ഇനി ചിത്രങ്ങളും വീഡിയോകളും എളുപ്പത്തിൽ എഡിറ്റ് ചെയ്യാം; ഇന്‍സ്റ്റഗ്രാമിന് പുതിയ എ.ഐ ഫീച്ചറുമായി മെറ്റ
കൊച്ചി: ഇൻസ്റ്റഗ്രാം ഉപയോക്താക്കൾക്ക് ഫോട്ടോകളും വീഡിയോകളും എളുപ്പത്തിൽ എഡിറ്റ് ചെയ്യാൻ സഹായിക്കുന്ന നൂതനമായ എ.ഐ ടൂളുകൾ അവതരിപ്പിച്ച് മെറ്റ. ആപ്പ് വിട്ട് പുറത്തുപോകാതെ തന്നെ സ്റ്റോറികളിൽ ദൃശ്യങ്ങൾ മെച്ചപ്പെടുത്താൻ ഈ പുതിയ സംവിധാനം സഹായിക്കും. ചിത്രങ്ങളിൽ പുതിയതായി എന്തെങ്കിലും കൂട്ടിച്ചേർക്കാനും നിലവിലുള്ള ഭാഗങ്ങൾ നീക്കം ചെയ്യാനും, ചിത്രങ്ങളിലെ ഘടകങ്ങളെ ക്രിയാത്മകമായി പരിഷ്കരിക്കാനും പ്രോംപ്റ്റുകൾ (നിർദ്ദേശങ്ങൾ) ഉപയോഗിച്ച് സാധിക്കും.
നേരത്തെ, മെറ്റയുടെ എ.ഐ ചാറ്റ്ബോട്ട് വഴിയായിരുന്നു ഈ സൗകര്യം ലഭ്യമായിരുന്നത്. എന്നാൽ ഇപ്പോൾ, ഉപയോക്താക്കൾക്ക് നേരിട്ട് ഇൻസ്റ്റഗ്രാം പ്ലാറ്റ്‌ഫോമിൽ ഈ എ.ഐ ടൂളുകൾ ഉപയോഗിക്കാം. മുടിയുടെ നിറം മാറ്റാനും, ആഭരണങ്ങൾ കൂട്ടിച്ചേർക്കാനും, പശ്ചാത്തലം (ബാക്ക്‌ഗ്രൗണ്ട്) മാറ്റാനും ഇത് സഹായിക്കും. കൂടാതെ, സൺഗ്ലാസ്, ബൈക്കർ ജാക്കറ്റ് തുടങ്ങിയ വിവിധ പ്രീസെറ്റ് സ്റ്റൈലുകളും ഇതിൽ ഉൾപ്പെടുന്നു.
പുതിയ എ.ഐ ഫീച്ചറുകൾ ഉപയോഗിക്കുന്നതിന് ചില നിബന്ധനകൾ മെറ്റ മുന്നോട്ടുവെച്ചിട്ടുണ്ട്. ഈ നിബന്ധനകൾ ഉപയോക്താക്കൾ അംഗീകരിക്കേണ്ടത് നിർബന്ധമാണ്. ചിത്രങ്ങളിൽ പ്രോംപ്റ്റുകൾ അനുസരിച്ച് മാറ്റങ്ങൾ വരുത്താൻ ഇത് ഉപകരിക്കും. കൂടാതെ, കുട്ടികൾ എ.ഐ സംവിധാനങ്ങളുമായി സംവദിക്കുന്നത് നിയന്ത്രിക്കാനും നിരീക്ഷിക്കാനും മാതാപിതാക്കൾക്ക് സാധിക്കുന്ന പാരന്റൽ കൺട്രോൾ സംവിധാനവും മെറ്റ ഇതിനോടൊപ്പം അവതരിപ്പിച്ചിട്ടുണ്ട്.
