കണ്ണിനെ ഇരുട്ടാക്കുന്ന രീതിയിൽ പ്രകാശം ഭൂമിയിലേക്ക് പതിക്കുമ്പോൾ കാണുന്നത് എല്ലാം വിചിത്രമായ കാഴ്ചകൾ; വിളിച്ചാൽ വിളിപ്പുറത്തെത്തുന്ന ജാപ്പനീസുകാരുടെ സൂര്യദേവൻ; സത്യത്തിൽ ആ നിഗൂഢ 'കോസ്മിക് രശ്മി' വരുന്നത് എവിടെ നിന്ന്; ഉത്ഭവം തേടി ശാസ്ത്രജ്ഞര്
ഭൂമിയിലേക്ക് പതിച്ച, ഇതുവരെ കണ്ടെത്തിയതിൽ വെച്ച് ഏറ്റവും ഊർജ്ജമേറിയ കണികകളിലൊന്നായ 'അമതെരാസു'വിന്റെ ഉത്ഭവത്തെക്കുറിച്ചുള്ള ദീർഘകാല ദുരൂഹതയ്ക്ക് പുതിയ വഴിത്തിരിവ്. ജർമ്മനിയിലെ മാക്സ് പ്ലാങ്ക് ഇൻസ്റ്റിറ്റ്യൂട്ട് ഫോർ ഫിസിക്സിലെ ഗവേഷകർ നടത്തിയ പഠനം, ഈ ദുരൂഹ കണികയുടെ ഉറവിടം സമീപത്തുള്ള നക്ഷത്രരൂപീകരണ ഗാലക്സികളായ M82 പോലുള്ളവയിൽ നിന്നാകാമെന്ന് സൂചിപ്പിക്കുന്നു. മുൻപ് കരുതിയിരുന്നത് പോലെ, ആകാശഗംഗകൾ കുറവുള്ള 'ലോക്കൽ വോയിഡ്' എന്ന ശൂന്യമേഖലയിൽ നിന്നല്ല ഇതിന്റെ ഉത്ഭവമെന്ന് പുതിയ കണ്ടെത്തൽ വ്യക്തമാക്കുന്നു.
2021-ൽ ആദ്യമായി തിരിച്ചറിഞ്ഞ അമതെരാസു കണം, പ്രകാശത്തിന്റെ വേഗതയിൽ ബഹിരാകാശത്തിലൂടെ സഞ്ചരിക്കുന്ന അത്യുജ്ജ്വലമായ ഊർജ്ജമുള്ള വൈദ്യുത കണങ്ങളായ കോസ്മിക് റേകളിൽ ഒന്നാണ്. ലോകത്തിലെ ഏറ്റവും വലിയ കണികാ പരീക്ഷണശാലയായ ലാർജ് ഹാഡ്രോൺ കൊളൈഡറിലെ (എൽഎച്ച്സി) കണങ്ങളേക്കാൾ നാൽപ്പത് ദശലക്ഷം മടങ്ങ് കൂടുതൽ ഊർജ്ജം ഈ കണത്തിനുണ്ടെന്നതാണ് ഇതിനെ അതിശയകരമാക്കുന്നത്. 1991-ൽ കണ്ടെത്തിയ 'ഓ മൈ ഗോഡ്' കണികയ്ക്ക് ശേഷം രേഖപ്പെടുത്തിയ ഏറ്റവും ഉയർന്ന ഊർജ്ജമുള്ള രണ്ടാമത്തെ കോസ്മിക് റേ കൂടിയാണിത് അമതെരാസു. ഇത്തരം കണികകൾ വളരെ അപൂർവമായതിനാൽ അവയുടെ ഉത്ഭവം കണ്ടെത്തുന്നത് ഗവേഷകരെ സംബന്ധിച്ച് ഏറെ പ്രധാനപ്പെട്ടതാണ്.
അതിശക്തമായ ഇത്തരം കോസ്മിക് കണികകൾ സാധാരണയായി സൂപ്പർനോവാ സ്ഫോടനങ്ങളുടെ അവശിഷ്ടങ്ങളിൽ നിന്നോ അതിവിശാലമായ തമോഗർത്തങ്ങൾ നിറഞ്ഞിരിക്കുന്ന ആകാശഗംഗകളുടെ കേന്ദ്രങ്ങളിൽ നിന്നോ ആണ് ഉദ്ഭവിക്കാറുള്ളത്. എന്നാൽ, അമതെരാസു കണം 'ലോകൽ വോയിഡ്' എന്നറിയപ്പെടുന്ന, ആകാശഗംഗകൾ കുറവുള്ള ഒരു ശൂന്യമേഖലയിൽ നിന്നാണ് ഉത്ഭവിച്ചതെന്നായിരുന്നു മുൻപ് ഗവേഷകർ സംശയിച്ചിരുന്നത്. അത്യന്തം ശക്തമായ കോസ്മിക് കണങ്ങൾ സൃഷ്ടിക്കപ്പെടുന്ന പരിസ്ഥിതികൾ അവിടെയില്ല എന്നതിനാൽ ഇത് ശാസ്ത്രജ്ഞരെ കുഴക്കിയിരുന്നു.
ഈ പശ്ചാത്തലത്തിലാണ് മാക്സ് പ്ലാങ്ക് ഇൻസ്റ്റിറ്റ്യൂട്ടിലെ ഗവേഷകരായ ഫ്രാൻസെസ്ക കാപെൽ, നദീൻ ബൗറിഷ് എന്നിവർ നടത്തിയ പഠനം നിർണായകമാകുന്നത്. അവരുടെ കണ്ടെത്തലുകൾ പ്രകാരം, അമതെരാസു ലോക്കൽ വോയിഡിൽ നിന്നല്ല, മറിച്ച് സമീപത്തുള്ള നക്ഷത്ര രൂപീകരണ ആകാശഗംഗകളിൽ നിന്നാകാം വന്നത്. M82 പോലുള്ള ഗാലക്സികളാണ് അമതെരാസുവിന്റെ ഉദ്ഭവത്തിന് സാധ്യതയുള്ള ഉറവിടങ്ങൾ എന്നാണ് പുതിയ നിഗമനം.
"ലോക്കൽ വോയിഡ് പോലുള്ള കുറഞ്ഞ സാന്ദ്രതയുള്ള സ്ഥലത്ത് നിന്ന് ഉത്ഭവിക്കുന്നതിനുപകരം, അമതെരാസു കണിക എം82 പോലുള്ള അടുത്തുള്ള നക്ഷത്രരൂപീകരണ ഗാലക്സിയിൽ ഉത്പാദിപ്പിക്കപ്പെടാൻ സാധ്യതയുണ്ടെന്ന് ഞങ്ങളുടെ പഠനം സൂചിപ്പിക്കുന്നു," എന്ന് നദീൻ ബൗറിഷ് ഒരു പ്രസ്താവനയിൽ പറഞ്ഞതായി സ്പേസ് ഡോട്ട് കോം റിപ്പോർട്ട് ചെയ്യുന്നു. ഈ പുതിയ കണ്ടെത്തൽ അമതെരാസുവിന്റെ ഉത്ഭവത്തെക്കുറിച്ചുള്ള നിഗൂഢതകൾക്ക് ഒരു പരിഹാരമാകുമെന്നാണ് കരുതപ്പെടുന്നത്.
