സിനിമ തീയേറ്ററുകൾ ജനുവരി 5 മുതൽ തുറക്കാൻ അനുമതി; ആകെ സീറ്റുകളുടെ പകുതി ആളുകൾക്ക് മാത്രം പ്രവേശനം; ഉത്സവങ്ങളിൽ കലാപരിപാടികൾ കോവിഡ് നിയന്ത്രണം പാലിച്ച് നടത്താം; സ്പോർട്സ് പരിശീലനത്തിനും നീന്തൽ പരിശീലനത്തിനും അനുമതി; പുതുവർഷത്തിൽ പത്തിന പരിപാടിയും പ്രഖ്യാപിച്ച് മുഖ്യമന്ത്രി
തിരുവനന്തപുരം: ഏറെ നാളത്തെ കാത്തിരിപ്പിന് ശേഷം സംസ്ഥാനത്തെ സിനിമാ തീയേറ്ററുകൾ തുറക്കുന്നു. സിനിമ തിയറ്ററുകൾ ജനുവരി 5 മുതൽ തുറക്കാമെന്ന് മുഖ്യമന്ത്രി പിണറായി വിജയൻ അറിയിച്ചു. ആകെ സീറ്റുകളുടെ പകുതി ആളുകളെ മാത്രമേ പ്രവേശിപ്പിക്കാവൂ. കോവിഡ് മാനദണ്ഡങ്ങൾ ലംഘിക്കുന്ന തിയറ്ററുകൾക്കെതിരെ കർശന നടപടിയെടുക്കുമെന്നും മുഖ്യമന്ത്രി പറഞ്ഞു.
ആരാധനാലയങ്ങളിലെ ഉത്സവങ്ങളിൽ കലാപരിപാടികൾ കോവിഡ് നിയന്ത്രണം പാലിച്ച് നടത്താനും അനുമതി നൽകി. സ്പോർട്സ് പരിശീലനത്തിനും നീന്തൽ പരിശീലനത്തിനും അനുമതി. ഇൻഡോറിൽ പരമാവധി നൂറും ഔട്ട്‌ഡോറിൽ പരമാവധി ഇരുനൂറും പേരെ അനുവദിക്കും.
പുതുവർഷത്തിൽ പത്തിന പരിപാടിയും മുഖ്യമന്ത്രി പ്രഖ്യാപിച്ചു.വയോധികർക്ക് ആനുകൂല്യങ്ങൾ കിട്ടാൻ സർക്കാർ ഓഫീസുകളിൽ നേരിട്ടെത്തേണ്ടതില്ലാത്ത തരത്തിൽ ക്രമീകരണം.ജനുവരി പത്തിന് മുമ്പ് വിജ്ഞാപനം ചെയ്യുന്ന അഞ്ച് സേവനങ്ങൾ ആദ്യഘട്ടത്തിൽ പദ്ധതിയിൽ ഉൾപ്പെടുത്തും. മസ്റ്ററിങ്, ജീവൻരക്ഷാമരുന്നുകൾ, ലൈഫ് സർട്ടിഫിക്കറ്റ്, സാമൂഹ്യസുരക്ഷാ പെൻഷൻ അപേക്ഷ, സിഎംഡിആർഎഫ് സഹായം എന്നിവയാണ് ആദ്യഘട്ടത്തിലെ സഹായങ്ങൾ.
ക്രമേണ മറ്റ് സേവനങ്ങളും വീട്ടിൽത്തന്നെ ലഭ്യമാക്കാൻ നടപടിയുണ്ടാവും. ഓൺലൈനായി സേവനങ്ങൾക്ക് അപേക്ഷ നൽകാൻ പറ്റാത്തവരുടെ വീട്ടിൽപോയി അപേക്ഷ വാങ്ങി നൽകി തുടർവിവരങ്ങൾ വിളിച്ചറിയിക്കും. ഇതിന് സന്നദ്ധസേവാംഗങ്ങളുടെ സേവനം തദ്ദേശസ്ഥാപനങ്ങൾ വഴി നൽകും.
ഒറ്റയ്ക്ക് താമസിക്കുന്നവർ, ഭിന്നശേഷിക്കാർ, കാഴ്ചാപരിമിതി അടക്കമുള്ളവർ ഒക്കെ താമസിക്കുന്ന വീടുകളുടെ വിവരങ്ങൾ സന്നദ്ധസേവാംഗങ്ങളെ അറിയിക്കും. സർക്കാർ സംവിധാനങ്ങൾക്ക് ഈ വിവരങ്ങൾ എത്തിക്കും. ഈ പദ്ധതി ജനുവരി 15-ന് തുടങ്ങും. കളക്ടർമാരും തദ്ദേശസ്ഥാപനങ്ങളും ഇത് ഏകോപിപ്പിക്കും.
സാമ്പത്തിക ശേഷിയില്ലാത്ത മികച്ച പഠനം കാഴ്ചവയ്ക്കുന്ന കുട്ടികൾക്കായി എമിനന്റ് സ്‌കോളേഴ്‌സ് ഓൺലൈൻ എന്ന പരിപാടി തുടങ്ങും. സാമ്പത്തിക ശാസ്ത്രജ്ഞർ അടക്കം ലോകത്തെ മികച്ച അക്കാഡമിക് വിദഗ്ദ്ധർക്ക് നമ്മുടെ സർക്കാർ കോളജുകളിലെ കുട്ടികൾക്ക് സംവദിക്കാൻ അവസരമൊരുക്കും.
പ്രഭാഷണങ്ങൾ ഓൺലൈനായി കേൾപ്പിക്കാനും അവരോട് സംവദിക്കാനും അവസരമൊരുക്കും. വിക്ടേഴ്‌സ് പോലുള്ള ചാനലുകൾ വഴി ഇത് സംപ്രേഷണം ചെയ്യും. ആദ്യപരിപാടി ജനുവരിയിൽ നടക്കും. വാർഷികവരുമാനം രണ്ടരലക്ഷം രൂപയിൽ താഴെയുള്ള, ബിരുദപഠനം സ്തുത്യർഹമായ രീതിയിൽ പൂർത്തിയാക്കുന്ന കുട്ടികൾക്ക് ഒരു ലക്ഷം രൂപ സ്‌കോളർഷിപ്പ് നൽകും.1000 പേർക്കാണ് സ്‌കോളർഷിപ്പ് നൽകുകയെന്നും മുഖ്യമന്ത്രി അറിയിച്ചു.
