമലയിലെ കൊള്ള ഒഴിവാക്കാനുള്ള തന്ത്രം ആര് സ്വീകരിച്ചാലും അതില്‍ വീഴിയില്ല. മേല്‍പ്പറഞ്ഞ കാര്യങ്ങളില്‍ നടപടി സ്വീകരിക്കാതെ അത്തരക്കാരെ സംരക്ഷിക്കുന്ന സിപിഐഎമ്മിന് ഇക്കാര്യം ചോദിക്കാനുള്ള ഒരു ധാര്‍മികയുമില്ല. ഇത്തരം ഒരു സാഹചര്യത്തില്‍ പരാതി പോലുമില്ലാതെ നടപടിയെടുത്ത കോണ്‍ഗ്രസ് തലയുയര്‍ത്തിയാണ് നില്‍ക്കുന്നത്. വീക്ഷണത്തില്‍ രാഹുലിനെതിരെ നടന്നത് ഗൂഡാലോചനയാണെന്ന് എഴുതിയത് എഴുതിയവരോട് പോയി ചോദിക്കണം'.
