ഈശ്വര..ഇതാണോ പണിക്കര് പറഞ്ഞ ആ പെൺകുട്ടി..!!; ഇനി നമുക്ക് മാച്ചായ ഒരാളെ മെറ്റ തന്നെ കണ്ടെത്തി തരും; 'മീറ്റ് ക്യൂട്ട്' ഫീച്ചറുമായി ഫേസ്ബുക്ക്; പുത്തന്‍ ഫീച്ചറുകള്‍ അറിയാം
ഫേസ്ബുക്ക് പ്ലാറ്റ്‌ഫോമിൽ ഡേറ്റിംഗ് ഉപയോഗിക്കുന്നവർക്ക് കൂടുതൽ സൗകര്യമൊരുക്കുന്നതിനായി മെറ്റ പുതിയ രണ്ട് ഫീച്ചറുകൾ അവതരിപ്പിച്ചു. ഡേറ്റിംഗ് അസിസ്റ്റന്‍റ്, മീറ്റ് ക്യൂട്ട് (Meet Cute) എന്നിവയാണ് ഫേസ്ബുക്ക് ഡേറ്റിംഗിൽ പുതുതായി ഉൾപ്പെടുത്തിയിരിക്കുന്നത്. ഈ പുതിയ എഐ (AI) സാങ്കേതികവിദ്യ ഉപയോഗിക്കുന്ന ഫീച്ചറുകൾ ഉപയോക്താക്കൾക്ക് വേഗത്തിലും മികച്ച രീതിയിലും ബന്ധങ്ങൾ സ്ഥാപിക്കാൻ സഹായിക്കുമെന്ന് മെറ്റ അറിയിച്ചു.
പ്രധാനമായും 18-29 വയസ്സിനിടയിലുള്ള യുവജനങ്ങൾക്കിടയിൽ യു.എസ്, കാനഡ എന്നിവിടങ്ങളിൽ ഫേസ്ബുക്ക് ഡേറ്റിംഗ് പ്രൊഫൈലുകൾക്ക് വലിയ പ്രചാരമുണ്ടെന്ന കണ്ടെത്തലിനെ തുടർന്നാണ് ഈ പുതിയ മാറ്റങ്ങൾ. ഡേറ്റിംഗ് അസിസ്റ്റന്‍റ് ഉപയോക്താക്കൾക്ക് വ്യക്തിഗത സഹായം നൽകുന്ന ഒന്നായി പ്രവർത്തിക്കും. ഇത് ഉപയോക്താക്കളുടെ താൽപ്പര്യങ്ങൾ, മുൻഗണനകൾ എന്നിവ അടിസ്ഥാനമാക്കി മികച്ച മാച്ചുകൾ നിർദ്ദേശിക്കുകയും ഡേറ്റിംഗ് ആശയങ്ങൾ നൽകുകയും ചെയ്യും. കൂടാതെ, ഉയരം, വിദ്യാഭ്യാസം തുടങ്ങിയ ഫിൽട്ടറുകൾക്കൊപ്പം മറ്റ് ഇഷ്ടാനുസൃത ശുപാർശകളും നൽകും. ഈ ഫീച്ചർ ഉടൻ തന്നെ യു.എസ്, കാനഡ എന്നിവിടങ്ങളിൽ ലഭ്യമാകും.
ഇതോടൊപ്പം അവതരിപ്പിച്ച മീറ്റ് ക്യൂട്ട് ഫീച്ചർ, മെറ്റയുടെ അൽഗോരിതം ഉപയോഗിച്ച് ഉപയോക്താക്കളെ ഓട്ടോമാറ്റിക്കായി ആളുകളുമായി ബന്ധിപ്പിക്കും. ആഴ്ചതോറും പൊരുത്തമുള്ളവരെ ഈ ഫീച്ചർ വാഗ്ദാനം ചെയ്യും, പിന്നീട് കൂടുതൽ സാധ്യതകൾ പരിഗണിക്കും. ലഭിക്കുന്ന പൊരുത്തവുമായി (Match) ഉടൻ തന്നെ ചാറ്റ് ചെയ്യാനോ താല്പര്യമില്ലെങ്കിൽ ഒഴിവാക്കാനോ ഉപയോക്താക്കൾക്ക് കഴിയും. ഡേറ്റിംഗ് ആപ്പുകളുടെ സാധാരണരീതികളിൽ മടുത്തവർക്ക് പുതിയതും രസകരവുമായ അനുഭവം നൽകുക എന്നതാണ് മീറ്റ് ക്യൂട്ട് ഫീച്ചറിലൂടെ മെറ്റ ലക്ഷ്യമിടുന്നത്.
